الفن بيهدم مصر - مسلسل استاذ ورئيس قسم - هل ينتفض اساتذة الجامعات لمشهد ضرب الاستاذ الجامعى بالجزمه
شارك #الفن_بيهدم_مصر
مسلسل #استاذ_ورئيس_قسم
ياترى لسه برضو عاوزينا نستنى نكمل المسلسل اصله هايتحول ويكشف لنا ان النخبه وحشه ؟؟؟
بعد مشهد ضرب الطالب للدكتور الجامعى على قفاه فى الحلقه اللى فاتت
والحلقه السابعه بيضرب الدكتور زميله بالجزمه !!!
هو دا الفن اللى عاوزين تصدروه للناس
فى زمن اصلا مش محتاجين الفن بتاعكم لان البلد خربانه خلقه
من غير ما تطلع الدكتور بيضرب زميله بالجزمه
والطالب الجامعى بيضرب الدكتور بالقفا
اصلا موجود عندنا طلبة قليلة الادب كفايه
ياترى بقى بعد المشهد دا هل هاينتفض دكتور جامعى واحد للحفاظ على كرامة الدكاترة الجامعيين ..لان كلمة دكتور او استاذ جامعى دى كان زمان ليها احترام وتقدير وهيبه
ياترى هانشوف اعتصام ؟؟
هانشوف احتجاج ؟؟
هانشوف بيان من وزارة التعليم العالى تشجب فيه ما جاء فى المسلسل ؟
بصراحه شخصيا معتقدش
اصل مين اللى هانيتفض لصالح الطلبه والدكاتره ويحافظ على سمعتهم؟
الطالب اللى بيتظاهر ويكسر ويحرق؟؟
ولا جابر نصار مثلا؟؟ ولا باقى روؤساء الجامعات؟
اللى فى عهدهم الطلبه قلعوا الدكتوره هدومها وصوروها عريانه
واللى فى عهدهم قالك اصل الشرطه ماتدخلش الحرم الجامعى
واللى فى عهدهم الطالب كسر وحرق وقالك اصل دول بيعبروا عن الحريه
ماعتقدش ان فى رئيس جامعه فى مصر له عين يحتج على اللى جه فى المسلسل .. لان اصلا اللى عمل المسلسل لو كان شايف منهم هيبه وحفاظ على مقامهم..كان خاف وماكانش صورهم بالشكل دا !
** كل مهنه لها اللى بينتفوا عشانها
الصحفى لما بيتمسك فى مظاهره ولا يحتك مع حد فى قسم .. نقابة الصحفيين تانى يوم تطلع تقولك وا صحفياااااه
** المحامى اللى بيدخل قسم وبيتخانق مع ضابط .. بيطلع تانى يوم سامح عاشور يقولك الداخليه بتلبس نقالب وبيعملوا باللوووو كبير اوى !
** ياترى بقى الاساتذه الافاضل فى جامعات مصر هايكون لهم صوت نسمعه؟؟
ولا .. لا حياة لمن تنادى
** اتذكر مرتضى منصور ( تختلف او تتفق معه )
بسبب فيلم الافوكاتو اللى عمله عادل امام .. مرتضى منصور كان وقتها قاضى .. ولما شاف الفيلم اساء للمحامى وللقاضى.. حكم على عادل امام بالحبس .. ولما تم وقف تنفيذ الحكم ..اعترض مرتضى منصور واستقال من منصبه كقاضى لان تم اهانة مهنته ولم ينصفه احد .. ولكنه عالاقل كان راجل واعترض .. نتمنى بقى نشوف راجل يعترض .. وياريت محدش يكلمنا عن الصبر على المسلسل .. احنا قولناها خلاص..الانطباع الاول بيدوم ..والمشاهد لو اتعرضله العكس بعد كده مش هايقتنع بيه !
** شاركوا فى الحمله دى #الفن_بيهدم_مصر
اى لقطه سلبيه انشروها .. خلوا الهاشتاج ينتشر .. خلوا الكل يشوف
E>E
Eslam Elbahrawy