كلمتين وبس - بين شفيق والسيسي ومحاولة خلق صراع لإحداث الانقسام - هذه هى حقيقة منع شفيق من الرجوع الى مصر



كلمتين وبس - بين شفيق والسيسي ومحاولة خلق صراع لإحداث الانقسام - هذه هى حقيقة منع شفيق من الرجوع الى مصر

الفريق شفيق والرئيس السيسي

وجهة نظر 

طبعا الكل شايف الكلام اللى بقاله يومين بيتقال عن الفريق شفيق وانه ممنوع بالامر من دخول مصر وانه بيحاول يزعزع حكم الرئيس السيسي وما الى ذلك
انا هالخص كلامى ووجهة نظرى الشخصيه فى كام نقطه وهم كالاّتى :

1- بالنسبه لى
مبارك = شفيق = السيسي 
كلهم ابناء مؤسسه واحده اسمها الجيش المصرى 

2- بالنسبه لى
مؤيدي مبارك = مؤيدى شفيق = مؤدى السيسي
اياك تشوف واحد من مؤيدى شفيق بيشتم السيسي وتصدق انه بيحب شفيق
لان شفيق نفسه بيحب مصر وكان ضد الاخوان وكان بيوجه الناس للوقوف مع السيسي
واياك تسمع لحد من مؤيدى مبارك وتلاقيه بيشتم شفيق او السيسي وتصدق انه بيحب مبارك
ابناء مبارك هم ابناء شفيق هم ابناء السيسي لان كلهم ابناء مصر 

3- بالنسبه لى 
التشكيك فى اى واحد من التلاته يعتبر تشكيك فى التلاته
السيسي خرج من تحت ايد مبارك 
وشفيق كان معاون لمبارك 
والتلاته خارجين من الجيش المصرى
لذلك لو قبلت على حد فيهم انه يتقال عليه حرامى او متاّمر او مش بيحب مصر يبقى قبلت اهانة الجيش المصرى لان اللى اعرفه ان الجيش المصرى مابيطلعش متاّمرين ولا حراميه وبالتالى دى تبقى اهانه لل 3 رموز مع بعض مش واحد بس

4- لكل قاعده شواذ وفى ناس بتفضل حب الاشخاص على حب البلد
يعنى مثلا مازال ناس كتير بتحب مرسى رغم انه خاين وعميل لكن دا حب اشخاص 
بيفضلوه على البلد
برضو بالنسبه لمبارك فى ناس قليله جدا جدا من محبيه ممكن يشتموا فى شفيق والسيسي ويقولك اصل الريس مبارك مازال هو الاحق بالحكم لانه خرج منه بمؤامره !
وقليل جدا جدا من محبى شفيق تلاقيهم يقولولك اصل بنكره السيسي لانه مارجعش الحق لاصحابه .. هو كان عارف ان شفيق ناجح قصاد مرسى لكن حصل تزوير فلازم لما كان شال مرسى كان جاب شفيق بقى وخلاه رئيس 

فى حاجات معروفه ولا يمكن التشكيك فيها لكن ماينفعش الزمان يرجع تانى
عارفين ان مبارك خرج بمؤامره وان شفيق اتزورت الانتخابات 
لكن الامور مش بتمشى كده وانتوا نفسكم عارفين كده
وبالنسبالى؟؟ يكفينى ان اللى بيحكم يكون من الجيش المصرى
كده بالنسبالى التلاته بيحكموا لان التلاته والد مؤسسه واحده

5- هو فى حاجه اسمها كده؟
شفيق نفسه خرج وهنأ مرسى بالفوز ومارضاش يتكلم عن التزوير
عمركم شوفتوا بلد راحت جابت واحد قعدته على الكرسى وقالتله تعالى انت كنت متزور ضدك انتخابات تعالى احكم...؟

6- هل تتخيلوا ان الدوله المصريه وصلت للضعف لدرجة انها حتى لو فى خلاف بينها وبين حد لو هانصدق الكلام دا يعنى .. انها تروح لجريده وتنشر الكلام دا وتقول تحذير وامترجعش و و و و ؟
اى منطق غبى دا .. فى دوله تروح تقول قصاد الناس كلها انها بتمنع الناس من العوده لبلدها
وهل فى دوله بيحكمها ناس اذكيااااء يقولوا قصاد الناس احنا مش عاوزين نرجع واحد زى شفيق؟؟
الكل عارف ان كل مؤيدى شفيق انتخبوا السيسي .. ازاى السيسي ممكن يخسر الملايين دى كلها علنا كده
اذا كان لحد النهارده بيقول على 25 يناير ثوره عشان مايعملش شق للصف رغم معرفته انها مش ثوره
هايروح لشفيق اكبر سياسى وطنى له شعبيه فى مصر ويقول للكل علنى كده انا مش مرجعه ؟؟؟؟
الا تعقلون

7- هو مين ناشر الخبر؟؟ جريدة الشروق ؟
يعنى الجريده المشبوهه .. الجريده اللى كانت اكبر المدافعين عن باسم يوسف لما كان بيستهزأ على السيسي .. الجريده اللى عاوز تعرف توجهها؟؟ ابحث عن ابراااااهيم المعلم 
يبقى والنبى دا خبر تصدقه فى جريده زى دى 

8- الجريده كاتبه فى سطر من السطور 
ان شفيق متهم بقلب نظام الحكم 
دا معناه انه حد مش وطنى 
لما عمرو اديب استضاف عماد الدين حسين رئيس تحرير الشروق وقاله ازاى تقول ان شفيق مش وطنى؟ قاله ماقولتش كده؟؟ فقاله اديب بس كتبت انه عاوز يقلب نظام الحكم؟ راح عماد حسين ضاحك ضحكه صفرا وقاله مش بالظبط كده يعنى احنا نقصد انه له شعبيه وكده !!!!؟
هل الصحافه بقت تكتب شىء وهى تقصد شىء تانى ام ان الهدف هو البلبله؟

