بتخنقينى وبتحضنينى بس برضو ام الدنيا - إسلام البحراوى
اوقات بشوفها ضيقه اوى عليا وبتكسر عضمى
وساعات الاقيها فاتحه دراعاتها تضمنى و أحس بدفا حضنها
اوقات ايديها احسها خشنه اوى وبتعلم على جسمى وقت الشده
وفجأه تبقى أنعم ايد فى الدنيا بتلمس خدودى تمسح دموعى
بقف وسطها بتنفس ساعات زحمتها ويا جنونها
بس برضو ريحة جوها وريحة ترابها بيجبرنى افضل واقف ببتسم وباصصلها
تزعقلى وتشخط فيا وبعدين تقولى ماتزعلش
تقولى مفيش؟ وفجأه الاقيها بتطلع اللى نازل جوفها وتقولى دا كل اللى عندى
بشوفها حبيبتى احبها واتخانق معاها بس عمرى ما اكرهها
ازعل شويه واتقمص .. بس بستمتع وهى بتصالحنى وانا بتقل عليها
اوقات اقول انا ماشى خليكى انتى قاعده
وبعدين ابصلها تصعب عليا ومقدرش اسيبها لوحدها
كأنها بتبصلى وتقولى هاتبيع اللى شالك
وتروح للى اتحكم فى مصيرك وبهدل حالك !
بناديها كتير وماتردش واقول سامعه ومطنشه
بس لما ترد بعرف انها كانت مشغوله وبقول الحمد لله المهم اطمنت انك كويسه
يحصل اللى يحصل و أقف خايف ودمى هربان
وهى بدمها بتروينى وعمرى ما نمت يوم عطشان
ساعات بجوع بس بكون حاسس بأمان حتى لو نايم جعان
بشوفها واقفه اتعلم شرف والهيبه
واشوف غيرها اقول الحمد لله على نعمه اتاخدت من غيرى وحاسين بخيبه !
اتهز وهى ثابته
اخاف وهى واثقه
بحبها وهى عارفه
#مصر
By E.E
Eslam Elbahrawy
منشور by Eslam Elbahrawy.
