هل صليت على النبى اليوم ؟ هل ذكرت البابا اليوم ؟
الحساب بقى على الارض ومش هانستنى يوم القيامة
وجهة نظر
فى السريع .. هل صليت على النبى اليوم ؟
1- ماعنيش مشكلة فى الصلاه على اشرف الخلق
2- ماعنديش مشكلة ان دى تبقى حمله غرضها الذكر والتسبيح حتى لو اللى عاملها الاخوان
3- انا عندى مشكلة ان احنا شعب مش متدين بطبعه اصلا والورقه دى مش هاتغير كتير لان الشاب لما بيشوفها فى الشارع بيرفع عينه للورقه ويقراها ويقول ( عليه الصلاة والسلام ) وبعدين ينزل عينه يبص على جسم البنت اللى معديه جنبه
4- انا عندى مشكلة ان يتم استخدام الموضوع سياسيا وانك تكون عامله عشان تخالف قانون الملصقات فى الدولة ولما يجى ضابط مرور يشيل الورقه من عربيتك تكون انت كإخوانجى بتصور بالموبايل وبتقول شرطة الانقلاب الكافره بتحارب كلام الله
5- انا عندى مشكلة انك هاتحول المجتمع لمجتمع طائفى
بمعنى ان الاول العادة كانت بتقول
ان السواق المسلم بيكتب بقلم او الدها ن بخط رفيع ..بيكتب لا اله الا الله محمد رسول الله..بيكتب كل هو الله احد..بيكتب قل اعوذ برب الفلق...
والسواق المسيحى تلاقيه على تابلوه التاكسى حاطط صور صغيرة بتتلزق على التابلوه للعذراء مريم او لاى رمز مسيحى اخر
وكنا بنخلص على كده
انما دلوقتى هاتحطلى صورة ملزوووقه على التاكسى..هاييجى المسيحى يلزقلك صورة البابا على التاكسى وبقينا بدل ما نقول للتاكسى رايحين فين..هانختار نشاور للتاكسى المسلم ولا المسيحى
6- حملة هل صليت على النبى اليوم لما شمينا ريحة اخوان وسلفيين وراها؟
فكرتنى بنفس اسلوب الاخوان فى التسعينات لما مبارك ماكانش عاوز شعارات فى البرلمان بصيغه دينيه فخرجوا علينا برضو بشعار الاسلام هو الحل وهنا حطلك السكينه فى نص ضهرك ..انك ماتقدرش تشيل ملصق او صورة لمرشح برلمانى شعاره الاسلام هو الحل..انت بتعترض ان الاسلام الحل وال اااااااااايه؟
7- فى اشخاص بعينهم .. اول ما تلاقيهم بيشكروا فى موضوع لازم تعرف ان الموضوع دا مشكوك فى امره
فلما يخرج علينا الاسطى عمر عفيفى يقولك اياكم تقربوا من حملة الصلاه على النبى وان دا خطر وان داخلية الانقلاب والسيسي الكافر بيقف قصاد ذكر النبى؟
لازم هنا تقف وتفكر وتشوفز. بقى الخاين العميل اللى نايم فى حضن امريكا جاى دلوقتى بيتكلم عن الاسلام وذكر النبى؟
لازم تعرف ان الحكاية فيها .......؟ فيها فيل !
8- انا شخصيا مش مع اختراع جملة مقابله ترد على حملة ذكر النبى
بمعنى اننا نخترع جملة هل دعيت على الاخوان اليوم ودا لسبب بسيط وهو ان الاخوان خلاص اتمسحوا والناس بدأت تنساهم واصبح مالهومش وزن فى الشارع..انما لما ترجعهم وتخليهم ند ليك وتتكلم عنهم وتعملهم حملات دا بيكتر ذكر اسم كلمة اخوان وبالتالى بيخلى اسمهم يعود فى الشارع ودا هايخلق وقهم انهم مازالوا موجودين وليهم قيمه وحجم ووزن فى المجتمع
9- انا شخصيا بقى اتمنى حاجة
ودى ناقشنى فيها صديق وماعرفتش ارد عليه لانى بصراحة بشوفها كتير
الصديق قاللى؟ هل لما واحد يعدى حاطط صورة هل صليت على النبى اليوم ؟ اكيد هاييجى ضابط المرور يشيلها بحكم قانون المرور؟ قولتله اه
قالى طب هل يجرؤ ضضابط المرور ان العربية اللى بعدها على طول عربية ضابط وحاطة صورة نسر على الازاز من ورا.. او عربية مواطن وحاطط بوستر السيسي؟ هل هايجرؤ يشيلهم؟
قولتله وبكل بساطة..بصراحة اشك
انا اسف لصراحتى بس انا شايف كده
لذلك انا بتمنى من ضباط المرور تطبيق مبدأ المساواة .. سواء ملصق اسلام او مسيحى او سياسى او فنى او ايا كان الملصق لازم يتشال بحكم القانون ووقتها مايقدرش كلب اخوانجى يقول حاجة
وجهة نظر وبالنسبالى مات الكلام
E.E
Eslam Elbahrawy
منشور by Eslam Elbahrawy.
