إقتراح بسيط لمواجهة جشع سائقى التاكسى والميكروباص بعد زيادة اسعار المحروقات
انا عندى اقتراح ممكن مايكونش جديد بس بجد لو تم تطبيقه هايفيد جدا
طبعا حضراتكم عارفين ان سواقين الميكروباص والتاكسى بقوا زى الجزارين والاجرة ضربوها فى ضعفين وتلاته
انا عندى حل يخليهم يحترموا نفسهم والحل دا كمان هايعود بفايده على الدولة سواء بالفلوس او بإنهم هايقللوا نسبة البطاله
انا شايف ان الدولة هاتوفر فلوس من زيادة اسعار المحروقات .. ليه ماناخدش جزء منها ونعمل صفقات اتوبيسات نقل عام
ثوانى الفكرة جايه اهى
دلوقتى حضرتك انا مثلا فى طنطا عندى داخل البلد حوالى 20 اتوبيس نقل عام
والاتوبيسات دى بتكون زحمه جدا ولكنها لانها تبع الحكومة ملتزمه بتسعيرة الركوب عكس التاكسى والميكروباص اللى بيزود السعر بمزاجه
طيب النقطة التانية
الاتوبيسات دى بتشتغل من 8 صباحا لحد 8 مساءاً
طيب دلوقتى لو انا جيت خليت ال 20 اتوبيس دول وصلت عددهم ل 50 اتوبيس؟
ايه الى هايحصل؟
اللى هايحصل ان الازمه فى الاتوبيسات هاتخف وان الاقبال هايكون على اتوبيس النقل العام اكتر من
الميكروباص لانه صبح متميز ان بقى فى مكان نقعد فيه ومفيش تكدس وبيروح نفس خط سير الميكروباص
والاجره بتاعته متسعره من الحكومة ومش هاينضحك علينا
اصبح انت كده دخلت لخزينة الدولة فلوس اكتر ولميت فلوس الاتوبيسات اللى اشتريتها ونزلتها جوا البلد
النقطة التانية.. تقدر تدخل فلوس زيادة وكمان تحل ازمة بطاله
دلوقتى ايه الجميل اللى بيتميز بيه الميكروباص؟
انه لحد الفجر شغال ولكن اتوبيس النقل العام شغل لحد الساعة 8 مساءا بس
طيب بما انك هاتزود عدد الاتوبيسات؟ ليه ماتطلبش شباب يشتغل ورديات ليليه على الاتوبيسات دى ويبقى
الاتوبيس شغال 24 ساعة
حضرتك هاتعمل 3 ورديات
كل ورديه 8 ساعات
تخيل كام اتوبيس زيادة .. فى كام محافظة؟وكام وردية هاتزيد؟
وبكده هاتحتاج سواقين وكمسريه بعدد اكتر
فهتاخد من الشباب اللى قاعد ايا كان مؤهله
هاتطلب عالاقل اصحاب المؤهل المتوسط فما اقل ولو حد مؤهل عالى حابب يتوظف اهلا وسهلا
وبكده تكون شغلت الاتوبيس 24 ساعة وجيبت فلوس وكمان شغلت شباب
صدقونى الجشع مش هايتم مواجهته بالخناقات والزعيق والبوليس والكلام دا الجشع لازم يتواجه بنفس الطريقه
نفس فكرة السيسي لما قال ان لو بتوع الخضار والفاكهه فضلوا يغلوا الاكل انا هاعملهم جمعيات استهلاكيه بأسعار قليله وهاضربلهم بضاعتهم
احنا هانعمل كده
هانكتر عدد الاتوبيس.. ونقلل الاجره ونشغل شباب
وبالتالى الضغط على الاتوبيس والتاكسى هايكون اقل ونضرب كذا عصفور بحجر واحد
فكرة جاتلى وانا قاعد
اتمنى تكون فيها خير
E.E
Eslam Elbahrawy