رساله للاعلاميه رانيا بدوى - بعد دفاعك عن احمد دومه - ماذا لو كان المصاب ابنك؟
بسم الله الرحمن الرحيم
طبعا كالعاده بكتب الملاحظه بس معرفش الناس الموجه لها الملاحظه هاتشوفها ولا لأ .. وان كان فى كثير من الاحيان الكلام بيوصلهم من خلالكم ومن خلال تفاعلكم .
رساله الى رانيا بدوى
الاستاذه الاعلاميه رانيا بدوى مقدمة برنامج القاهره اليوم
بالامس حضرتك كنتى بتتكلمى عن الحكم اللى صدر ضد احمد دومه
وحضرتك قولتى بالنص .. ان الشباب مقهور وان لازم الدوله تحسسهم انهم ليهم قيمه فى البلد وان الشباب دا اتظلم والشباب دا عمل ثوره .. وكمان حضرتك قولتى ايوه خلاص هما غلطوا ولكن الدوله الجديده اللى بتتبنى ماينفعش نعمل فيها اقصاء لحد .. كان كافى اوى ان الدوله والرئيس يقولوا للشباب دول ايوه انتوا حرقتوا وولعتوا واللى عملتوه دا غلط ويعرفوهم غلطهم ويطلعوهم من السجن ويبتدوا يتحدوا معاهم لبناء مصر الجديده مره اخرى !
سيدتى الفاضله .. انا بس عاوز اسأل حضرتك سؤال
انا بسمع الاستاذ عمرو اديب دايما يناديلك فى البرنامج ب ( ام ياسين )
هو سؤال بسيط اتمنى حضرتك تجاوبينى عليه
يا ترى رانيا بدوى لو ماشيه بعربيتها بتوصل ياسين للمدرسه ووسط مظاهره من بتوع احمد دومه بيحدف مولوتوف وبدل ما ينزل على المجمع العلمى نزل على عربيتك وابنك اتصاب او توفى لا قدر الله !
هل كان كلامك هايكون ان دومه شاب طاهر بس غلط والمفروض مش نحاكمه ونحط ايدنا فى ايده
سؤال تانى لحضرتك
رانيا بدوى لو مش اعلاميه .. لو مجرد ست بيت مصريه وغلبانه
وجوزها ابو ياسين بيشتغل جوا المجمع العلمى وبياخد مرتب يصرف بيه عليكى وعلى ابنك .. وفجأه الجمع العلمى اتحرق .. وجوزك اتشوه وقعد من الشغل وبقيتوا مش لاقيين تاكلوا ولا تأكلوا ابنكم
هل ياترى كنتى هاتقولى دول شباب طاهر وياريت نعديهالهم !؟
استاذه رانيا دولة القانون لا تعترف بالعواطف والقانون مافيهوش معلش
انتوا نفسكم .. الاعلاميين اللى هاجمتوا مبارك .. قولتوا ايوه الراجل اول سنين حكمه كان كويس ولكن له اخطاء لازم نحاكمه.. ولما محبى الرئيس مبارك قالولكم نفرج عن الراجل عشان ظروفه الصحيه وكفايه اللى عمله عشان البلد ..قولتوا ازاى.. ماينفعش.. كون انه عمل حاجه حلوه للبلد .. دا مايمنعش ان القانون يحاسبه على اخطاءه ! .. مش كده برضووو...؟
طيب ما بالك دا كان راجل رئيس جمهوريه وبطل من ابطال حرب اكتوبر ومحدش قدر يثبت قانونا عليه اى شىء .. فهل ينفع نيجى عند شاب اتخذ من كلمة ثوره غطاء للهمجيه والفوضويه .. واعترف علنا على شاشات التلفزيون انه حرق المبانى الخاصه بالدوله .. وانه كان بيخطط لخطف ضباط .. ونقول نعطيه براءه !
اذن.. يا سيدتى الفاضله لماذا الكيل بمكيالين
سؤال اخير اتمنى الرد عليه من سيادتك
هل القانون بيعاقب على الفعل ولا بيعاقب كمان على التخطيط للفعل؟
يعنى... لو ارهابى فجر قنبله واتمسك بيتحاكم
لكن برضو لو اتقبض عليه وهو فى شقته بيخطط للعمل الارهابى برضو بيتحاكم
طيب .. لو حماس او داعش دخلت القوات المسلحه احد اوكارهم وقبضت عليهم ووجدت معاهم خطه بيخططولها عشان يخطفوا ضابط مصرى؟
وقتها حضرتك هاتقولى ايه؟؟ هاتقولى هم ابرياء مادام لم يخطفوا الضباط بعد
ولا هاتطلعى تقولى ارهابيين وقتله ومجرمين ويجب محاكمتهم
اذن.الامر سواء بالنسبه لدومه الذى اعترف على التلفزيون امام الجميع انه خطط لخطف جنود وضباط اثناء تلك التظاهرات !
اذن .. وللمره الثانيه اسأل
لماذا الكيل بمكيالين !!!
احمد دومه وبغض النظر عن كل شىء .. عندما يمثل امام القانون فهو مجرد مواطن له ما له وعليه ما عليه
واذا كان له شىء فهذا يخصه
ولكن اذا كان عليه شىء يضر بالدوله وممتلكاتها فلا اعتقد انه يجب ان تتحدثى بالنيابه عنا نحن الشعب المصر لتطلبى الافراج عنه..لان المجمع العلمى وباقى الممتلكات هى من عرق المواطن المصرى ونحن فقط اصحاب الكلمه فى من يدان او لا يدان ولم ولن نعطى احد توكيلا للتحدث بإسمنا
اتمنى ان تصلك الرساله
لا اعلم كيف ستصلك ولكنى يكفينى ان اعبر عن حال الكثيرين من ابناء وطنى
تجاه ما ذكرتيه بالامس
E.E
Eslam Elbahrawy
منشور by Eslam Elbahrawy.
