شم النسيم فى دولة العسكر - هذا هو الفرق بين مصر والاخرين الان - عاش الجيش المصرى
نزلت بصيت من شويه في الشارع لقيت الدنيا فعلا عيد
وكلمت صديقي في النادي قالي الدنيا هنا ولا استاد الكوره
الدنيا زحمه موت بلاش تيجي اصلا
قلت اقعد اشرب قهوتي في كافيه
مع اول شفطه كده اخدت فيها وش الفنجان
عدي قصادي مشهد الناس والرنجه والفسيخ والنوادي
وبعدين بشكل لا ارادي
المشهد اللي جه بعده
كان مشهد حصل من حوالي 3 شهور
لما كنت في اسكندريه وقاعد علي قهوه علي الكورنيش
ولقيت ست كبيره في السن ملامحها جميله ولابسه عبايه سمرا شكلها حلو
وداخله عليا ماسكه كارنيه فيه صوره
فهمت انها ممكن تكون جايه تتفسح و تاه منها حد ومطلعه صورته او بطاقته بتوريه للناس جايز حد شافه
لما قربت.. انا اصلا مش من اسكندريه فقولتلها انا مش من هنا والله
هي اتكلمت .. نطقت… وسمعت لهجتها
حوالي خمس كلمات قالتهم كانوا زي خمس رصاصات
قالتلي انا سوريه وهذه هويتي .. وسكتت
اقسم بالله وربنا شاهد
اني من هول الصدمه .. من نضافة الست واحترامها ووشها اللي يكاد يكون هاينفجر من الاحراج .. انا اتصدمت وسرحت وانا باصصلها
ففكرتني اني رافض اعطيها مساعده بصت للارض ومشيت
لما فوقت من الموقف قومت جريت وراها و اعطيتها من رزق ربنا عليا اللي هو اصلا مقسوم ليها…
** رجعت مكاني مقفول اوووي اوي بجد
الست ماقدرتش تطلب مساعده
مجرد بتظهر هويتها السوريه وانت بالاشاره لو فهمت بتساعدها
لو رفضت هي مش بتطلب.. بتمشي
** وقتها بس من قلبي و ربنا شاهد
قلت الحمد لله علي نعمة بلدي ونعمة الامن والامان
ونعمة الجيش المصري
ولعنة الله علي النكسات واللي عملها واللي بيؤيدها
** دلوقتي لما شوفت منظر البلد والزحمه وريحة الرنجه والفسيح وتنطيط الاطفال… افتكرت المشهد دا
وقلت فعلا
هو دا شم النسيم في بلد حكم العسكر مش كده برضو؟؟؟!!!
E.E
ESLAM ELBAHRAWY
