رساله الى الرئيس السيسي بعد اعتذاره للمحامين : انا اسف يا ريس !
انت عارف انى بحبك
وعارف انى بخاف عليك
بس لما اشوف غلط .. واشوف حد بيصطاد فى الميه العكره
لازم انا اتكلم عنه قبل اى حد تانى عشان افسد على اى كلب محاولاته للتسخين
1- ضابط غلط وتعدى على محامى ووصل الامر للنيابه والمحكمه
2- نقيب المحامين قال على ضباط الشرطه انهم بيلبسوا نقاب وانهم بيهربوا من الارهابيين وبيخافوا منهم
3- محامى رفع الجزمه على صورة وزير الداخليه
4- الضابط هايتحاكم وهياخد جزاءه بما انها دولة قانون ومؤسسات
5- نقيب المحامين رغم كده طالب بعمل اضراب لتعطيل مصالح الدوله
وهدد المحامين الغير منضمين للاضراب بتحويلهم للتحقيق فى لنقابه
6- انت يا ريس طلعت اعتذرت للمحامين عن اللى حصل
وهنا ابدأ الكلام
** ياترى ليه بتعتذر يا ريس ؟؟
وياترى الوزير اللى صورته اتهانت بالجزمه والضباط اللى بيموتوا كل يوم واتقال عليهم بيلبسوا نقاب مين هايعتذرلهم
** الموضوع ماكانش بتاعك يا ريس ولا مسئوليتك
انت رئيس دوله مش وزير داخليه
** بكلامى مع احد الاصدقاء قالتلى ان الريس عمل كده عشان يلم الشمل ومايفرقش .. وكان ردى ان للاسف الاعتذار دا هايخلى الكلاب صوتها تعلى وهايخلى كل عيل شمام يدخل قسم يقولك الريس يعتذرلى وهانضيع هيبة الشرطه تانى .. زى ما حصل وكان المسجل خطر بيتقتل ويتحسب علينا شهيد ثوره
** هاتقولى طيب مادام الريس اعتذر .. لازم سامح عاشور يعتذر للضباط والوزير؟
هاقولك غلط ونبقى بنشتغل نفسنا
لان اعتذار سامح عاشور لا يضاهى اعتذار رئيس الدوله
الاعتذار عشان يبقى معادله صح كان يبقى :
وزير داخليه مسئول عن ضباط يعتذر = نقيب محامين مسئول عن محامين يعتذر
كل واحد يعتذر على الخطأ اللى عمله الراجل اللى بينتمى له ولمؤسسته
** ياريت يا ريس بعد كده تترفع عن الحاجات دى
القانون بياخد مجراه وكل يوم محامى بيتخانق مع ضابط
وضابط بيمسك فى محامى والاقسام مليانه كده
لان معروف ان الاتنين اعداء لبعض
** انا عارف وفاهم انك عملت كده عشان تفوت فرصه ان الكلاب تزيط فى الزيطه ويعملوا فيلم وانت قطعت عليهم الفيلم قبل ما يبدأ .. بس صدقنى الطبطبه وشغل النيه الحسنه ماينفعش مع الكلاب دول
** بالمناسبه ياريس المحامى اللى رفع الجزمه اخوانى
وموجود صور له على حسابه بالفيس بوك وهو بيقول يسقط حكم العسكر !
** بالمناسبه برضو
متقلقش من اللى بيصطادوا فى الميه العكره
يعنى ... فى ضباط و امناء بيموتوا
جايز انا وغيرى فعلا بنقول ادى اللى سامح عاشور قال عليهم بيلبسوا نقاب .. مين اتكلم عنهم او اعتذرلهم .. بس بنقول كده من حرقتنا
بس خلى بالك يا ريس تم استغلال كلامك للتسخين ضدك
فى صفحات بدأت تتكلم ان الريس اعتذر لناس قالوا علي الضباط نسوان والضباط لما ماتت محدش اتكلم عنهم !!!
** انا بقولهم ورغم ان الاعتذار دا خانقنى بس ماتتعبوش نفسكم
لان احنا فاهمين اللعبه كويس و امبارح والله كنت قاعد مع ضابط صديقى وقالى بالحرف فكك من الكلام دا احنا فاهمين كويس واللى بيموت مننا مش مستنى حد يتكلم عنه والريس لو عمل كده عمله عشان اخلاقه وعاوز يلم الحوار بس كفايه انه عارف ان الحركه اللى حصلت دى شو اعلامى وسخ عشان داخلين على 30 يونيو والذكرى بتاعتها
** دا كان عتاب رقيق يا ريس
من واحد بيحبك وبيحب البلد وابوه محامى والله
وبالمناسبه والدى مش راضى عن اللى حصل من المحامين
وزعلان من اعتذارك دا .. !
بعد كده يا ريس كل واحد مسئول عن مؤسسته يشيل اخطاءه
نقيب المحامين عنده محامى رفع جزمه يبقى هو يعتذر
وبناء عليه اللى يساوى راس نقيب المحامين فى الداخليه هو وزير الداخليه لانه اكبر راس فى المؤسسه برضو وبالتالى لو غلط ضابط الوزير يعتذر
انما انت خليك بعيد عن الاوساخ دول لان مش بيصونوا حد
** وياريت محدش يقول ان الريس اعتذر لانه رمز بيمثل الداخليه لانها مؤسسه تحت قيادته .. لان لو مشينا بالمبدأ دا ان الريس رمز للداخليه .. هانزعل اوى لما نشوف جزمة المحامى على صورة الوزير اللى هو رمز الداخليه ..فاهمين ؟؟
فياريت مانخلطش الاوراق ببعض
** بالمناسبه يا جماعه
الضابط مخطىء ولازم يتعاقب ومش دى قصتنا خالص
وكل الناس لها احترامها جوا الاقسام مش بس المحامين
الكلام كله حول الشو اللى اتعمل مش حول الواقعه
لان محدش يختلف ان القانون قانون والاحترام احترام
وجهة نظر شخصيه
بس بصراحه مضايقنى ان الريس يتدخل فى حوار
الكل غلطان فيه وهو يعتذر عن خطأ مش بتاعه
وغيره اللى غلط لم يعتذر حتى الان
اخيرا بالنسبه لسامح عاشور اللى قال بيلبسوا نقاب
وللمحامى الاخوانى اللى رفع الجزمه على رمز وزير الداخليه
فى امين شرطه عندى هنا فى طنطا امبارح اتفرتك لما قنبله انفجرت فيه !!!
بقولهالك تانى يا ريس
انت محترم فى زمن الغير محترمييييييين
E>E
Eslam Elbahrawy
انت عارف انى بحبكوعارف انى بخاف عليك بس لما اشوف غلط .. واشوف حد بيصطاد فى الميه العكره لازم انا اتكلم عنه قبل اى حد ...Posted by Eslam Elbahrawy on 8 يونيو، 2015
