شهاده موثقه من احد ضباط سجن ابو زعبل - مفاجاّت وتفاصيل دقيقه حول فتح السجون اثناء احداث يناير 2011
بسم الله الرحمن الرحيم
** شهاده موثقه من احد ضباط سجن ابو زعبل **
** طبعا مازال الكثير من النكسجيه بيحاولوا يتكلموا عن مفيش عناصر خارجيه خربت مصر فى 25 يناير ومفيش حد فتح السجون وان الداخليه فتحت السجون
** قبل سرد الشهاده ...
كان دايما فى كام سؤال توجهه لاى نكسجى ومش بيعرف يرد عليهم
1- لو الداخليه فتحت السجون .. ليه فضلت تفتح سجن فى الصحراء؟ مافتحتش ليه السجون اللى جوا المحافظات اللى فيها القتله والحراميه وبكده ترهب الناس اكتر ؟؟
2- لو الداخليه فتحت السجون
ليه ابراج المراقبه الخاصه بالحراس كانت مضروبه بأسلحه ثقيله؟
3- لو الداخليه فتحت السجون
ليه زى ما شوفنا بالفيديو كان عربيات دفع رباعى بتضرب على السجن من برا وبيتم الرد عليها من جوا ؟
4- لو الداخليه فتحت السجون .. ليه سمعنا شهادة مساجين قالوا ان فى ناس دخلت قالتلهم يا تهربوا يا هانضربكم بالنار وكانت لهجتهم غير مصريه وملثمين؟
** انتهينا من الاسئله .. دلوقتى جه وقت شهاده من احد الضباط اللى خدموا فى سجن ابو زعبل يوم فتح السجون .. كالعاده اعمى البصيره النكسجى مش هايصدق حتى لو شاف الجناه بنفسهم بيعترفوا .. لكن دى شهاده من ضابط بالتفصيل .. لحظه لحظه وثانيه بثانيه
____________________________________________
1- بمناسبة موضوع هروب المساجين يوم 29 يناير اللي ناس لسه بتهري فيه..واللي بتتهم فيه وزارتنا بالتخاذل والتواطىء..وبتتهم الظباط انهم فتحوا السجون
2- مبدئيا انا كنت شغال في سجن ابو زعبل ..منطقة سجون ابو زعبل دي عباره عن 4 سجون ..ليمان 1 وليمان 2 وسجن شديد الحراسه والسجن العسكري..
3- انا كنت شغال في سجن ابو زعبل شديد الحراسه ..السجن ده كان مخصص وقتها للمعتقلين السياسين التكفيرين والجهاديين..مكنش فيهم ولا واحد اخواني
4- كان عدد المساجين فيه حوالي 200 مسجون بس ..كلهم من التكفيرين اللي الجيش بيخلص عليهم ف سيناء دلوقتي او خلص عليهم من فتره..
5- كان من الاسماء المسجونه ف السجن ده طبيب اسامه بن لادن كان اسمه رمزي الموافي..وكمال علام اللي الجيش خلص عليه من شهرين تلاته ..وغيرهم كتير
6- يوم 28 يناير كان كل ضباط السجن موجوده ..كان يوم جمعه..وكنا بنصلي ف الجامع بتاع السجن والدنيا رايقه خالص عندنا مافيش حس لمسجون ..
7- وده لان يوم الجمعه يوم اجازه..الزنازين مابتفتحش خالص على مسجون مهما حصل..يعني مافيش تريض للمسجون مافيش عياده ..الخ..
8- واحنا بنصلي .سمعنا صوت قوي جدا ..صوت مرعب ..سيبنا الصلاه وجرينا عالعنابر نشوف في ايه..سمعنا صوت كمال علام (الارهابي التكفيري) ده جوه العنبر
9- مافتحناش باب العنبر ..بصينا م الشراعه ( فتحة صغيره فى الباب ) لقينا كمال ده زي التور الهايج بيكسر جوه العنبر ف ابواب الزنازين..وعمال يقول الله اكبر...تكبيييير ..
10- طلعنا مخبر فوق سطح العنبر من فوق..قالنا ان باب الزنزانه بتاع كمال علام مكسور ..وده كان سبب الصوت انه وقع الباب من حلقه..