9- ماسألتش نفسك لماذا تم طرح هذا الموضوع قبل 30 يونيو ؟؟؟؟ واسأل من المستفيد؟؟؟

10- الجريده اللى واثقه من نفسها .. هاتستخدم اللفظ اللى بتستخدمه كل صحف الفبركه وتقول صرح مصدر مسئول؟؟ اللى يضرب موضوع زى دا كان قالنا مين اللى قال الكلام دا ..عالاقل نعرف مين بقى مانع شفيق من الرجوع 

11- فى نقطه لازم العقل يشتغل فيها 
وهى دى نقطه تدمير المقال كله وتعرف ان كل دا بطييييخ 
الجريده بتقول ان شفيق مغضوب عليه لانه بيعمل تحركات عاوز يتوغل فيها فى السياسه ويهدد حكم السيسي ويزعزع وجوده فى الحكم ؟ مش كده؟؟ صح تمام 
طيب .. انا لو راجل كاره السيسي .. عاوز اوصل للحكم 
ليا اتباعى والمؤيدين ليا وعاوز ابوظ شعبية السيسي بقى
ليه لو الكلام حقيقى انى ممنوع من دخول مصر بسبب السيسي؟؟ ماطلعتش ضربت كرسى فى الكلوب وعملت فيديو مصور مدته دقيقه وقلت لاتباعى نفسى ارجع ولكنى مقهور ووقتها كان الملايين هاتتعاطف معاه ويرجع مصر بطل مرفوع على الاعناق؟؟؟؟
اذن..لو الكلام حقيقى وشفيق بيسعى للكرسى؟؟؟ مش كان استخدم ورقة منعه من الرجوع دى ...؟

12- حملة انت الرئيس ؟ عرفتوا مين عملها؟؟؟
الحملات دى انتوا بتمشوا وراها وخلاص ودايما بضربلكم المثل في الحجاب 
الاخوانى لما يحب يجيبك تقف معاه فى نفس الطابور وتبقى حبيبه رغم انه بتكرهه 
بيجيبك من خلال حد انت بتحبه او حاجه انت بتحبها
عملوا فرقعة الحجاب ؟؟؟ عشان انت تغير على الحجاب 
تنزل تقف فى مظاهره وتلاقى اخوانى واقف جنبك وبيدافع عن الحجاب برضو
فتتقرب منه لانه بيدافع عن نفس قضيتك رغم انك بتكرهه
هى دى الفكره .. الحملات اللى بتطلع .. انت الرئيس وانت الوزير والكلام دا
مين وراهم؟؟ مين معاهم؟؟ الهدف ايه
انت ممكن تلاقى حد بيكره شفيق نفسه واقف معاك فى الحمله دى
وانت هاتحبه مادام واقف معاك ومزود العدد وبيمثل انه معاك 
واخيرا
الفريق شفيق نفسه تبرأ من الحمــــــــــــــله دى وقال معرفش عنها حاجه !

13- دلوقتى النقطه المهمه.. الامر بسيط والدور على الفريق شفيق
الفريق لما اذاعوا ما يقال انه تسريب من شفيق ضد السيسي
الراجل ظهر على مليون قناه كذب الكلام واعلن دعمه واضحا للسيسي 
اذن يا سيادة الفريق مش لازم تتأخر عن اللى حاصل دا
قبل الموضوع ما يكبر والفنكوش يزيد حضرتك اعمل مكالمه فى قناه واحده
واكيد الكل هايتناقلها بعد كده
قول ان الكلام صح؟؟؟ او ان الكلام غلط ...؟
واقطع الشك باليقين وهات اخر الموضوع 

14- انا اثق فى وطنية الفريق شفيق وكنت احد ممن انتخبوه و لا اصدق انه يريد ان يكون تحالفات امريكيه اماراتيه لزعزعة الاستقرار فى مصر من اجل زعزعة شعبية السيسي للوصول لكرسى الحكم .. انا ماصدقش الان لو هو طلع قال كده .. لان انا ماعرفش ان ولاد الجيش المصرى بيعملوا كده والفريق شفيق خير ممثل لاولاد الجيش المصرى والعسكريه المصريه 

15- انا اثق فى رئيسي الرئيس السيسي جدا ولا اعتقد انه يخشى من شعبية احد ولا يمنع احد للرجوع من وطنه ولا هو رجل الضغائن والاحقاد .. اثق فى رئيسي وشعبيته الطاغيه و اثق فى حبه لمصر والمصريين جميعا و اثق انه ليس صغير لدرجة الخوف من شخص حتى وان كان منافس سياسيا 

16- من هنا لحد 30 يونيو هاتسمعوا كتير
من اول الحرب بين شفيق والسسي
حتى خناقات فى القصر الجمهورى وانقلاب على السيسي
وصولا ان السيسي الشبيه بتاعه عاد مره اخرى والسيسي الحقيقي مات فى حادث موتوسيكل
الاخوان لا دين لهم ! افتكروها كويس وركزوا فى اللى بتتناقلوه 
وكلمه اخيره لانصار مبارك وشفيق والسيسي
انتوا كتله واحده قادره على قهر اى حد بيكره البلد دى
ارجوكم احذروا التفتيت وجنبوا المكاسب الشخصيه وانظروا لمصلحة مصر 

E>E
Eslam Elbahrawy

الفريق شفيق والرئيس السيسيوجهة نظر طبعا الكل شايف الكلام اللى بقاله يومين بيتقال عن الفريق شفيق وانه ممنوع بالامر من...










Posted by