السيسي ومبارك وبتاع التين الشوكى
وجهة نظر رجل صعيدى بسيط
لسه راجع من برا
حوار حصل بالفعل كالاّتى
شوفت عربية تين شوكى قلت انزل انا وصاحبى نجيب للبيت
وبينى وبينكم ماكانش للبيت.. دا كان لينا عشان ناكله بعد الفطار
نزلنا من العربية
راجل واقف على عربية التين .. صعيدى جدع
المهم بقوله بكام ياعمنا.. عاوزين شوالين
فرد قالى الواحد بجنيه ؟
بصيتله بإستغراب كده ( لانى مش بشترى تين كل يوم )
قولتله ايه؟ ياعم دا انا كنت فى المدرسه بجيب العشره بجنيه
واترد عليا بالموشح الاّتى
قالى يابنى مدرسة مين ؟ الكلام دا من كام سنه؟
زمان مش زى دلوقتى يا استاذ
زمان كان مطلوب منى اعمل يوميه 20 جنيه عشان اروح بيها والحمد لله
دلوقتى لو روحت مفيش فى جيبى 70 ولا 80 جنيه معرفش أأكل عيالى
وبعدين كانت الناس رايقه .. حتى لو مش معاهم فلوس
تلاقى الواحد واخد عياله وجاى يمشيهم ولا يقعدهم فى جنينه
ويأكلمهم تين شوكى وتبقى كده قضيت وزى الفل
انما دلوقتى الناس كئيبه .. الناس خايفه
اللى معاه 10 جنيه فى جيبه خايف يصرفها احسن مايلاقيش غيرها بكره
انا ممكن اقف على العربية دى طول اليوم ومابيعش حاجه
لان الزبون بيقول الجنيه اللى اكل بيه تين شوكى
اروح اكمل عليه واجيب كيس سكر ولا ازازه زيت لعيالى
وبعدين اجيبلك من الاخر
دلوقتى مش زمان
لان زمان كان فى مبارك ودلوقتى مفيــــــــــــــش !!!
ودى كانت الكلمة اللى خليتنى وقفت وتنحت وبصيتله
وحسيت انى اخدت دش ساقع على قفايا من مفاجأة الكلمه
رديت قولتله بس السيسي من نفس المدرسه ونفس البيت بتاع القوات المسلحه والراجل دا عاوز يعمل حاجه للغلابه
قالى يابنى مصر دى بقت عامله زى العربية اللى فتحت بوءها
بعد ما خربوها ولاد الكلب .. كل ما تصلح حته .. حته تانيه تبوظ
هو هايقدر على ايه ولا ايه .. دا كفايه السواد اللى فى قلوب الجماعه اياهم من ناحيته .. دا لوحده سواد وغل يجيب الفقر ( يقصد ولاد الكلب الارهابيين )
فقولتله هايقدر والله وبكره نشوف
قالى ربنا معاه مادام نيته خير.. انا راجل عجوز وفى اوقات مرت علينا قبل انتوا ماتتولدوا اصلا وكانت اسود من كده .. انتوا بس شباب طرى انما البلد دى انا عيشت فيها لما مرت بأيام سوده .. أيام الغارات ونجرى نطفى النور والاكل والشرب كان بحساب لان التموين قليل .. ف اللى خلاها تعدى دا كله .. اكيد هانخلص من شوية الغم اللى عايشين فيه دا .. ماتقلقش مادام واحد من الجيش ماسكها
الناس دى مابتهزرش وبيمشوا كل حاجه زى عقارب الساعه
انا فضلت اضحك .. وباصص لوش الراجل وحاسس ان دا اللى المفروض يكون من النخبه فعلا .. الراجل سياسى محنك وفاهم كل حاجه
قولتله تمام .. انا مش هفاصل معاك عشان الكلمتين الحلوين دول
بس لما السيسي يظبط البلد .. هاجى وافاصل معاك
والله العظيم رد قالى :
متخافش.. لو مشيت زى ما هوا عاوز
هاترجع تشترى منى التين الشوكى ببريزة زى زمان
حوار حصل بالفعل
ومن ساعتها متردد اكتبه ولا لا
بس .. لازم يتكتب
والله العظيم احنا ولا نعرف حاجه .. والناس دى فاهمه كل حاجه
اراء راجل على عربية تين شوكى .. افضل من الدلوعه ( عمرو حمزاوى )
ولا المخنثين بتوع النكسه وبفكر جديا اقسم بالله اعدى على الراجل تانى واشوف هو شايف ايه للى بيحصل والتفجيرات و دا كله .. الناس دى بيطلع من بوءها العجب !
E.E
Eslam Elbahrawy
منشور by Eslam Elbahrawy.