11- المأمور اتصل بوكيل المنطقه وقتها اسمه اللواء /شوقي الشاذلي قاله عاللى حصل الوكيل قاله ماتتصرفش الا لما ابعتلك فرقة عساكر تقتحم العنبر
12- خمس دقايق بالظبط وصلنا حوالي 30 عسكري بقائدهم قالنا هانقتحم العنبر ورسم الخطه.وكيل المنطقه وقتها قاله استنى ابلغ مساعد الوزير اخد منه الامر
13_ اتصل بالمساعد وقتها اللي هو اعلى راس في مصلحة السجون كان اسمه اللواء عاطف شريف ..قاله ماتقتحموش طالما باب العنبر منكسرش..
14- قال لو كسروا باب العنبر بس وحاولوا يخرجوا خلصوا عليهم وقتي غير كده سيبهم جوه.فضلنا قاعدين ظباط السجن والعساكر وقائد الكتيبه ووكيل المنطقه
15- قاعدين ادام العنبر مستنيين.طبعا كانت الساعه وصلت 3 العصر وبدأت فعاليات جمعه الغضب بقى قلق ف كل حته..والمساجين ف ال3 عنابر بيكبروا كل شويه
16- مش عارفين في ايه..دخلنا استراحة الظباط شغلنا التلفزيونات لقينا الدنيا مقلوبه..المأمور ادى تعليماته وقال اقطعوا الكهربا عن المعتقلين..
17- عشان التلفزيونات وقتها كانت ناقله بقى اللي بيحصل ف الشارع وفعاليات جمعة الغضب..فقالنا الحاجه دي هتهيجهم اكتر وهايقرفونا
18- قطعنا عنهم الكهربا ف الزنازين قعدوا يخبطوا عالابواب..ياكفره..يامجرمين..وشتايم بقى لحسني مبارك والنظام والداخليه ..الخ
19- عالساعه 5 ونص كان بدأت اخبار الهجوم عالاقسام..قسم الزاويه..قسم الزيتون..المطريه..الجماليه..الخ بصراحه يومها اتوترنا..قلنا ايه ده
20- وقعدنا ندعي ربنا ان الدنيا تتلم..بس مش ف بالنا خالص انهم هايهجموا على سجننا اصلا..ولا حد هايجرؤ انه يقرب ناحية منطقة سجون ابو زعبل..
21- المساجين ف الزنازين شغالين تخبيط على ابوابها..بالحلل ..ازعاج رهيب ويوتر الواحد..والعساكر واقفه تعبت م الوقوف..
22- كمال علام كان بيبص من شراعة العنبر ويقول للعساكر ..اقتلوا الكفره اللي مشغلينكم كلاب عندهم..احنا لو طلعنا هنقتلكم معاهم..خلوكم معانا
23- العساكر كل مايسمعوا القائد بتاعهم يقولهم صيحه فيقولوا (مصصصصر) بصوت عالي وهكذا ..العساكر اتفرهدت..والظباط اتفرهدت..ومستنيين العنبر يفتح
24- عالساعه 9 بالليل لقينا مدير مكتب امن الدوله ظابط ومعاه العساكر والسلاح بتاع المكتب بتاع شبين القناطر (بلد جنب السجن) جه سلم السلاح
25- سألناه هو في ايه؟قالنا الدنيا قلق والناس غضبانه بره وهايدمروا اي مقر شرطي عشان كده جيت اسلم السلاح لأقرب كتيبه مني ..قلقنا اكتر
26- عالساعه 10 ونص بالظبط كان خبر ضرب قسم الخانكه واقتحامه..(الخانكه جنبنا) وبعد شويه كمين ابو زعبل انضرب ????
27- وفجأه بدأت اخبار بقى ان وزير الداخليه هايطير ..احمد نظيف هايمشي...والريس هايكلم..استنينا خطاب الريس بفارغ الصبر عشان البلد تهدى
28- الريس اتكلم وسمعنا خطابه كلنا.وقولنا كده فل..الدنيا خلاص هتهدأ و قعدنا نكلم شويه مطمنين بنسبة 60% و 40% قلق وقسمنا نفسنا ناس تنام وناس تسهر
29- نمت يومها الساعه 7 الصبح 29 يناير 2011 السبت ..وعالساعه 11 ونص بالظبط لقيت العسكري اللي شغال معايا دخل الاستراحه وبيصحيني بعنف..
