هام جدا - محمد صبحى وبرنامجه الجديد - اشارات ماسونيه ام مضاده للماسونيه



هام جدا - محمد صبحى وبرنامجه الجديد - اشارات ماسونيه ام مضاده للماسونيه 



هام جدا .. ضرورى جدا .. ( وجهة نظر شخصيه ) 

من امبارح عمال يجيلى رسايل كتير عن محمد صبحى وبرنامجه 
والاغلبيه بيتكلموا فى نقطتين ..
الاولى انه برضو بيهاجم الدوله او بينتقدها 
والنقطه التانيه الصوره اللى قصاد حضراتك انه عامل ( عين واحده )

اللى هاقوله دا من منطلق تفكير شخصى قد اخطىْ وقد اصيب 

اولا هانشر مره تانيه جزء من كلامى او رسالتى للفنان صبحى بعد اول حلقه 

1- ناس كتير بعتتلى رسايل فى فترة غيابى وشوفتها لما رجعت وكانت كتير من الرسايل بتطالبنى بالتعليق على البرنامج وكان كلامهم انه بيذكر الحكومه ! 
وهنا نقطه ومن اول السطر
لازم تواجهوا نفسكم .. انتم فعلا عاوزين مجتمع بمعنى الكلمه 
ولا عاوزين تطبيل فقط 
انا عارف اننا مرينا فى الخمس سنين الاخيره بكل ما رأيناه فى الاعلام والفن جعلنا نكره كل شىء بيقدمه الاعلام وبيقدمه الفن ..
ولكن ... لازم الاول نواجه نفسنا
احنا عاوزين مجتمع وحياه طبيعيه فيها اجاده وتقصير
وفيها ناس بتشاور للغلط عشان تصلحه ولكن بالطريقه اللى تتماشى مع عاداتنا وتقاليدنا وبدون الفاظ خارجه... ولا عاوزين برامج تفضل تقول الحياه بقى لونها بمبى وبس اعتقادا منكم ان دا لصالح البلد ولصالح الريس اللى انتوا بترفضوا تسمعوا اى انتقاد حتى لموظف صغير خوفا منكم ان دا يأُثر على السيسي وماتعرفوش ان انتوا كده بتضروه لان مليون مره قولنا اللى يحب حد يشاور على اخطاءه عشان يصلحها مش يهز دماغه وبس

2- مستبشر خير بالبرنامج لان اعتقد اّن الاوان ان حد يواجهنا بمشاكلنا ولكن بدون خداع وبدون تقارير مصوره من يظهرون فيها يتم تأجيرهم . وبدون الفاظ جنسيه خادشه وبدون ايحاءات سافله وبدون توجهات او اچندات او ميول او احقاد .

3- لازم نعترف ان كل مجتمع مش مصر بس اكيد فيه سلبيات 
وطبيعى لازم حد يتكلم عنها 
لكن زى ما قولنا الفيصل . هل هاتتكلم عشان تقدم حلول وتشاور عليها بعين المصلحه ولا عشان السبوبه وشوية الكلام الجنسى اللى هايجيب اعلانات؟
هذا هو الفرق الذى ننتظر حدوثه فى برنامج الاستاذ صبحى 

4- لازم نعترف من جوانا وبصدق ان مفيش بشر كامل
وبما ان الرؤساء بشر فطبيعى لهم اخطاء وكذلك الوزراء والمحافظين واى مسئول
بعد الحلقه الاولى ناس من اللى بيحبوا مبارك زعلوا لان صبحى قلد مبارك
وناس بيحبوا ناصر زعلوا انه قلد ناصر
وناس بيحبوا السيسي زعلوا لان صبحى اتكلم عن الحكومه
يا جماعه الامر ابسط من كده .. ازاى نزعل على سلبيات مالهاش علاقه بشخص الحاكم
انا من محبى مبارك طبعا لكن مازعلتش لان طبيعى كان فى عهده اكييييد فى اخطاء
انا من محبى رئيسي السيسي ومازعلتش لما الاستاذ صبحى انتقد الحكومه 
لان اولا هى انتقادات صح .. وثانيا الريس نفسه بيغير حكومه ووزراء ومحافظين لان مش عاجبه اداءهم

