التحكم بالعقل عن طريق الفن - بين فيلم تك تك بوم ومقتل اللواء البطران واللعب بالعقول
مازالوا يرددون كلمات تنفى المؤامره
ولازالوا لا يعترفون بأن الفن والاعلام بصفه عامه هو الموجه الاول والاخير لوجدان الشعوب
امبارح كنت بشوف فيلم تك تك بوم بتاع محمد سعد
وكنت اول مرة اشوف الفيلم كامل من اوله لاخره
والفيلم بيتكلم عن الاحداث اللى حصلت فى خلال 25 يناير من سرقه ونهب
ولكن بطل الفيلم محمد سعد طالع بطل فى لجنه شعبيه
وبيتكلموا عن فساد الحاكم وان اللى حصلت ثوره وكانت لازم تقوم
فى اخر 10 دقايق من الفيلم
بيتم القبض على محمد سعد وبيدخل السجن
وفجأه .. بييجى المشهد اللى بيمثل يوم 28 يناير وفتح السجون
وبيظهر المساجين بيجروا وبيهربوا من السجن
مأمور السجن ( اللى عامله شخصيته برضو محمد سعد )
بيظهر فى لقطه وهو بيقول يا فندم مش هاسيب مكانى حتى لو بتدينى اوامر انى اسيب المكان ! ( وكأن مسئول من الداخليه بيقوله سيب مكانك وافتح السجن )
وفجأة بيدخل عليه عسكرى ومعاه رشاش فبيسأله المأمور مين اللى فتح الزنازين وهرب المساجين..
فبيرد العسكرى يقوله انا اللى فتحتها وعندى اوامر انى اقتلك كمان !!!
فى اول وهله شوفت المشهد دا
تذكرت قصة اللواء محمد البطران الذى استشهد رميا بالرصاص وكان احد المسئولين عن سجن القطا بالقناطر واللى تصدى لمحاولة اقتحام السجن يوم 29 يناير
اللواء البطران اتقتل من الناس اللى حاولت تقتحم السجن
ولكن ايامها .. الاّله الاعلاميه الاخوانيه اشتغلت على الموضوع
وقالت ان حبيب العادلى هو اللى أمر بفتح السجون
ولما رفض اللواء البطران اوامر حبيب العادلى
الحرس بتاع الابراج بتاع السجن هو اللى قتل اللواء البطران !
وكان دا مسلسل من مسلسل تزييف الحقائق وتسخين الشعب !
الاعلام والفن يقدر يوديك شمال وانت مقتنع .. ويرجعك ويوديك يمين وانت برضو مقتنع !
احنا اتلعب بينا كتير
ركز فى كل حاجه بتشوفها
انا كان معايا جروب شباب بيتفرج على الفيلم .. بس محدش فيهم اخد باله من اللقطه دى .. كله بيتفرج على ان دا محمد سعد ودا مجرد فيلم كوميدى
لكن هاقولك معلومه .. لو كان الفن بيحرك الوجدان وبيخلق الوعى سواء المزيف او الحقيقي ..
فأخطر انواع الفن دا هى البلاك كوميدى او الكوميديا السوداء .. لانها بتلعب على التهكم من الاوضاع وبتخلق جواك نوع من السخريه اللى بيوصلك لحد الشعور بالخنقه من كل حاجه حواليك !
مفيش حاجه صدفه
مفيش مشهد بيتعمل صدفه
مفيش فيلم بيتعمل صدفه
كل حاجه وكل كلمه وكل موسيقى تصويريه ليها هدف
زى ما بنشوف فى المسلسلات التركى اللى بيعرضوها عندنا
ان وقت الزوجه ما بتقابل عشيقها بيكون المشهد مصحوب بموسيقى رومانسيه..وبالتالى عقلك بيترجم الموسيقى الرومانسيه بشكل حلو فبتقتنع بالفكره وتتفاعل معاها وتبتدى تتقبل ان الزوجه عادى تروح تقابل عشيق !!
It's All About Mind Control
E>E
Eslam Elbahrawy
منشور by Eslam Elbahrawy.
