فى حال عرض فكرة المصالحه مع قطر - كمواطن مصرى عندى شروط بسيطه تجعلنى اوافق على المصالحه - فهل يجرؤ تميم على تنفيذها؟
حسبه بسيطه حابب نحسبها سوا
المصريين وانا واحد منهم رافضين المصالحه مع الاخوان
لان المصالحه تكون فى قضية اموال او خناقه على الناصيه
لكن الامر اللى يرتبط بالدم .. لا مصالحه فيه
طيب احنا مش عاوزين نتصالح مع الاخوان ليه؟
عشان هما بيمولوا الارهاب .. وبيحرضوا على الارهاب
وبيقتلوا ولادنا فى الجيش والشرطه
وعاوزين يسقطوا البلد
مش كده؟؟ طيب جميل
بخصوص المصالحه مع قطر
انت عاوزنى اقبل المصالحه مع قطر؟
طيب ما تيجى نعمل جدول ونقارن بين قطر والاخوان
الاخوان تمول الارهاب = قطر تمول الارهاب
الاخوان تحرض على الارهاب = قطر تحرض على الارهاب
الاخوان قتلوا ولادنا جيش وشرطه وشعب = قطر بتمول الارهاب اللى بيقتل ولادنا
الاخوان لهم قيادات هاربه بتشتم بلدنا وشعبنا ورئيسنا = قطر تحتضن قيادات الاخوان اللى بتهين الشعب وتحرض عليه
الاخوان بيكرهوا الجيش وبيقولوا انه كافر ويجب قتله = قطر تحتضن القيادات اللى بتقول كده
الاخوان ايدهم ملوثه بدم ولادنا = قطر مولت الارهاب وايدها ملوثه بنفس الدم
اذن سيدى الفاضل
لو اتعاملنا بالمنطق ان اى جزء من كل .. الجزء الاصغر يسرى عليه ما يسرى على الجزء الاكبر
طيب لو كنت انت ضد الاخوان اللى هما مجرد اداه فى يد قطر ومقاطعهم
عاوز تتصالح مع اليد اللى بتحرك كل شىء ارهابى فى بلدك؟
عامة خلونا برضو نتكلم بواقعيه
البراجماتيه السياسيه بتتطلب احيانا مصالحات وهميه
البراجماتيه : انك تشوف المصلحه فين حاليا وتعملها
انا كمواطن ممكن افكر فى المصالحه مع قطر
ولكن لو تم الاتى:
1- خروج امير قطر فى بيان رسمى مصور يقول انه يؤيد ثورة شعب مصر فى 30 يونيو وان ما حدث فى مصر ثوره وليس انقلابا
2- يتضمن البيان ان يعلن امير قطر ان جماعة الاخوان جماعه ارهابيه
3- اعلان اغلاق قناة الجزيره مباشر مصر
4- تسليم قيادات الاخوان الهاربين فى قطر الى الامن الوطنى المصرى
5- اعلان القرضاوى ارهابيا يحرض على الارهاب فى مصر
6- اعلان قطر وقف دعم الجمعيات الحقوقيه المشبوهه والجمعيات الشرعيه التى تمولها قطر بالملايين
7- ان يكون كل ما سبق فى بيان تلفزيونى مصور يلقيه امير دولة قطر
** شخصيا دا ممكن يخلينى اقبل بفكرة مصالحه على ووووورق ولكن اللى فى القلب فى القلب .. لكن زى ما قولنا السياسه لعبه قذره والعنتريه مش مطلوبه فيها
ولكن ........؟
لو ماحصلش كده وتمت المصالحه
هايكون اول قرار ياخده الرئيس واعارضه فيه
عارف ان فى ناس كتير هاتقول انه اذكى وفاهم اكتر مننا
وانه عارف مصلحة البلد وانه فى مكان يخليه يشوف اكتر وكل الكلام دا
وانا متفق معاكم
ولكن .. انا هاكون مش موافق على المصالحه بغير الشروط دى
وهافضل برضو واقف ورا بلدى ورئيسى وجيش بلدى
وهافضل اساند السيسي فى قراراته
ولكن القرار دا مش هايكون مناسب ليا كمواطن مصرى
انا عارف الكلام دا ممكن يخلى ناس كتير تثور عليا
لكن انا بالنسبالى الرأى كرامه
وانا مش بفرط فى كرامتى..يعنى مش بفرط فى رأيى
انت عاوز تعمل مصالحه مع ناس لا فرق بينهم وبين اسرائيل
بل فى اخر 4 سنين هم اشد كرها ليك من اليهود
قولنا الكلمتين
والرزق على الله
E.E
Eslam Elbahrawy
منشور by Eslam Elbahrawy.