30- قلتله في ايه يا محروس؟ قاللي اصحى ياباشا في ضرب عالمنطقه من بره؟منطقة مين يابني قاللي السجن..قلتله ..ازاي بجد؟فين؟ قاللي ياباشا في قلق
31- صحيت مفزوع.لبست هدومي القميص الابيض والبنطلون الاسود وملبستش البلوفر اللي عليه النجوم.وفتحت الدورج بتاع المكتب خدت المحفظه فيها كارنيهاتي
32- وسيبت مذكراتي ودفتر التوفير بتاع البوسطه قلت هارجع اخدهم وانا مروح..طلعت ف حوش السجن لقيت العساكر اللي قدام العنبر مشيت
33- مشيوا عشان يروحوا ليمان ابو زعبل 1 اللي بدأ من عنده الهجوم ..لوادر كبيره بتهد ف سور ليمان 1 اللي بيبعد عننا حوالي 500 متر مثلا
34- وصوت ضرب النار ف كل حته ..والعنابر عندنا لسه مقفوله والمساجين بيخبطوا عالزنازين بصوره مفزعه..اتلمينا كلنا جوه حوش السجن اودام بوابته..
35- المأمور وقف وسطنا دقيقه بالظبط وبعد كده خرج..معرفناش راح فين..رجعلنا بعد 10 دقايق معاه سلاح آلي والطبنجه بتاعته وقال لنا بصوا يارجاله..
36- انا ماتولدتش اكون مش راجل ....هادافع عن السجن لحد اخر طلقه اللي عايز يمشي يتفضل واللي عاوز يقعد يتفضل..مش هاجبر حد انه يقعد..وقال لأمين البوابه
37- قاله يا اشرف اي ظابط او فرد عاوز يروح افتحله خليه يتفضل..قلناله لا ياباشا هنفضل هنا ..قال كله يروح الكتيبه ياخد سلاح آلي ويجي ..
38- خدت طبنجتي وروحت عالكتيبه لقيت عساكر فاتحه صناديق السلاح وبتحدف لكل اللي يخش من الضباط والافراد سلاح..في دقيقه كده وبسرعه..
39- خدت سلاح اّلي وخزنتين طلق ..ورجعت على سجني ..بضرب بعيني كده..لقيت ليمان 1 المساجين عملت هدومها احبال وبيهربوا من على سوره..
40- المأمور قالنا ليمان 1 وقع مافضلش غيرنا احنا وليمان 2..وقسمنا .ظباط تطلع فوق ابراج الحراسه مع العساكر فوق وظباط تقف ادام البوابه وظباط جوه
41- السجن بتاعنا كان صغير حواليه 4 ابراج حراسه. كنت ليا الشرف اني كنت فوق برج منهم..امين الشرطه دخلني وقفل عليا الباب من بره عشان محدش يطلعلي
42- طلعت فوق البرج لقيت العسكري ..قلتله بص خلي سلاحك انت موجه جوه السجن ناحية العنابر اي مسجون يهرب كومه مكانه وش متستناش عليه..
43- وانا هاحمي ضهرك وهاقف في مواجهة الجنينه اللي ورا السجن وسكة القطر لانها مكشوفه المهم انت محدش يهرب منك قاللي ماشي
44- سامع صوت ضرب النار وقتها عالي جدا طلقات متواصله ..عالساعه 4 كده الصوت هدي جدا..اتصلت بالمأمور كانت الشبكه واقعه وقتها..اول مارد عليا
45- قاللي يامحمد خلاص دخلوا ليمان 2 كمان..اهرب يامحمد قبل مايدبحوك ..كنت انا وظابط اسمه عمرو على برج 4 اللي فاضلين بس ..
46- ليمان 1 كان هرب من ساعه وليمان 2 المساجين بتهرب ..مافضلش الا سجن شديد الحراسه ..ومفضلش ضباط غير انا وعمرو ده ..
