كيف استغلت اللجان الالكترونيه فيديو رقص سيده فى دريم بارك - ولماذا تم نشره مره اخرى بعد عامين - وماذا لو تحرش بها احد
تصحيح قررت اعدل المنشور لكتابة ملاحظه
المنشور زى ما هو .. لكن هاقول انى شوفت الفيديو على ماوقع تقول انه حديث ولكن اتضح ان معلومات الفيديو صح لكن الفرق ان الفيديو مش السنه دى .. الفيديو من سنتين .. وجب التنبيه للامانه وان كان مناقشة الموضوع غير متعلقه بالتاريخ الخاص بالفيديو
الغريب فى الامر
انك تلاقى حد يقولك
انتوا بتتكلموا عنهم ليه .. بتفضحوهم؟
مع العلم ان حضرتك لو شوفت الفيديو هاتعرف انهم بيرقصوا قصاد العشرات من الشباب وظاهر جدا ان الموبايلات بتصور وهما شايفين الموبايلات وهى بتصورهم
دا اولا
ثانيا
الاحتفالات زمان كانت اهالى تاخد عيالها على انغام الدنيا ربيع وتروح تشوف جنينة الحيوانات .. دلوقتى تروح المسرح الرومانى فى دريم بارك ..فتشتغل اغانى المهرجانات ويشتغل الرقص بشكل فج !
وبالمناسبه مش اول مره .. افتكروا السنه اللى فاتت الشباب اللى قلعوا ورقصوا بالبوكسرات فى الشارع !
ثالثا
فكروا معايا كده شويه معلش انا اسف
بما انى كنت ناوى اكتب بوست اقولكم فيه مش ملاحظين ان السنه دى مفيش الهوجه بتاعت التحرش !!! وكأن فى حد بيضغظ على الزرار وقت ما يحب
ولكن ...
لما بنت .. وسيده لابسه عبايه تطلع ترمى طرحتها عالارض وترقص بلدى بطريقه مستفزه وسط كل الشباب دول .. فى مكان مزدحم زى دريم بارك .. تفتكروا لو واحد من الشباب دول راح معدى ومتحرش ولا معتدى عليها .. وقتها كنا هانسمع ايه؟؟؟
كنا هانسمع ان البلد مليانه وحوش .. البلد مليانه ذئاب
الحكومه مش بتحافظ على المواطنين
بالمناسبه .. كل بنى ادم حر .. ولا اخلق عذر لاى جريمه
لكن زى ما كتبت عن البنت اللى وافقت تحمل لقب عانس فى برنامج تلفزيونى وقولتلها اسأتى لنفسك ولغيرك من البنات .. برضو فى حدود لازم الواحده تحافظ عليها عشان تحمى نفسها .. وعشان ماتبقاش عرضه للخطر او للأذى
المشكله ان الفعل نفسه مش بس غريب
لا كمان بيتم استغلاله من اللجان الالكترونيه بشكل كويس
يعنى بغض النظر انك شايف واحد بترقص والتانيه ( اسف فى اللفظ ) ممم بتقف فوقها بشكل قليل الادب ومتخلف جدا ... افتح بقى اليوتيوب ومواقع الاخوان تلاقيهم رافعين الفيديو ومركبين عليه اغنية بشرة خير والعنوان ( شعب السيسي يرقص على انغام بشرة خير فى شم النسيم ) !!!!
وناس تانيه استخدمته بشكل تانى وقالك مواطنه مصريه ترمى الحجاب على الارض لترقص فى شم النسيم .. ( ماكانتش لابسه حجاب بالمناسبه )
وكله شغال شير والمصرى بياخد العناوين فقط وشغال الله ينور
انا بصراحه اللى شوفته خلانى مشمئز جدا
سواء دى مواطنه عاديه .. و دا واضح من الفيديو
او حتى لو نمره على المسرح بتتقدم من دريم بارك مايصحش تكون كده
وزى ما قلت وبكرر .. الحمد لله انها عدت على خير
لان كان ممكن تحصل كارثه.. فى تجمع شباب من كل ( الاشكال والالوان والاعمار والبيئــــــــــــــــــــــات ) وكان ممكن يحصل زى ما حصل قبل كده والاخر تطلع مصر صورتها زفت !
انا معرفش رأيكم ايه
ناس شايفه دا حلو .. ناس شايفاه وحش
حد يقولك حقها .. وحد بيقولك كل حاجه ليها حدود !
وبشكل عام برضو رغم انهم رقصوا قصاد العشرات او المئات
بس شخصيا حبيت اوريكم ايه استفزنى بالصور لكن غطيت الوش !
**لا استنوا .. بصراحه فى كلمتين واقفين فى زورى
عاوز اقولكم .. مهما كان رأيكم ومهما كان نظرتكم للامر
بنات بلدى ماكانوش كده .. ماكنتش بشوف بنات بتقلع وترقص فى مكان عام وسط مئات الشباب بالشكل دا .. مش متقبل الفكره
انا عيشت فى حتت شعبيه وعيشت فى مناطق راقيه .. لحد 10 سنين فاتوا .. ماكانش فى المنظر دا .. وماكانش فى الافعال دى !
E.E
Eslam Elbahrawy
تصحيح قررت اعدل المنشور لكتابة ملاحظه المنشور زى ما هو .. لكن هاقول انى شوفت الفيديو على ماوقع تقول انه حديث ولكن اتضح ...Posted by Eslam Elbahrawy on 14 أبريل، 2015
