نقطه ومن اول السطر - رأيى الشخصى فى ازمة وزير العدل وابناء عمال النظافه



نقطه ومن اول السطر - رأيى الشخصى فى ازمة وزير العدل وابناء عمال النظافه 

طيب نقول بسم الله

يمكن خلال اليومين اللى فاتوا انا ماعلقتش على موضووع وزير العدل لان اى حاجه فى اولها بتبقى سخنه والاراء بتتخبط وكل واحد بيتعصب لرأيه و دا بيعمل مشاكل خصوصا لما يكون الكلام يخص شىء عاطفى وقتها بيكون الحكم صعب هل الحكم يكون بالعقل ولا القلب 

بالنسبه لرأيى المتواضع واللى اكيد مالوش قيمه جنب اراء ناس كتير 
انا شايف ان الوزير صح وبرضو الوزير غلط 

معلش استحملونى لو البوست طويل لكن انا حبيت افكر بعقلى رغم ان انا اكتر واحد بيكتب عن الناس الغلابه فى البلد دى وبكون دايما بقلبى وعقلى معاهم لانى ببساطه واحد منهم وعايش وسطهم 

انا كان ممكن اعمل زى كتير عملوا 
يا عم ريح دماغك .. خاف من هجوم الناس .. امشى مع التيار
مش هاتخسر حاجه هما كده كده مشوا الوزير 
لكن .......فى حاجه اسمها الضمير وتقدير الذات

شوفوا..
الوزير غلط 
لان اى انسان له كامل الاحترام والتقدير وايا كانت المهنه مادامت لا تغضب الله ولا تخالف القانون فهى مهنه شريفه لا تعيب صاحبها .. المفروض ان حتى يا سيدى لو دى الحقيقه واحنا والناس الغلابه عارفينها ..برضو ماتطلعش تقولها على الملأ وتراعى شعور الناس 

اما الوزير صح ليه 
هاحاول اختصر كلامى فى نقاط مرقمه عشان اسهل عليا وعليكم 

1- فى مهن كتير يا جماعه الاصل فيها مش بيبقى المؤهل والدرجه العلميه وبس .. فى حاجات تانيه بتحكم المهن دى ومش معنى انك غير لائق لها انك وحش ولكن ... زى بالضبط ما اجيب مهندس اقوله اشتغل محامى !
فى حاجات ماتنفعش سواء كان السبب علمى او اجتماعى 

2- مهنة القاضى او وكيل النيابه حساسه جدا جدا لذلك انت لازم تبص للقاضى او وكيل النيابه وتشوف البيئه المحيطه بيه .. مين اصدقاءه؟ مين اهله؟ اتربى ازاى؟ عاش ازاى؟؟ شبعان ولا لا ....؟ 
وبالمناسبه الجوع والفقر مش عيب احنا كلنا ولاد تسعه وطالع عينينا 
لكن فى حاجات بتفرق فى الوظيفه من حيث تعامل الشخص معاها 

3- موقف هاحكيه واصدقائى المقربين هايعرفوه ويفتكروه 
شاب بيقعد معانا فى القهوه عرفناه كده من بعيد لبعيد وهو اصغر مننا 
كان من اسره عاديه ودخل كلية شرطه .. كان لسه وهو طالب فى سنه تانيه كل ما ينزل اجازه يقولك انا؟ ودينى لاطلع عين الناس ..انا هابقى اول واحد يوقف البنات وياخدها تحرى .. دا انا عايش ( طول عمرى شايف الضباط متحكمين ) وجه اليوم ابقى زيهم واعمل كل اللى فى نفسى .. بقينا نقوله اهدى انت لسه صغير والحياه مش كده..كان بيتنطط على خلق الله وكان اسلوبه قذر.. بعدها بشهرين والله اتفصل من الكليه .. فكر انه خلاص خرج من عباية العيله المتوسطه وبقى ضابط وهو لسه طاااالب .. راح مكان عام وكان معاه بنت وكان قاعد قعده مش مظبوطه ..ضابط شرطه معدى بيقوله عيب وبتاع راح شاتم الضابط..وما كان من الضابط الا انه سلمه للكليه وعمله محضر واتفصل الباشا .. ليه؟؟ لانه ماكانش مستوعب اللى هو فيه وطلع من عبايه صغيره ولبس عبايه كبيره عليه 

