اخيرا حلقة لبرنامج فى مصر رأيت فيها الاحترام والاخلاق - قيم كانت قد ماتت فى مصر




اخيرا حلقة لبرنامج فى مصر رأيت فيها الاحترام والاخلاق - قيم كانت قد ماتت فى مصر 


اخيــــــــــــــــــرا 

حلقه .. فى قناه مصريه .. برنامج 
اقدر اسميها اعلام 

** بصوا .. بعيدا عن الاسماء واراءنا فيها واختلافنا عليها .. انا هاتكلم عن المحتوى مش الشخصيات **

** اللى قصاد حضراتكم دا اسمه سيف زاهر .. بيقدم برنامج رياضى على قناة الحياه
فى حلقة امبارح كان استضاف احمد شوبير ضيف الحلقه 

** امبارح .. اقدر اقول ان دى اول حلقه اقعد اتابعها فى اى برنامج على التلفزيون المصرى و احس ان فى حاجه محترمه لمحتها عينى من بعد نكسة 25 خساير !

** ليه بقول الكلام .. عشان شوفت حاجات افتقدناها من زمان فى الحلقه دى 

1- فى الحلقه .. حازم امام الكبير لاعب نادى الزمالك السابق والمحلل الرياضى حاليا
اتصل يعمل مداخله عشان يتكلم مع شوبير 
فى وسط الكلام حازم بيقول لشوبير يا كابتن احنا اتعلمنا الاعلام على ايدك 
وانت بالنسبالنا مرجع فى الاعلام الرياضى 
وفجأه حازم المتربى ابن الناس يفتكر انه فى وسط الكلمه قال لشوبير ( إنت )
قاله انا اقصد اقول ( حضرتك يا كابتن ) 
( يـــــــــــــاه .. احترام الكبير؟؟ دى حاجه انا كنت نسيتها من زمان اوى فى مصر ) 

2- المكالمه التانيه بعد شويه كانت من مدرب حراس المرمى اللى كان بيدرب احمد شوبير ايام كاس العالم 1990 .... اسمه الكابتن حازم كرم 
طبعا حازم كرم كان بيدرب شوبير فأكيد اكبر منه بكتير فى السن
لكن حازم كرم انا شخصيا راجل بحب الكوره وعمرى ما سمعت اسمه
وشوبير مشهور جدا
فدخل الراجل المكالمه وبيقول لسيف زاهر انا بشكرك لانك جايبلنا نجم كبير واعلامى كبير
فيقاطعه شوبير ويقوله :
لا يا كابتن .. لما تتكلم عنى تقول تلميذ من تلامذتى الصغيرين او عيل من عيالى
ماينفعش يتقال عليا نجم وانت موجود انت كابتنى وابويا !!!!!!!!!
( البرنامج دا فى مصر؟؟ .. مصر اللى الكل بيشتم والصغير بيهزأ الكبير .. عمار يا مصر )

3- المداخله التالته .. كانت من عصام شوبير اخو احمد شوبير
فتلاقى شوبير الصغير يقولك دا مش اخويا .. دا ابويا واخويا وهو اللى ربانى 
لكن المفاجأه انك تلاقى عصام الاخ الكبير طالع قصاد الكل على التلفزيون
يقول احمد زى ابنى الكبير .. ومش هاتكسف وهاكررها اكتر من مره
احمد خيره عليا وعلى بيتى وعلى بيوت اخواته وعماته وخلانه !!!
تخيل اخ كبير بيذكر ان اخوه خيره على بيته
فى زمن الاخ بيقتل امه وابوه عشان عشره جنيه !

4- المداخله الرابعه كانت من حارس مرمى منتخب مصر عصام الحضرى
عصام وشوبير كان بقالهم سنه بيشتموا فى بعض 
بسبب كلام وصل غلط لعصام الحضرى ان شوبير شتمه 
عصام دخل فى مكالمه فى البرنامج
قال بالنص :
انا اسف يا كابتن
انا غلطان 
انا فى ناس سخنتنى ..انا محقوقلك وببوس على راسك
انت الكابتن بتاعى واول واحد استقبلنى فى القاهره لما جيت من دمياط
حقك عليا وانت الكبير وانا تلميذ عندك !!
( يا نهار ازرق .. دا بجد ..؟ مصر اللى بقالنا خمس سنين الناس كلها بتعمل الغلط وتكابر فيه .. بسمع فيها مكالمه حد بيتأسف لحد .. حد بيعترف بخطأه .. حد بيعترف بجميل حد عليه ..؟ .. لالا انا بحلم )

** ممم
لاحظوا ان المداخلات دى كانت فى اوقات متقطعه 
بس انا جمعتها وحملت البرنامج واتفرجت عليه تانى عشان القط المكالمات دى
انا بقالى خمس سنين بشوف توك شو فيه سب دين وشتيمه وفضايح وتخوين وقلة ادب والتراس بيكسر ويشتم الكبير وشباب مالوش كبير ! 

** بس لما فكرت برضو
قلت ماهو حازم امام ..
ابن الكابتن الكبير حماده امام والدكتوره المحترمه ماجى الحلوانى
واحد خارج من بيت محترم ومش واحد من الالتراس !

عصام الحضرى 
جاى من دمياط .. بلد الجدعنه كلها والاحترام 
برضو جاى من كفر البطيخ .. الفلاحين اللى عندهم الاصول قبل الاكل والشرب 
وبرضو مش واحد من الالتراس 

** عصام شوبير من طنطا .. من عندنا فى شارع الحلو
واحنا برضو طنطاويه جدعان اتربينا على احترام الكبير 

** اخيرا عجبنى الكلمه اللى وجهها شوبير للالتراس 
لما قالهم زمان ماكانش فى التراس
معنى حب الاهلى انك تبقى طفل ( بيتكلم عن نفسه ) بتحلم تلعب فى النادى الاهلى .. بتركب القطر الحربى وتنام وانت واقف عشان تلحق اختبارات النادى الاهلى .. بتنام على الارض وعلى ترابيزات البنج بونج جوا النادى لان مالكش مكان لان انت لسه فى الاختبار 
هو دا حب النادى الاهلى

قالهم جمهور الاهلى عمره ما كان شماريخ ولا تكسير ولا حرق 
جمهور الاهلى اللى اعرفه ايام ما كنت كابتن وكانوا يتعصبوا فى الملعب
اروح اشاورلهم بصباعى اقولهم اسكتوا .. بيسكتوا ويحترمونى 
مش دلوقتى بيدخلوا جوا النادى يشتموا لاعيبه واداره 

** انا هاختم البوست زى ما بدأته .. انا ماليش دعوه بالاسماء 
تعترضوا عليهم او لا .. انا بتكلم عن حاله شوفتها ورجعتنى لايام جميله 
فكرتنى بحاجات نسيتها .. الاحترام والاداب وتقدير الكبير والعرفان بالجميل 

يارب كل يوم افتح صدفه الاقى برنامج كده 

E>E
Eslam Elbahrawy

اخيــــــــــــــــــرا حلقه .. فى قناه مصريه .. برنامج اقدر اسميها اعلام ** بصوا .. بعيدا عن الاسماء واراءنا فيها ...










Posted by