47- نزلت انا والعسكري عشان نمشي ونهرب ..لان خلاص المنطقه احتلت من الملثمين اللي مش عارفين هما مين اصلا وقتها ولوادر بتكسر في كل اسوار المنطقه
48- لقينا الباب بتاع البرج مقفول.????..طب هنهرب ازاي طلعت تاني انا والعسكري وبعدين نزلنا تاني قلت اضرب الباب طلقه بس كان حديد فخوفت يعمل سكترما
( سكترما يعنى رصاصه مرتده..يعنى اضربها فى الباب الحديد ترد فيا )
49- طلعت ..وقلتله بص يابني احنا هننط من فوق البرج..الواد بص كده لقى المسافه طويله..قاللي لا ياباشا..لااااا..حاولت اقنعه مارضيش
50- نزلت وقفت ادام الباب تاني ..مش عارف اعمل ايه؟..اقسم بالله العظيم انا وقتها قلت نصا كده يارب انا مش ملتزم وانت عارف
51- بس اكيد انت عارف ان ف يوم عملت حاجه صح لوجهك الكريم..فلو قبلتها بحقها افتحلي الباب ده او الهمني اني افتحه ازاي..
52- اقسم بالله يدوب خلصت الكلمتين دول لقيت امين شرطه فتح وبيقولي يا محمد بيييييييه يلا يا باشا..المنطقه وقعت كلها يلا ياباشاااااااا
53- قلت للعسكري يلا ياض خرجنا م البرج العسكري قاللي هاروح اسلم السلاح ف الكتيبه ياباشا..قلتله مابقاش في كتيبه ..انت مش شايف الولعه ..
54- قاللي لا ياباشا مش هاروح بالسلاح ..لسه مخلصش الكلمه لقيته اتنش طلقه معرفش منين ف دماغه ووابل رصاص مش شايفه..
55- ذهلت وصوت ضرب النار مش شايف مصدره..جريت انا وياسر قلتله اجري زجزاج مش خط مستقيم عشان اللي بيجرو ورانا ميعرفوش ينشونا..
56- جرينا لحد الترب المدافن اللي ورا السجن ونزلنا ف واحده فيها انا وياسر السباعي قعدنا فيها نص ساعه بسلاحنا لحد ماصوت الضرب اختفى خالص..
57- خرجنا على الطريق ورا السجن ..قرى كلها عرباويه اسمها عرب جهينه ..لقيت واحده عجوزه قلتلها يا حاجه معلش ممكن تخبينا عندك لحد الدنيا ما تهدا
58- قالت ياحبايبي ..تعالوا ..خدتنا بيتها وصحت ابنها عنده توكتوك قالتله خد البهوات ركبهم وخليك معاهم عشان ولاد الكافره مايجوش ناحيتهم
59- وجابتلي شكاره قالتلي حط سلاحكم فيها عشان لو اتشاف السلاح هتندبحوا رسمي..طلعنا ومشينا وصلنا عالدايري بتاع حته اسمها سرياقوس..
60- وركبنا مكروباص كان رايح طنطا ياسر نزل المنوفيه وانا كملت لحد بيت اخوالي ف الغربيه ..دخلت ف حالة نفسيه زفت اسبوعين
61- الهري اللي فات ده كله عشان محدش يقول اننا فتحنا سجون..اقسم برب البيت الحرام ماحصل ..انا شوفت بعيني عساكر انقسمت نصين بطلقه جرينوف
62- ولو بصيتوا على صور لسجن ابو زعبل هتلاقوا كل البوابات بتاعت الاربع سجون واقعه والاسوار مخرمه بطلقات جرينوف ..لو فتحناها مكنش ده هايحصل
63- اما بالنسبه للواء البطران الله يرحمه ..محصلش ابدا انه اتقتل عشان رفض يفتح السجن..لان اولا مافيش تعليمات بالكلام ده خالص قسما بالله
64- وثانيا طب لما اتقتل ليه سجنه ماهربش؟ طالما هو العقبه يعني ادام اوامر الوزاره زي ما الاوساخ بيقولوا سجن القطا اللي اتقتل فيه مهربش ليه؟!
65- الكلام ده كله موجه للناس اللي عاوزه تفهم القصه كلها واقسم برب الكعبه ماكدبت ف كلمه ابدا ولا زودت ف كلمه واللي عاوز يصدق يصدق .انتهى
***** انتهت الشهاده بتاعت الضابط المحترم
ولسه مع الايام والتاريخ هاتظهر حاجات كتير تانيه
مهمتهم يكشفوها
ومهمتنا ننشرها
smile رمز تعبيري
E.E
Eslam Elbahrawy
بسم الله الرحمن الرحيم ** شهاده موثقه من احد ضباط سجن ابو زعبل ** ** طبعا مازال الكثير من النكسجيه بيحاولوا يتكلموا ...
Posted by Eslam Elbahrawy on 29 يناير، 2016
