من الكافيه للمطعم للمارلبورو الاحمر
واخر السهره الله يخربيتك يا حكومه البنزين اسعاره نار
واقع نعيش فيه
يلا بينا يا شباب
يلا بينا يا سيدى
هانقعد فين؟
مش عارف.. ماتيجوا نقعد فى كافيه ( ... ) ؟
اوك تمام
جوا كافيه ( ... ) الكبير المحترم الكلاس
- ها هاتطلبوا ايه؟
انا عاوز شيري كولا .. وانا عاوز كابتشينو ... والاخ دا عاوز شاى خوخ
وانت يا عم اسلام؟؟
مممم .. هاتولى يابنى موخيتو لحد ما اخلص تليفونى و اّجى !
بعد ساعة
الحساب يا بوب لو سمحت
ايه دا؟؟ 130 جنيه؟ والله يا بلاش يا جدعان
النهاردة الحساب حلو اوى
يلا كل واحد يجيب حسابه
وبيدفع كل واحد حسابه وفوقه 5 جنيه تبس !
يلا بينا بقى نطلع من هنا
عاوز اروح كافيه بلدى من بتوعنا بقى
عشان عاوز اشرب كوبايه شاى تقيله قبل الفجر يا اخواننا
اه والله عندك حق يا بحراوى..يلا بينا
بس استنى فى سكتنا نجيب علبتين سجاير
نعدى على الكشك .. هات ياعم علبتين LM احمر
العلبة ب 13.. اديله يابنى 26؟
لا يا استاذ عاوز 30 ؟
ليه ياعم؟
كده اصلها غليت يا عمنا .. من 13 ل 15
اديله ياعم 30 .. يلا شر لابد منه هانعمل ايه !!
نروح الكافيه المحترم
نطلب 5 شاى
نقعد ساعة
واحنا قايمين نحاسب.. خد يابنى 10 جنيه اهى؟
لا يا باشا.. عاوز خمسه جنيه كمان؟
ليه ياعم؟
معلش اصله بقى ب 3 مش ب 2
اصحابى : ماشى يا بحراوى انجز ماجاتش من جنيه ولا اتنين زيادة..اديله ياعم الخمسه جنيه خلينا نمشى
اخر الليلة نروح نحط بنزين !
حط يابنى 10 لتر 92
خد يا سيدى .. 18 جنيه ونص
لا يا باشا البنزين غلى..انا عاوز 26 جنيه
يا نهار اسود ومنيل.. اللتر زاد 75 قررررش
يا جدعان والله كده كتير.. احنا عندنا بيوت وعيال والمصحف
احنا اتخنقنا بقى.. كل دى زيادة !!
وهنا ... وفى تلك المومنت
ارجع براسى على الكرسى
وافتكر ان اصحاب العيال اللى فاتحين بيوت وبيشتكوا من غلاء 75 قرش فى البنزين
هما هما اللى طلبوا مشروب فى كافيه فخم واندفع فى كوبايه شاى 20 ولا 30 جنيه
- وهما هما اللى راحوا قهوة ولقوا الشاى غلى جنيه ودفعوه عاااادى وسابوا بقشيش كمان
- وهما هما اللى اشتروا السجاير اغلى اتنين جنيه عن سعر امبارح ومحدش اتكلم
- وهما هما اللى اصلا مش حاسين بالغلابه ومفكرين نفسهم غلابه بس هما لو شافوا الغلابه بجد ..؟ هايسجدوا لله شكرا على حالهم
** بالمناسبة البوست دا واقعى وبيحصل
وبالمناسبه انا بتكلم عن شريحة معينه بتقعد فى كافيهات وبتاكل فى مطاعم وبتحط بنزين 92
عشان محدش يكلمنى عن الغلابه والبنزين ال 80 والكلام دا
انا ماعاشرتش حد من بتوع التاكسى ولا الميكروباص
بس برضو اللى اعرفه ان سواق التاكسى والميكروباص بيزود الاجرة 3 مرات
مرة وقرار زيادة سعر البنزين عباره عن اشاعه
ومرة والقرار بيتم دراسته
ومرة لما القرار ينزل فعلا
كل يوم التاكسى اجرته بتبقى الضعف
كل يوم الميكروباص اجرته بتكون الضعف
رغم ان حتى لو فى زيادة فى البنزين والتاكسى والميكروباص اشتغلوا بالاجره العاديه برضو هايكسبوا بس دا جشع
ودا لازم يتعالج من المرور ويكون فى تشديد على الاجره !
E>E
Eslam Elbahrawy
