مصر بتشحت على اهلها - من صاحب فكرة اعلانات التبرعات من خلال الاستعانه بالاطفال المشوهين؟
#مصر_بتشحت_على_اهلها
دا الانطباع الاول والوسطانى والاخير اللى هايدخل دماغك من كتر اعلانات التبرعات فى رمضان .. للاسف قمة عدم المهنيه فى الاعلانات دى
عاوز اعرف غبى مين فكر ان دى كده تتحسب صدقه وثوابها يكون محفوظ لما نفضح الناس .. يعنى ربنا ورسوله بيقولوا اللى تطلعه بإيدك وانت بتتصدق ..ماتشوفوش الايد التانيه .. تقوم انت تطلع الراجل المريض ولا المحتاج تشوفه امة لا اله الا الله !
عَنْ أَبِي هُرَيْرَةَ عَنِ النَّبِيِّ صلى الله عليه وسلم قَالَ :سَبْعَةٌ يُظِلُّهُمُ اللَّهُ فِى ظِلِّهِ
يَوْمَ لاَ ظِلَّ إِلاَّ ظِلُّهُ الإِمَامُ الْعَادِلُ ، وَشَابٌّ نَشَأَ فِى عِبَادَةِ رَبِّهِ ، وَرَجُلٌ قَلْبُهُ مُعَلَّقٌ فِى
الْمَسَاجِدِ ، وَرَجُلاَنِ تَحَابَّا فِى اللهِ اجْتَمَعَا عَلَيْهِ وَتَفَرَّقَا عَلَيْهِ ، وَرَجُلٌ طَلَبَتْهُ امْرَأَةٌ ذَاتُ
مَنْصِبٍ وَجَمَالٍ فَقَالَ إِنِّى أَخَافُ اللَّهَ . وَرَجُلٌ تَصَدَّقَ أَخْفَى حَتَّى لاَ تَعْلَمَ شِمَالُهُ مَا
تُنْفِقُ يَمِينُهُ ، وَرَجُلٌ ذَكَرَ اللَّهَ خَالِيًا فَفَاضَتْ عَيْنَاهُ.
صدق رسول الله صلى الله عليه وسلم
__________________________
اعلانات البنات المحروقه عافاهم الله وشفاهم
انت مفكر انت كده بتكسب عطف
يا غبى انت نفرت الناس من الاعلان والله
الشكل مش كويس .. انت نفسك ياللى عملت الاعلان .. لو قعدت تتفرج عليه من بشاعة المنظر هاتودى وشك الناحيه التانيه .. مش قرف ولا عدم اهتمام .. انما لان المنظر مانقدرش نتحمله ..يبقى هنا ضيعنا الهدف من الاعلان لان الاعلان اصلا معمول عشان نكمله للاخر ونتأثر بيه .. اعتقد كان اولى انك تجيب ستاره وهما يتكلموا من وراها .. وبكده يوصلنا احساس ان الناس دى لان احساسهم بالعجز مخليهم مكسوفين يظهروا قصاد الناس ف احنا لازم نعالجهم عشان يظهروا..
اعتقد لو فى حد فيكم كان يفهم تسويق .. كان لازم يعرف مبدأ مهم فى التسويق وهو الحافز . الحافز اللى كان يخلينى اتبرع .. انت بقالك سنين كل سنه تجيب حالات محتاجه محتاجه محتاجه .فين التغيير؟؟؟ الناس هاتزهق .. انما كان من السهل بذكاء تجيب حاله من رمضان اللى فات كانت محروقه او مريضه او محتاجه ..وتقول ان بعد تبرعاتكم عملنا العمليه وبقت كده ..او جيبنالهم مصدر رزق وبقوا كده..بالتالى وانا بتفرج هايكون عندى حافز اتبرع السنه دى عشان اغير حال الناس
شخصيا الاعلان الوحيد اللى بتفرج عليه
هو اعلانمؤسسة مجدى يعقوب بتغنى فيه عفاف راضى
اعلان فيه موسيقى هاديه وصوت جميل وكلمات راقيه
العبقرى عمرو مصطفى عامل لحن يأثر فيك وانت بتسمعه
صور الاطفال والمشاهد تفرح بين مستشفى نضيف واطفال بتضحك
تخليك تتفائل مش تنفر من الاعلان
😊 حلوه ابتسامته لو ماقالش اّه 😊
E>E
Eslam Elbahrawy