4- موقف تانى 
ليا صديق محامى روحتله المحكمه فى يوم من كام شهر كده .. وكان اليوم دا النائب العام جاى طنطا يجتمع بوكلاء النيابه 
واقفين جوا المحكمه ولقينا طقم وكلاء النيابه طالع ..شباب فى سننا بس ايه دا حاجه تفرح 
بقول لصاحبى يا نهار ازرق ايه الهيبه دى؟ قالى هما كده ياعم ليهم هيبه وشكلهم يفرح
فبهزر بقوله انت داخل التحقيق طب ما تدى لوكيل النيابه الف جنيه وخليه يبوظ القضيه وضحكنا
لقيته بيقولى الف جنيه ؟؟؟ انت عارف البدله اللى لابسها لوحدها بكام؟؟ دى فوق الخمس والسبع الاف جنيه
العيال دى شبعاااااااااااااااااااااااااااااااااااااااانه ومش محتاجين فلوس دول هدية التخرج عندهم بتكون العربيه فمش محتاج يكون مرتشى !

5- زى ما قال عمرو اديب مثلا امبارح بقى
تخيل لو حد نفسه ضعيفه وماديا مش قادر ازاى هايكون واجهه اجتماعيه
بلاش دى 
تفتكر لو بيحقق مع متهم تاجر مخدرات وعرض عليه مليون واتنين رشوه مش ممكن يضعف؟
لانه محتاج ومش عايش عيشه مرفهه واول مره يسمع مبلغ زى دا !!!!!؟

6- ننتقل لمثال تانى
هو مين مخلى سمعة الداخليه زى الززززفت ....؟ 
ومين خلاها زفت اكتر مؤخرا بعد ما اخدوا حق ضبطيه قضائيه؟
ايوه الله ينور عليك امين الشرطه 
مش كلهم اكيد بس الاغلبيه ودى حقيقه ..
امين الشرطه دا نفس المثال اللى بنتكلم فيه 
هو دخل المعهد وخرج عشان يرازى فى خلق الله ومن طبقه مش عاليه ماديا ومش بتكلم اجتماعيا كمان
وبتكون النتيجه اااايه؟؟؟ النتيجه انه بيفترى وبيستخدم سلطته بشكل سىء لان هوا باصص طول عمره للضابط اللى فوقه ونفسه يتحكم زيه .. بدليل .. عمرك دخلت قسم و اديت للضابط خمسين جنيه عشان يقطع محضر؟؟؟ 
اكيد لا..لانه مش محتاج الخمسين جنيه
انما تعالى .. مين فينا ماظرفش امين الشرطه خمسين جنيه وساعات عشرين عشان يغير محضر وعشان يظبط متهم فى الحجز .. تخيل لو طلعت قرار خليته يترقى لرتبة ضابط؟ دا ممكن يستخدمها ازاى.........؟

7- تعالى لنقطه تانيه .. الحسابات الشخصيه
دلوقتى فى ولد والده ايا كان العمل اللى بيسموه غير لائق اجتماعيا والولد دخل نيابه
هوب بقى وكيل نيابه وحب بنت والدها مستشار مثلا او رجل اعمال
وراح يتقدم ماهو وكيل نيابه بقى .. قام والد البنت قاله انت اه مؤهلك وشغلك كويس بس العيله اجتماعيا مش مناسبه
تفتكروا وقتها وكيل النيابه دا مش هايكون حاقد وزعلان وكاره المجتمع؟؟
طب .. لو والد البنت دا راحله ممسوك فى قضيه تفتكروا هايحكم عليه بالعدل
ولا هايفتكر العقده اللى سببهاله وهنا تتدخل الامور الشخصيه فى الشغل !!!!!!!!؟
دا الواحد مننا يروح يتقدم لبيت مناسب له ولما بيترفض بيكره ابو العروسه اللى رفضه !

