بالصور - مفاجأه - تجميد الانسان فى فيلم مصرى من 31 سنه - ومفاجاّت اخرى عن الفيلم وابطاله
تجميد الانسان .. فى فيلم مصرى من 31 سنه !!!
مؤلف رواياته تدور عن العالم الاخر وتنتهى معظم رواياته فى القاهره عام 2100
=================
** كل شويه بنتفاجىء ان احنا مش قليلين
بنتفاجىء ان زمان فى مصر العلم والتفكير والثقافه كان شأنهم عالى اوى
فاكرين لما اتكلمنا عن مسلسل توفيق الدقن وحسن عابدين (نهاية العالم ليست غدا )
واكتشفنا انها تم عمله فى فترة التمانينات وكان بيتكلم عن تلوث الهواء والغزو الفضائي للارض !! واتقال حاجات جوا المسلسل فوجئنا انها حصلت بعد 40 سنه فعلا
( للاطلاع بالتفصيل عن المسلسل وقصته ابحث فى جوجل تحت عنوان :
مفاجأه بالفيديو والصور - مسلسل مصرى انتاج عام 1983 يتحدث عن صناعة الماسونيين للكوارث الطبيعيه وسيطرتهم على العالم بالتكنولوجيا
==============
** النهارده هانتكلم عن فيلم مهم جدا
صديق ليا شافه بالصدفه وكلمنى قالى لازم تشوفه
الفيلم اسمه قاهر الزمن
بطولة عباقرة و أباطره للفن المصرى
نور الشريف و جميل راتب واثار الحكيم وخالد ذكى وحسين الشربيني
*** الفيلم انتاج 1987 ***
** عن رواية صدرت عام 1972 !!!!
** بيحكى الفيلم قصة صحفى ( نور الشريف ) بيعمل ابحاث فى الفلك فى مرصد حلوان الفلكى لانه عاوز يربط بين الفلك والتحنيط والبعث عند قدماء المصريين !!!!
** بالصدفه تحصل احداث لواحد من اقاربه الصحفيين برضو
تخليه يتقرب من دكتور بيعمل تجارب معينه على البشر
وبيبتدى نور الشريف يحوم حول الدكتور عشان يعرف نوع التجارب دى
** بعد كده بيكتشف ان الدكتور مراته ماتت بمرض بسبب تأخر اختراع علاجها
فقرر الدكتور انه يبتدى يشتغل على فكرة تجميد الانسان وخلاياه بشكل معين
بحيث لو الانسان مريض وعلاجه لسه هايتم تصنيعه كمان 20 سنه
يتم تجميد الانسان لمدة 20 سنه لحد ما يتم صنع العلاج دا
** الصراع فى الفيلم ماكانش فقط صراع بين العلم والانسانيه
لان الدكتور كان بيعمل تجارب على ناس وبتموت
وهنا كانت الحيره بين ان يموت عدد قليل فى سبيل تحقيق الانجاز دا
ولا نوقف التجارب
لكن كان فى صراع تانى
وهو ان احد مساعدى الدكتور ( ممرض )
كان راجل غير متعلم
فكان طول الفيلم متوجس ان اللى بيتعمل كُفر بالله
لان فى اعتقاده ان الدكتور بيسحب الروح و يردها تانى
============
** فى احد المشاهد
الدكتور ( جميل راتب ) بيشرح الفكره
بيقول انه مش بيتدخل فى قدر الانسان وبيقرر امتى يموته وامتى يحييه
هو بيستخدم قدرة ربنا اللى اعطاها له ( الذكاء العلمى )
فى تطويع خلايا الانسان وتجميدها للحفاظ عليها بالتجميد
ولما بيتم فك التجميد دا .. ويرجع الجسم لحرارته الطبيعيه
بتبدأ اعضاء الانسان تشتغل تانى زى ما كانت
============
بيظل الصراع قائم بين العلم والدين من وجهة نظر الممرض او مساعد الدكتور
بيحصل حادث لخالد ذكى .. وكان على وشك الموت
بيقرر الدكتور يعمل عليه التجربه . وبالفعل بينجح فى تجميده
وبيجمد نزيف المخ اللى جاله . لحد ما يقدر يوصله للمستشفى واتعالج وعاش
============
وبينتهى الفيلم نهايه غريبة اوى
