محمد الغيطى يشارك فى عرض مهزله لاهانه الاسلام - شيخ الغرب مصطفى راشد شبيه اسلام بحيرى
بسم الله الرحمن الرحيم
السيد الاستاذ الاعلامى محمد الغيطى
تحيه طيبه وبعد ...
احب اقول لحضرتك انك اعلامى فاشل و جاهل لا تختلف عن باقى قرنائك فى الاعلام الفاشل الذى يروج للاكاذيب وللموضوعات الشاذه والخارجه عن طبيعة الشعب المصرى بهدف الاضرار بشعب مصر وزعزعه الاستقرار دينيا وسياسيا واجتماعيا
الاستاذ الغيطى عامل حلقه ولم تكن الاولى
ومستضيف الاخ مصطفى راشد .. اللى بيقول على نفسه شيخ
ومهم جدا نعرف ان سيدنا الشيخ عاش حياته كلها برا
وسيدنا الشيخ هو سفير السلام فى ( الامم المتحده ) !!!
سيدنا الشيخ هو النسخه المطابقه لسيدنا الشيخ اسلام بحيرى
مهاجمة كل ما هو اسلامى بدعوى تفتيح العقول واستعمال العقل !
ولاحظوا وجه الشبه بينهم .. كلاهما ( نزلوا علينا بالباراشوت من بلاد برا ) ويريدون تصدير لنا ما يسمى بالاسلام الغربى !
انا عاوز اسأل محمد الغيطى .. ايه الفايده من وراء تلك الحلقات ؟
قعدت اتفرجت على واحد طالع يقول الاحاديث غلط والقراّن غلط وكل حاجه غلط
والاخر محمد الغيطى يقولك اصلى بحاول اقرب وجهات النظر ...
سيدى الفاضل تقريب وجهات النظر يكون بين محلل زملكاوى واخر اهلاوى ووجهة نظرهم فى لاعب معين .. او بين حشاش وشمام ووجهة نظرهم هل صافيناز بتهز كويس ولا لأ !!
انما الدين مافيهوش تقريب وجهات نظر يا بشر بلا عقول
انت عاوز تقرب وجهة نظر ايه ؟؟
واحد جاى يقول احنا فاهمين القراّن غلط لان القراّن وربنا لم يحرم الخمر وانما قال ان دا مكروه عشان كده ربنا قال اجتنبوه ولم يقل انه حرام !!!!!
عاوزنا بقى نقرب وجهات النظر لحد ما نوصل للاسلام الامريكانى اللى بيصدروه لينا ولشبابنا .. واللى ماشى بمبدأ .. انا بصلى واصوم لربنا .... وبشرب خمور لنفسى !
بأى حق تستضيف ناس تتكلم عن القراّن وصحته من عدمه وهم غير دارسين .. اسلام بحيرى يقولك مش معترف بحاجه اسمها فقه وعلوم حديث والاخ مصطفى يقولك محدش فاهم القراّن اصلا !!
والاخر اللى بيتشوه هو عقول شبابنا .. منكم لله
انا بس عاوز اقول للناس اللى ماشافتش الحلقه ..
ان الاخ مصطفى كلامه مردود عليه من القراّن والسنه ولكن لانه جاهل ومش دارس حتى لو كان خريج شريعه وقانون ولكنه تأمرك وبقى امريكانى فمش عارف حاجه وبيعارض من اجل المعارضه
الاخ بيقول ربنا لم يحرم الخمر انما جعله مكروه لذلك قال اجتنبوه
وبيقول ربنا نهى عن انك تسكر .. انما لو شربت الخمر عادى مادام مش هاتسكر
وتناسى اولا حديث الرسول عليه افضل الصلاة والسلام عندما قال
كلُّ مسكر حرام"، وكلُّ شيء أسكر كثيرُه فقليلُه حرام
صدق رسول الله صلى الله عليه وسلم
ولم يعلم ان التحذير الربانى فى اللغه من كلمة اجتناب هى التحريم
والدليل .... :
ربنا سبحانه وتعالى قال فى سورة الحج
فَاجْتَنِبُوا الرِّجْسَ مِنَ الْأَوْثَانِ وَاجْتَنِبُوا قَوْلَ الزُّورِ
صدق الله العظيم
فهل هنا بقى ربنا بيقول ان الاوثان مكروهه بس عادى نعبدها
وان شهادة الزور مكروهه انما مش حرام وعادى نعملها ...؟
ولا الاجتناب هنا بصيغة التحريم !!!!
اخيرا عاوز اقول .. انا مسلم معتدل والحمد لله ولكنى عند المساس بدينى وخاصة القراّن الكريم اكون اكبر المتعصبين
كلما نشرت شىء ضد هؤلاء امثال راشد والبحيرى يتهمنى البعض انى جاهل او متعصب او حتى داعشى .. ولكن .. للتوضيح :
1- انا اقدس قراّن ربى وسنة رسولى ولا اقبل الطعن فيهم
2- انا لا اقدس اشخاص واعلم ان الكمال لله .. وقلت مرارا مستعد ان اسمع لشخص يقول ان البخارى او غيره اخطأوا او لديهم تفسير خاطىء ولكن باحترام وبإستخدام المنطق .. وليس بالسب والقذف .. ابو هريره كذاب والبخارى كاذب ( هكذا قال عليهم مصطفى راشد ) .. ابن رشد والقرطبى وغيرهم قتله وسفاحين ( هكذا قال عليهم اسلام بحيرى ) .. فهل تلك هى طريقة مناقشتكم للامور .. ومناقشتكم لاشخاص قد يخطأ احدهم لانه بشر ولكن ذلك لا يكون مدخل للسب والقذف لاشخاص عاشوا فى انزه العصور وكان ايمانهم اقوى مما نحن عليه ونقلوا لنا صحيح الدين
3- كيف تعرف الملحد الصريح والملحد المتخفى ..
الملحد الصريح يخرج ليقول لك من اين جاء الناس ؟ ومن قبلهم من اين جاءت الارض؟ ومن قبلها من اين جاء الفضاء ؟ وصولا الى الله .. فتجده يقول لك ومن اين جاء الله ( استغفر الله )
اما الملحد المتخفى .. يتكلم بالصبغه الاسلاميه ... وتجده يقول لك .. اثبتلى الحديث الفلانى؟ تقوله رواه فلان .. يقولك اثبتلى ان هو نقله صح؟ تقوله رواه عن فلان ..؟ فتوصل للرسول .. فيقولك هاتلى ما يثبت ان الرسول اصلا قاله !!!
وهذا المنهج الذى استخدمه مصطفى راشد !
الى الاعلام المصرى..ارحمونا واتقوا الله فى امه فى احوج ما يكون للاسلام والدين الصحيح .. ارحمونا فثمن الخراب سيكون انتم اول من يدفعه
اسف للاطاله
E.E
Eslam Elbahrawy
منشور by Eslam Elbahrawy.
