ما السر وراء هجوم توفيق عكاشه العنيف على محافظ الاسكندريه الجديد هانى المسيرى؟
بصوا انا فى حاجه مش فاهمها
جايز حد عنده تفسير .. فحبيت اشاركها معاكم لان انا مؤمن ان مفيش حد بيعرف كل حاجه
على حسب معرفتى .. ان محافظ الاسكندريه الجديد هانى المسيرى
راجل لسه هايكمل الخمسين ودى معجزه انها تحصل فى مصر
وشوفت مؤهلاته لقيتها كالتالى :
1- بكالوريوس ادارة اعمال من جامعة كاليفورنيا
2- ماجيستير ادارة اعمال من جامعه الاسكندريه بالتعاون مع جامعة واشنطن
3- اكمل برنامج كلية كيلوچ فى ادارة الاعمال بجامعة شيكاجو الامريكيه
4- يشغل منصب المدير التنفيذى لشركة أفيكو مصر
5- الرئيس التنفيذى لشركة اكويتى فينشرز
6- مسئول الخدمات المصرفيه المميزه لبنك اوف امريكا
7- نائب الرئيس ومدير شركة جولدن ستايت فودز مصر
8- اختير ضمن افضل 40 مسئول تنفيذي شاب تحت سن الاربعين
** لكن بسبب ظروف انقطاع النت عندى لكام ساعه .. قلت افتح التلفزيون
لقيت توفيق عكاشه بيتكلم عن هانى المسيرى .. وهجووم رهيب جدا عليه
لم يكن الرجل أدى اليمين بعد .. ولكن عكاشه لم ينتقده فى عمله او مؤهلاته .. ولكنه كان بيهاجمه عشان صور ركوبه للدراجات وصور السباحه وبيقول المسئول ابو تاتو !!!..؟
معرفش هل ورا هجوم توفيق عكاشه على الراجل شىء لا نعلمه ؟؟ ولا دا هجوم من اجل الهجوم ؟؟
الراجل هانى المسيرى برر صور ركوبه الدراجات والسباحه ..انه اصل رجل رياضى وثانيا هو بطل سباحه وقال انه لن يتخلى عن كونه رياضى بيحب الرياضه وممارستها !
ياترى حد عنده تفسير للهجوم العنيف لمدة اكتر من ساعه على محافظ الاسكندريه بسبب صور ركوبه الدراجه ؟؟
وان لم يكن هناك سبب والرجل لا يشوبه شىء
هل من المنطقى فى دوله تريد ان تتقدم ان تهاجم اشخاص على حياتهم الشخصيه خاصة وان كان سبب الهجوم شىء جيد زى ممارسة الرياضه ؟
ولا المفروض ان الحياه الشخصيه دى حاجه واننا بنحكم على الراجل من خلال عمله الحكومى وقراراته ...؟
E.E
Eslam Elbahrawy
منشور by Eslam Elbahrawy.