وكأن دا كان الهدف من الفيلم وقتها
لان فترة التمانينات وبداية التسعينات كانت هى الفتره المسيطر فيها الفكر الجهادى الارهابى على مصر .. فكانت فكرة الفيلم قايمه على الصراع بين العلم الغير محرم او غير مخالف للشريعه و لربنا .. وبين الناس اللى بتستغل الجهل عشان تحرم اى تقدم علمى
=============
نهاية الفيلم
ان الممرض بيسيطر عليه احساس ان اللى بيحصل كُفر بالله
بيدخل يكسر المعمل ويحرقه
وبيقتل الدكتور وبيتهد البيت كله بالمعمل
========
لكن اخر مشهد فى الفيلم
كان اثناء خروج نور الشريف واثار الحكيم وحسين الشربيني اللى كان دكتور برضو مشرف على التجربه .. وهو ماسك فى ايده كتاب التجارب اللى قدر ينقذه قبل البيت ما بيتهد
والكتاب اسمه ( الخليه الحيه - 180 تحت الصفر )
وبيقفل الفيلم فى مشهد من القاهره عام 2110
ومستشفى عين شمس اصبح فيها اقسام للتجميد زى باقى الاقسام عادى
فى اشاره ان القاهره فى المستقبل اصبح العلم فيها منتشر والجهل انتهى
وكأن المخرج عاوز يقول ان كل محاوله لهدم اى شىء بإستغلال الجهل..بيقدر المصرى يواجهها وبينقذها وبتستمر !
لكــــــــــــــــن اخر لقطـــــــــــــــــه دى اللى دفعتنى لكتابة البوست دا كله
ان والفيلم بيقفل وجايبين قسم التجميد وفى مريض متجمد داخل العمليات
مغطيين جسمه بغطاء فرعونى و وشه متغطى بقناع توت عنخ امون !!!!!!!!!!
=============
الفيلم سنة 87
فترة التمانينات الغنيه بكنوز فنيه .. ياترى اليومين دول حد يقدر يعمل حاجه زى دى؟
الغريب ان فى الوقت دا كانت فكرة الفيلم ( خيال علمى )
و دا اللى بيتكتب فى بداية الفيلم ان القصه خيال علمى من خيال المؤلف
و الايام دى بنسمع فعلا عن محاولات لعمل تجارب زى دى !!!!
مؤلفين الافلام والمسلسلات دى فى الفتره دى
ياترى كانوا عارفين ايه احنا مانعرفوش
ياترى كان على وقتهم بيتدرس ايه واتمنع يتدرس فى جيلنا ؟
ياترى كان متاح لهم كتب ايه يتثقفوا منها واتمنعت او اختفت عننا ؟؟؟؟؟؟؟
===============
الفيلم تأليف
أحمد عبدالوهاب (سيناريو وحوار) نهاد شريف (قصة وسيناريو وحوار)
اخراج كمال الشيخ
انتاج محمد العدل
=====================
نقطه اخيره عن المؤلف
نهاد الشريف كان رائد الخيال العلمى
اتولد 1932 و توفى عام 2011
له روايات غريبه وكلها عن العالم الاخر والفضاء
زى سكان العالم الثانى - رقم 4 يأمركم - الشىء - انا وكائنات الفضاء -
والغريب ان رواية قاهر الزمن ختمها وهو بيتخيل المستقبل فى القاهره عام 2110
وكذلك رواية سكان العالم الثانى تدور احداثها عام 2099 !
كذلك له روايه تحولت لسهره تلفزيونيه ( الماسات الخضراء )
او الماسات الزيتونيه تبدأ القصة بتساؤل أحد الأطباء، يدعى (عبداللطيف )، عن إمكانية حث الكلى على إنتاج الماس، بعد تجارب عديدة ينجح في إنتاج الماسات الصغيرة من كلى مرضاه الفقراء بدون علمهم، ورغم أنه حقق ثروة طائلة من هذا العمل إلا انه لم يُجرب إنتاج الماسات الكبيرة، في النهاية يُقرر إنتاج الماسة الكبيرة من كليته هو ولكنه يموت حين تنفجر كليتاه فجأة
=========
اسف للاطاله واتمنى اكون قدمت معلومه مفيده :)
E.E
Eslam Elbahrawy
