رأى خاص فى ترشح احمد عز للبرلمان القادم - قرر مصيرك والا فلتذهب الى الجحيم
برا الفيس بوك
كان التجمع على القهوه .. شباب العشرينات ورجال الخمسينات
اتسألت عن رأيى فى ترشح احمد عز
سؤال اجابته ممكن ماتحتاجش من ناس كتير اكثر من ثانيه عشان يجاوبوا عليه
اما اقول ( فاسد ومزور ) وترشحه مرفوض واقفل الموضوع
اما اقول ( ماليش دعوه ) واقفل الموضوع برضو
انا لم اتطرق لكون احمد عز فاسد من عدمه
او زور الانتخابات من عدمه
انا تطرقت للمنطق والعقل ورغبة الشعب
هو الشعب بيقول ااااايه ( حسن ومرقص ستايل ) :
الشعب قال عيش وحريه وعداله اجتماعيه
وطالب ومازال يطالب بدولة القانون .. دوله القانون فقط ما يحمها
انا قلت رأى بسيط جدا
انتوا بتقولوا ان الشعب اصبح يغير بإرادته
وان اى حاجه بتحصل معناها ان الشعب عاوزها
وكمان بتقولوا ان عصر التزوير انتهى
اذن .. بناء على ما سبق
لو عز او غيره مفيش عليه اى مانع قانونى
خليه ينزل انتخابات .. والفيصل يكون الشعب
هو مش الشعب بيقرر مصيره .. والكل بيقول الشعب شايف عز فاسد ومزور ؟
اذن الشعب اللى شايفه مزور .. اكيد هايسقطه .. ولا ايه؟
يبقى هنا احنا قدام حالتين
اما سقوط عز .. و دا معناه ان الشعب شايف انه فاسد وسقطه
واما نجاح عز و دا معناه ان فى جزء اكبر شايفه مش فاسد
مالهاش تالت .. مش هانفضل دايما نستنى اللى يخططلنا ويقررلنا ويتكلم بالنيابه عننا ..
مش من حقك تقول مين ينزل او لا .. مادام انت طالبت بدوله ديمقراطيه
لكن .. والله لو فى ناس كتير شايفاه فاسد فأكيد هايسقطوه
انما لو نجح؟؟ يبقى ماتتكلموش بقى
هو دا الفيصل عندى ..
اظن لازم يكون الشعب اتعلم بقى
ايام الاخوان اتنبح صوتنا وقولنا ارهاب ودمويه وبرضو كانت النتيجه الزيت والسكر نجحوا و اديكم غرقتونا لما اختارتوا
يبقى لازم دلوقتى تختاروا .. ولو اختارتوا غلط؟ يبقى ماتلوموش حد تانى
بالمناسبه .. رأيى دا كان من كام يوم
وشوفت فيه جزء بيتحقق لما سمعت عن ناس حرقت بطاطين بيقولوا ان عز وزعها كرشاوى انتخابيه !!
الشعب اللى مصيره فى ايده .. هو الفارس هو الحارس
والاحلام مش عايزه فوارس.. الاحلام بالناس تتحقق
وبالمناسبه ...
نزول عز اصلا للانتخابات انا شخصيا شايفه فى شكل تانى وحوار تانى وغرض تانى وطريقه تانيه بس ممكن بعد .. سنه او اتنين .. لو ربنا ادانى واداكم العمر..اقولكم كنت شايفه ازاى..لان دلوقتى ماينفعش !!!!!
E.E
Eslam Elbahrawy
منشور by Eslam Elbahrawy.
