كيف يتم هدم الاسرة العربية من خلال برامج المسابقات؟
تجربه واقعيه جدا
قناة ام بى سى مصر تحرض على الهدم دائما
بس يا سيدى
فقلت اقوم اتغدى وافتح التلفزيون يسلينى وانا باكل
لقيت قناة ام بى سى بتذيع برنامج اسمه
لحظة الحقيقة
ايه فكرة البرنامج؟
** حضرتك بتروح انت واصدقاءك واسرتك والبرنامج بيجمع عنك معلوماتك كلها واى معلومة يقدر يقولها اصحابك ومراتك عنك ..
** وبعدين حضرتك بتقعد على جهاز لكشف الكدب...
كل سؤال بتتسأله قيمته 2000 ريال
** لو الاجابة صح تمام
لو اتسألت سؤال وقلت اجابه غير اللى فى عقلك
جهاز كشف الكدب اللى انت قاعد عليه بيكشفك وبتكون اجابتك غلط وبتخسر
لذلك انت مضطر تجاوب صح غصب عنك..لا مفر
** المشكلة فى البرنامج ايه بقى؟
انك كده كده بتجاوب غصب عنك
بمعنى ايه
يعنى مثلا جالك سؤال هل سرقت قبل كده؟
لو انت سرقت فعلا قبل كده
وجيت قلت نعم..؟ خلاص اجابتك صحيحة
طيب لو سرقت وقلت لا؟؟ الجهاز هايكتشف كدبك
وبالتالى هاتكون اجابتك غلط..بس برضو هايكون الناس عرف انك سرقت..لان الاجابة لما تكون لا وغلط؟ يبقى اكيد سرقت
انتوا فهمتوا القصة يا شباب؟
سواء جاوبت صح انت فضحت نفسك
جاوبت غلط الجهاز هايقول غلط وبالتالى فضحت نفسك
** المهم حلقة امبارح شاب فى مقتبل العمر قاعد
وجاى معاه مراته اللى متجوزها من 6 سنين وصاحب الشغل بتاعه
** وفجأة بدأت الاسئلة
1- هل فى شهر عسلك حسيت انك اتدبست فى مراتك ؟
نعم ( وكانت الاجابة صحيحة )
2- هل خلعت دبلة جوازك مرة عشان تبان انك اعزب ؟
نعم ( وكانت الاجابة صحيحة )
3- هل انت راض عن حجم جسم زوجتك؟
لا .. ( وكانت الاجابة صحيحة )
4- هل سرقت شىء من شغلك قبل كده؟
نعم ( واجابته صحيحة وماتنسوش ان صاحب الشغل بتاعه قاعد فى الحلقة )
5- هل فى سر لو عرفته مراتك هايدمر حياتكم الزوجية؟
نعم ( اجابة صحيحة 9
6- هل تعتبر ان امك والدة جيدة؟
لا ( اجابة صحيحة )
***** اخيرا
شوفتوا الخراب اللى حصل فى الحلقة
شوفتوا المهزلة الاسرية اللى حصلت
شوفتوا استغلال الغلابة اللى محتاجين فلوس
يتخرب بيتك مع مراتك..وصاحب شغلك يعرف انك حرامى..وقصاد الملايين تقول ان امك مش ام جيدة
وكل دا عشان كام الف ريال لانك محتاج ومش لاقى
** انا مش هاقول مخطط وماسونية والفيلم دا
بس هاقولكم استوعبوا شكل اللى بيتقدملكم
الله يرحم ايام زمان
لما كان طارق علام يقف يسأل سؤال وفيه معلومة وتشغيل دماغ
ولو جاوبت وانت واقف بتاخد جنيه دهب
الله يرحم التلفزيون المصرى زمان
لما كان يسألك سؤال فنى او ثقافى واحد
ولو جاوبت تاخد رحلة عمره او حج
انما دلوقتى
لازم تتكلم عن مراتك وامك وتفضح نفسك
عشان تاخد فلوووووس
** اهم حاجة
ان الفنان السورى مقدم الحلقة بعد كل سؤال
يبص للزوجة ويضحك فى سخرية
ويقولها عادى كل الازواج كده ماتزعليش
لان برنامجنا هدفه الربح مش خراب البيووووووت
للى مش متخيل
شوفوا حلقة كمثال
ماقدرتش اجيب حلقة امبارح لانها لسه ماترفعتش
E.E
Eslam Elbahrawy