8- بصوا يا جماعه انا والله عارف ان الناس الغلابه احسن مننا مليون مره
وعارف ان اللى بنقول عليه بتاع زباله دا فى اوروبا بيحترموه وبيقدروه وبيتقال عليه عامل نظافه لاننا احنا الزباله واحنا اللى بنرمى الزباله بس صدقونى الامور مش بتقاس بالمبدأ دا 
ونفسى تكونوا صرحاء مع نفسكم .. و ايوه هاسأل نفس السؤال .. لو اتقدم لبنتك هاتوافق؟
اقسم بالله ابدا مش هاتوافق ...
انا عندى اخت بنت وبقعد مع عرسان وعارف التفكير ازاى والامور بتمشى ازاى
انت بتبتدى تفكر مؤهله مناسب لها او لا ..؟ ثم شغله ومرتبه وشقته لو دول كويسين
بتدخل عالسؤال رقم 2 .. بابا بيشتغل ايه.......؟
وتبتدى تفكر .. هانكتب ايه فى كارت الدعوه .. فلانه بنت فلان وفلان ابن فلان ووظيفة كل اب.؟
صدقونى كلنا على الانترنت بوش وفى الحياه بوش تانى
عالانترنت بنسب ونلعن فى الحكومه عشان الباميه وفى الحياه بنروح نشتريها وعادى وبنساعد التجار على جشعهم
على الانترنت بنقول لا من حق كل الناس تتعين وانا لو جه لبنتى هاجوزهاله وهو مش بنى ادم ولا ايه
وفى الحياه .. اقسم بالله ما حد فيكم بيبتسم فى وش الراجل الغلبان دا 

9- واجهوا نفسكم بالحقيقه 
العواطف لوحدها مش بتخرج قرارات كويسه 
دى مناصب سياديه بتتحكم فى احكام وارواح ناس 
بيتعرض فيها الرشوه والمغريات والنفوذ 
ولو اللى اخد كل دا مش كويس ونفسه مش سويه وعنده نقص مادى او اجتماعى او نفسى .. اكيد هايعمل بيهم حاجات تودى فى مصايب

10- ايوه اكيد فى ضباط وقضاه ووكلاء نيابه بيعملوا مصايب
بس لو قيستها هتلاقى النسبه هاتكون اعلى كتير 
مفيش مكان مافيهوش الوحش بس انت بتحاول تقلل النسبه 

11- انا مش مع ان ابن القاضى يبقى قاضى ونقتصر دا على القضاه وولادهم بس
بس برضو مش مع انها تبقى سداح مداح 
انا مع اننا نقننها بشروط اجتماعيه وعلميه معينه 

12- انا قلت جايز اكون غلط 
ولو رأى الناس اللى شايفه غير كده صح 
يبقى نتكلم العدل بقى
معلش ماهو لو ناوى تدخل كل الناس نيابه بناء على المجموع
ازاى تخلى كلية حقوق 70 %؟
عاوز تعملها صح..خلى الكليه 90 او 95% زى كليات القمه
بحيث اللى يوصل للكليه معروف انه ذاكر واجتهد ولما يجيب امتياز فى الجامعه يبقى بحق
انما .. العب طول السنه واحل نص الاسئله واجيب 70% وادخل حقوق
وبعدها ماحضرش فى الجامعه واغش واجيبلى تقدير وكلنا عارفين ان فى ناس بتجيب امتيازات بالغش..والاخر ادخل نيابه وانا غير مؤهل علميا ولا اجتماعيا ولا ماديا ...؟

13- انا قلت وجهة نظر اكيييييييييييييد كتير هايعارضوا لان احنا شعب عاطفى
انما فى حاجات مش بالعاطفه 
كل الاحترام والتقدير لكل الناس وكل المهن وكل الطبقات
ومن حقهم يعيشوا احسن مننا كمان 
لكن احسبها بالعقل من كل جهه مش بس بالقلب

اسف للاطاله
احترامى للجميع

E.E
Eslam Elbahrawy

طيب نقول بسم اللهيمكن خلال اليومين اللى فاتوا انا ماعلقتش على موضووع وزير العدل لان اى حاجه فى اولها بتبقى سخنه والارا...










Posted by