الغلابه فى مصر - بين حمدى اللى طموحه ساندوتش كبده وموبايل - وبين طيارين مصر للطيارين - حد عارف الغلابه عايشين ازاى؟



الغلابه فى مصر - بين حمدى اللى طموحه ساندوتش كبده وموبايل - وبين طيارين مصر للطيارين - حد عارف الغلابه عايشين ازاى؟



الغلابه فى البلد دى مابيعرفوش الغل ولا الحقد
مابيعرفوش الخيانه ولا بيع البلد مقابل كام جنيه 
بوست طويل .. بس لو قررت تقراه .. ياريتك تخليه معاه للاخر

الاسطى حمدى .. الطفل الصغير اللى فى الصوره دا .. طفل عنده 10 سنين .. صوره مصور وهو بيضحك .. الصوره انتشرت وعملت حاله كبيره على مواقع التواصل الاجتماعى .. ريهام سعيد قررت تعمل معاه لقاء 

امبارح .. وريهام سعيد بتعمل اللقاء معاه وبتشوف ازاى عايش وازاى بيفكر 
بالضبط .. فى جزء من اجزاء الحلقه .. ريهام سعيد اخدت 8 دقايق عشان تفهم اجابة حمدى على سؤال وبرضو فى الاخر مافهمتش 
عارفين ليه؟؟ لانها ماعاشتش مع الناس دى

ريهام بتقوله بتاخد كام ..؟ قالها باخد 40 جنيه فى الاسبوع
فبتقوله بتعمل بيهم ايه ..؟ قالها بجيب لبس
قالتله بتجيب لبس كل اسبوووع؟؟؟؟ فيقولها لا منا بجيب مره واحده فى العيد
تقوله امال ال 40 جنيه كل اسبوع بتعمل ايه بيهم؟ يقولها بجيب لبس 
وفضلت تكرر السؤال ووهو يقر الاجابه وبرضو مافهمتش
لان اللى زى دول ولا عرفوا الفقرا ولا عاشوا وسطهم 

الولد يقصد ...
انه بيشترى طقم واحد مره فى السنه فى العيد بس 
طب ايه حكاية ان الاربعين جنيه بيدفعهم كل اسبوع للهدوم برضو؟
اللى عاش فى مناطق شعبيه اللى فيها الناس على باب الله اليوم بيومه 
يعرفوا ان الناس دى بتجيب لعيالها هدوم مره واحده فى السنه و دا بيكون فى العيد .. بس الهدوم دى بتكون قسط .. لذلك .. بيشتروا الطقم او الاتنين .. ويفضلوا طول السنه كل اسبوع يدفعوا قسط 10 او 20 جنيه 
اه والله دا اللى بيحصل تخيل بقى !

الناس الغلابه فى البلد دى مستورين وسبحان الله رغم قلة الفلوس بس مش محرومين .. الشاب اللى زيى بيروح يجيب ساندوتش الكبده من محل تيك اواى ب 20 جنيه .. هما برضو عندهم اللى يبيع ساندوتش الكبده بجنيه ونص 
الشاب مننا بينزل يجيب البنطلون بمبلغ والتى شيرت بمبلغ وبيقول انا لابس على الموضه .. الناس دى برضو بتلبس..أينعم بالقسط وبتطفح الدم عشان تسد القسط بس بيلبسوا 

الناس دى عندهم كرامه اوى وعندهم عزة نفس اوى
الناس دى مش زى ما صورهالكم خالد يوسف انهم بيشربوا مخدرات وكلهم عندهم زنا محارم وبيبصوا على حريم الحته وهما بيستحموا من الشباك
الناس دى مش كده .. الناس دى ارجل كتييييير من ناس عايشه فى مناطق راقيه
الناس دى لو الواحد فيهم اخته اتعاكست ممكن يدخل السجن عشانها
عكس واحده زى ياسمين النرش اللى اخوها منزل بوستات على صفحته يقولك فيها ايه لما اختى تنزلها صور وهى بتشرب خمره ..كل الناس بتشرب وربنا يبقى يحاسبها !!!!

انا فاكر وقت حكم الاخوان .. كان فى سيده راحت تحضر وقفه ضد الاخوان وانضربت واستضافوها فى التلفزيون ... ووقتها الست قالت انا بيبقى عندى اليوم عيد لما بيجيب لاولادى رجول الفراخ .. وقتها الناس استغربت هو يعنى ايه دا؟؟؟؟
نزلت بوست وقتها قد يكون هو الاكثر تفاعلا على صفحتى على الاطلاق
قلت للناس ان رجول الفراخ والاجنحه بتاعت الفراخ دى بتبقى حلم عند ناس كتير ... فى ناس مش طموحها تاكل فراخ ولحمه .. لان هما نسيوها .. فى ناس بالنسبالها طبق رز وطبيخ واجنحه او رجول الفراخ معاهم .. دا كده يبقى وليمة الشهر !

عارفين .. مره شوفت موقفين ورا بعض
خلونى اقول .. احنا مانستحقش النعمه لاننا مش بنقول الحمد لله 
شوفت واحد بياخد الوفات مرتب ويقولك مش مكفيين اصلى بشرب سجاير اجنبى واصل الحاجه بتزيد واصل الحكومه دى مش نافعه ... رغم انه بيلبس احلى لبس وبياكل كل اكله ديلفرى 
بعدها بكام يوم 
شوفت موقف بعينى وحكيته للناس
كنت جنب محل فراخ .. ودخلت ست غلبانه قالت للراجل انها عاوزه رجول الفراخ المرميه عنده ومش محتاجها ..هتاخدها ببلاش .. والراجل وافق .. يا دوب الست راحت تشترى حاجه .. دخل شاب عاوز ياخد كيلو رجول الفراخ بخمسه جنيه يأكلها للكلب بتاعه .. الراجل باعله الحاجه .. ورجعت الست قالها معلش بعتها .. لو تشوفوا نظرة الحسره فى وشها وقتها ...؟ اقسم بالله ملعون ابو الدنيا واللى فيها لما تبقى فرحان انك هتاكل مخلفات حيوانات وتزعل لانك مش هتاكلها !!!

احمدوا ربنا واوعوا حد يقنعكم ان الغلابه ماعندهومش كرامه ولا عندهم انتماء
اوعوا حد يقنعكم ان زيادة اسعار او الجوع يخلى الناس تفجر وتقتل 
والله العظيم ما حد شال وشايل وهايشيل البلد دى الا الفقرا والغلابه
ومحدش نجح السيسي غيرهم
ومحدش بيدعمه زى ما هما بيدعموه 
الناس دى ماتعودتش انها تعمل حاجه مقابل لقمتها
الناس دى بتعمل بدون ما تستنى اى مقابل 

E>E
Eslam Elbahrawy

الغلابه فى البلد دى مابيعرفوش الغل ولا الحقدمابيعرفوش الخيانه ولا بيع البلد مقابل كام جنيه بوست طويل .. بس لو قررت تقر...
Posted by