سيدات الوقفه الاحتجاجيه للكلب - المنظره هدفهم - بعد ان عنفوا سيده طلبت مساواة ابنها بالكلب لعلاجه
معلش انا مش من بتوع المشى مع الموجه
ولما بشوف غلط بقول
شخصيا بشوف ان الوقفات اللى بتتعمل عشان كلب او قطه دى بتكون للفشخره فقط .. وبحس ان الناس فيها نازله رايحه رحله
انا بوستاتى موجوده و أدنت قتل الكلب طبعا وقلت وجهة نظرى فى الموضوع وقعدت اكتر من يومين الفيديو عاملى الم نفسى فعلا
لكن ..........
لو انا الفيديو عملى الم نفسى لانى شوفت كلب بيتقتل
ونزلت لبست هدومى روحت اتمشى و اشم هوا ولقيت قصادى حد بيطلب حاجه لله .. او طفل بيقولى جعان عاوز اكل .. هل هاساعده؟؟ ولا هانفضله وامشى؟
طب هانفض وامشى ازاى اذا كان الكلب هزنى .. يبقى البنى ادم مش هايهزنى ?
الست اللى فى الصوره دى ابنها مريض
راحت عند الوقفه الاحتجاجيه اللى عملوها للكلاب !! وعيطت وقالتلهم اعتبروا ابنى كلب وعالجوه .. وما كان من الاخت اللى نظمت الوقفه الاحتجاجيه الا انها نهرتها بشده وعنفتها وقالتلها انتى مزقوقه علينا !!
طب ازاى؟؟ سيدات مجتمع وهاى كلاس وسوسو وميمي
وقلبكم حنين على الكلاب .. ازاى تعملوا كده فى طفل الله اعلم بحالته
مش مجبرين تساعدوه..بس على الاقل الكلمه الطيبه صدقه
ولا عشان الطفل دا مش هايعمل شو اعلامى زى الكلب
الست دى محدش ساعدها غير المدام الموجوده فى الصوره معاها
المدام دى اللى اكتشفت الامر بالصدفه .
كانت موجوده فى الوقفه .. وهى مش منظمه ولا عضوه فى جمعيه
هى راحت الوقفه الاحتجاجيه لان عندها كلاب بتربيها فراحت تتضامن
وبتقول انها روحت بيتها لقت فيديو الست وابنها وهى بتقول اعتبروه كلب !
اتفاجئت من تصرف اللى منظمين الوقفه .. وقررت تكلم الست وتاخدها وتوديها المستشفى هى وابنها
** لازم تعرفوا ان الرحمه والانسانيه مابتفرقش بين حيوان وانسان
تنزل تعمل وقفه عشان كلب اتقتل .. واصلا لو ماكانش الفيديو اتنشر ماكنتش هاتعرف حاجه عن الكلب .. الكلب اللى بيتدهس عشره منه كل يوم على الطرق وبيعذبوه فى الاحياء الشعبيه ولا حد بيتكلم .. لكن اللى خلاك تنزل عشان كلب شوفته فى فيديو .. كان اولى مشاعرك تتحرك عشان طفل بيموت انت شايفه قصاد عينك مش فى فيديو
** قبل الختام .. انا بشكر السيده المحترمه اللى ساعدت الست دى
وبشكر رئيس الوزراء .. اللى بعد ما شاف الفيديو .. قرر يقابل الست الغلبانه دى
E>E
Eslam Elbahrawy
منشور by Eslam Elbahrawy.
