الجيش المصرى دائما رمز للاحترام - الراحل نور الشريف فى مشهد عبقرى



الجيش المصرى دائما رمز للاحترام - الراحل نور الشريف فى مشهد عبقرى

( الجيش المصرى - رمز الانتماء والرجوله - احترامه محفوظ من زمان ) 

فى رائعه من روائع الراحل العبقرى نور الشريف 
اللى فعلا بيجسد العبقريه فى هيئة فنان 
كنت بتفرج على فيلم ( الحقونا )

قصة الفيلم عن مواطن غلبان دخل مستشفى يعمل عملية واتسرقت الكليه بتاعته 
المشهد دا بجد عجبنى اوى 

المواطن الغلبان ( نور الشريف ) راح يبلغ فى قسم الشرطه ان كليته اتسرقت 
ضابط الشرطه تهكم عليه .. فقرر المواطن انه يروح لمدير الامن 

لما دخل لمدير الامن دار بينهم الحوار التالى واللى لفت نظرى جدا :

- بقى هما سرقوا كليتك؟
- ايوه يا باشا سرقوا كليتى ومصوا دمى كمان 
- انت عملت عمليات قبل كده؟
- ايوه يا باشا عملت البواسير وانا فى الجيش
- يرد مدير الامن : مش يمكن بتوع الجيش هما اللى ....؟
- يقاطعه نور الشريف : لا يا باشا الجيش لو كان عاوز كليتى كان اخدها بالامر .. انما مايسرقهاش ! 

** مشهد 30 ثانيه بس استوقفنى كتير اوى 
الفيلم انتاج سنة 1989
ومشهد بيجسد تفكير الشعب المصرى فى الجيش
لو عاوز كليتى بالامر ياخدها ؟؟ .... انتماء 
انما مايسرقهاش ؟. .... يعنى ثقه فى الجيش 

دايما بحب افرق بين الفن زمان وبين الفن دلوقتى 
والامر واضح جدا
كل افلام ومسلسلات حرب اكتوبر وابطال المخابرات جسدتها اعمال التمانينات والتسعينات
لكن مع دخول الالفيه .. حلت علينا اللعنه والخراب فى الفن
ماشوفناش مشهد واحد بيجسد دور لاى بطل من ابطال مصر 
رأفت الهجان .. الرصاصه لا تزال فى جيبي .. دموع فى عيون وقحه .. الطريق الى ايلات .. حكايات الغريب .. الحفار .. السقوط فى بئر سبع .. وغيرررهم عشرات الافلام والمسلسلات اللى اتربينا عليها بتعرفنا قيمة الجيش والوطن ومعنى الانتماء .. وكلها تم انتاجها قبل الالفيه الملعونه ما تدخل علينا 

E>E
Eslam Elbahrawy

( الجيش المصرى - رمز الانتماء والرجوله - احترامه محفوظ من زمان ) فى رائعه من روائع الراحل العبقرى نور الشريف اللى فعل...










Posted by