5- رساله للاستاذ صبحى ومحبيه 
مفيش شىء مطلق وانا شخصيا مش من اصحاب الحكم المطلق 
يعنى مادام بنشوف محتوى كويس هانشكر فيه وهانقدره
لكن فى اى حلقه لو شوفنا محتوى مش صح او مخالف او مش صادق اكيد هانتكلم
وبذكر الكلام دا عشان لو حصل بعد كده وطلعت قلت عن حاجه مش عاجبانى فى البرنامج
مايجيش حد يقولى امال اول حلقه كنت بتشكر فيه ليه

__________________________________

انتهى الجزء الخاص برسالتى 
والجزء دا رد على الناس اللى بتقول انه بيهاجم او بينتقد الحكومه
اصحوا يا جماعه .. التطبيل مش هوا الحل
لكن الفيصل .. هل هايشاور على المشكله باحترام عشان الدوله تصلحها
ولا هايسخر منها بقلة ادب زى الاراجوز !!!!

مفيش دوله بتعيش بحياه لونها بمبى ولو مش عاوزين حد يقولكم على الغلط ومفكرينه كده بيأذى الريس؟؟ لا والله .. دا بيفيده .. مادام بيعرضله مشاكل لو كبرت هاتكون سبب فى تقليل شعبية الريس..ولا ااايه؟

________________________________

ثانيا الجزء الخاص بالصوره 

1- ناس كتير قالت مادام الصوره بعين واحده يبقى الراجل ماسونى
فى اعتقادى الشخصـــــى ان اللى عمل فارس بلا جواد ماينفعش يبقى ماسونى 

2- انا ركزت فى الصوره اوى ...
ليه محدش فهم الصوره بمنظور اخر
ان الاستاذ قد يكون عامل العلامه بالعين الواحده
لكن بإيده التانيه عامل علامة ( ستوب ) او اقف عندك او كفايه
ليه ماتكونش رساله منه بما انه فاهم الماسونيه وعامل عنها مسلسل
انه بيقول للماسون .. كفايه .. !!
هل حد لاحظ شكل ايده وحد فكر فى التحليل دا؟؟

3- بخصوص ظهوره فى قناة CBC 
عاوز اعترف لكم اعتراف .. مشيت على مبدأ .. ومازلت ماشى عليه وللاسف اكتشفت انه غلط غلط غلط غلط .. خسرنى كتير من الوعى اللى كنت بسعى انى اكشفه للناس
دايما كنت اقول مش هاظهر فى القناه دى لان صاحبها كذا..او مش هاطلع فى القناه دى لان فيها مذيع كان ضد البلد .. وفضلت ارفض .. وكانت النتيجه ايه:
اللى بنشره فضل يتنشر فقط على الفيس
بينما الخونه والعملاء اتسعت لهم الساحه وهما اللى ظهروا لوحدهم فى كل القنوات 
لذلك .. لو عاوزين نعالج لازم ندخل القنوات دى مادام مش هايتحكموا فى المحتوى
محمد صبحى او غيره مفيش قصاده اى قناه تانيه لان كل القنوات بلا استثناء عليها شبهات
لكن ..يقعد فى البيت؟؟ ويسيب المجال لباسم وفاهيتا ؟؟
نخلى الشيخ على جمعه يقعد من قناة CBC ونفتح المجال لشيوخ الفتنه اللى بيحللوا الزنا والخمر؟؟

القعده فى البيت مش بتخسر الاعداء .. بتخسرنا احنا 
لابد من وجودنا وسطهم عشان يكون فى توازن 
لان حرب الفيس بوك امام التلفزيون خسرانه
اللى انا بكتبه فى سنه ممكن اى عميل يطلع حلقه فى التلفزيون يشوفه ملايين اكتر من اللى كانوا بيقروا كلامى فى السنه دى 

انا كده وضحت
وبكرر وجهة نظر شخصيه
وبكرر لو ظهر حاجه غلط هانتكلم والحكم مش مطلق سواء سلبا او ايجابا 
لكن حبيت ارد على البعض

E.E
Eslam Elbahrawy


هام جدا .. ضرورى جدا .. ( وجهة نظر شخصيه ) من امبارح عمال يجيلى رسايل كتير عن محمد صبحى وبرنامجه والاغلبيه بيتكلموا ف...










Posted by