حقيقة العالم - مدونة إسلام البحراوى: انتحرت عشان حال البلد

انتحرت عشان حال البلد - امال دول لسه مانتحروش ليه !؟

انتحرت عشان حال البلد !

انتحرت عشان الثوره مش مستمره !

اه .. ممم ..

دى اتعملها فيلم واهتمام

طيب شوفوا اللى يستحق الاوسكار

1- شاب وصل للتلاتين ولسه ماشتغلش وعاطل ومش عارف يحب ولسه لحد دلوقتى بيمشى ب 100 جنيه فى الشهر كله ومحروم من كل حاجه = ولسه مانتحرش

2- اسره من خمس افراد عايشين فى اوضه وصاله وبياكلوا الفطار فى وقت متأخر .. عشان يترحل معاد الغدا .. ومايبقاش فى عشا عشان يوفروا = ولسه مانتحروش

3- ام بتروح تغسل كلى وبتقف بالطابور وبالساعات ومش بتلاقى تمن التاكسى اللى يوديها معهد الغسيل = ولسه مانتحرتش

4- ست محترمه جوزها ميت وعيالها فى الجامعه بتضطر تركب ميكروباص كل يوم وتروح مدينه تانيه غير اللى ساكنه فيها وتلبس نقاب وتنزل تبيع مناديل عشان تصرف على عيالها ومايعرفوش ان امهم بتشحت عليهم -= ولسه مانتحرتش

5- اب بيلبس ولاده هدوم مرقعه عشان يحاول يكسيهم فى عز البرد - والولاد شباب ليهم زمايل واصدقاء بيلبسوا احسن هدوم وبيبقوا وسطهم محروجين وفى عز البرد تلاقي جسمهم مولع بسبب الاحراج اللى هما فيه = ولسه مانتحروش

6- ابن بيشوف امه بتموت قصاد عينه ومش معاه 500 جنيه تمن تأمين مستشفى وبيروح يحطها على الارض فى مستشفى حكومى وبيبصلها ونفسه يولع فى الدنيا كلها = ولسه مانتحرش

7- بنوته حلوه فى عز شبابها .. بدل ما تحلم بليلة الزفاف والفستان الابيض - السرطان بياكل جسمها وبيحرمها من كل حاجه = ولسه مانتحرتش

8- شاب اهله باعوا عليه عفش البيت عشان يعلموه و اخد اعلى شهاده وانتهى بيه المطاف بعامل تنضيف غرف فى فندق او قهوجى او سواق على تاكسى = ولسه مانتحرش

9- ناس بتروح تقف عند بتاع الفراخ تشترى رجول الفراخ لعيالها ومابتقدرش لان حتى دى تمنها غالى عليهم = ولسه مانتحروش

10- ام.. واب .. وزوجه . وابن .. ابنهم مات شهيد وهو بيخدم بلده ورجعلهم اشلاء = ولسه مانتحروش

ياترى اللى انتحر عشان مفيش ديمقراطيه وعملناله احتفال واهتمام

الناس اللى فوق دى بقى يتعملها ايه

عارفين المشكله فين؟

ان الناس دى مش بيتعملها حاجه .. بل بالعكس بيتحط عليها كل يوم زياده

ومع ذلك مابينتحروش

احترموا مشاعر الناس

اهتميتوا بحد انتحر عشان الديمقراطيه

اكتر ما اهتميتوا بموت اطفال محروقين وهما صاحيين جوا اتوبيس