سعيد حساسين والملحد المجنون والغضب من اجل السيسي - اعلام يهدم لا يبنى
فأرجو الاهتمام حتى وان كان المنشور طويل !
- فى اثناء بحثى على موقع اليوتيوب عن فيديوهات تخص موضوع معين
وقع امامى فيديو من قناة العاصمه .. لحلقه منذ شهور لبرنامج انفراد الذي يقدمه صاحب القناه سعيد حساسين !
- الفيديو عباره عن مناظره بين شيخ شاب من الازهر وهو عبد الله رشدي
وشخص اسمه مصطفى بيقول انه الإله وانه المسيح بن مريم و انه المهدى المنتظر كمان
- بدأت اشاهد الحلقه .. والحلقه كان فيها الكثير
طبعا تهكم وضحك استحقه المدعو مصطفى بسبب كلامه
شاب من اول نظره له تلاحظ عدم اتزانه النفسي
بيقول انه ربنا ومره يقول لا انا ربنا بيتمثل فيا ومره يقول لا انا مش مؤمن بدين ومره يقول لا انا مؤمن بكل الاديان وعامل دين موحد خليط من الاديان كلها
- المهم ان المناظره انتهت ان الجميع عرف ان الولد مش طبيعي
وانه زيه زي ناس كتير عقلها بيشت منها
وطبعا كان جميل ان اللى يكون قصاده من الازهر شيخ شاب زيه
عشان كده كان فى مجاراه فى الالفاظ الشبابيه والمصطلحات الشبابيه فى الحلقه
- اللى دفعنى للتحذير
كل المتصلين اما شتموا اللى اسمه مصطفى
او اتهموه بالجنون
لكن انا لاحظت نقطه خطيره جدا
الولد واضح انه بيقرا
و دا فكرنى بمنشورات كنت دايما اكررها ليكم
انى كتير كنت بشوف ناس تقرا كتب من غير ما حد يشرحلها
او تقرا كتب مش موثوقه
والنفس البشريه ضعيفه طبعا فأوقات الواحد لو ايمانه ضعيف ممكن يسرح مع الكتب دى
- مؤخرا بدأ الناس تبعتلى رسايل
ايه رأيك فى كتاب كذا اللى بيقول ان الفضائيين عملوا الاديان
وايه رأيك فى كتاب كذا اللى بيقول ان ابو الهول هو سيدنا ادم
وايه رأيك ورأيك ورأيك
ولما شوفت الحلقه دى افتكرت الناس دول
جايز الواحد الحمد لله كان محظوظ انه لما بيقرا كتاب بيلاقى أب او عم او والد صديق ليا يقدر يشرحلى ويفهمنى .. لكن مش كتير كده
لذلك بالله عليكم فى شعره بسيطه بين العلم والدرايه والقراءه وبين الايمان بما تقرأه
- مثال بسيط
لما بكتب ان الماسونيه لها ايادى فى الاعلام والاقتصاد وما الى ذلك
لو تلاحظوا لازم وانا بختم كلامى اقول ان احنا برضو عندنا ناس بتتصدى
وان مهما كان التخطيط فهو كله بمشيئة ربنا
ليه.؟ لانى لاحظت ان فى ناس بتتشاءم وتقول مفيش فايده واحنا ضايعين وسمعت احيانا ناس اّمنت او اتعلقت بكلام كتب مغلوطه لدرجه وصلتهم انهم يقولوا ان تخطيط الماسون ربنا مش قادر يوقفه !
لذلك وجب التحذير
اقرأ المضمون والموثوق فيه
ماتصدقش كل ما تراه او تقرأه على الانترنت
ماتقراش وجهة النظر الواحده واقرأ كتاب لوجهة النظر الاخرى
دايما خلى مرجعك اللى بترجع له وانت بتقرا اى كتاب علمى او سياسي هو ربنا وكتابه وسنة رسوله .. ولو لقيت اى كتاب بتقراه مخالف لكلام الله..على طول اعرف ان فى شىء خاطىء ومش صحيح
- اخيرا ..
و دا شىء احزننى ونوهت عنه اكتر من مره
فاكرين لما ريهام سعيد استضافت ملحده .. وفى وسط البرنامج طردتها وشتمتها
وقتها قلت .طب لازمته ايه من الاول ؟؟
الاعلاميين بيحبوا يعملوا حلقات سخنه تجيب اعلانات
والنتيجه بتكون .. يجيبوا عيل مش معروف الا على صفحته اللى فيها عشر افراد
وبعد الحلقه بيتشهر والشباب بيتابعه
يعنى بنساهم فى نشر الالحاد
اللى زعلنى فى حلقة سعيد حساسين
ان الولد طول الحلقه عمال يقول انا الله .. انا المهدى ..انا المسيح
انا هاهدم الكعبه .. انا اللى مقصود بالاسراء والمعراج مش سيدنا محمد
( تعالى الله ورسوله عما يقوله هذا المجنون )
كل دا اتقال وسعيد حساسين فاتح الاتصالات وممشي الحلقه عادى
انما اول الولد ما قال انا هالغى البرلمان وهاقتل السيسي والجيش
اتعصب حساسين وطرده برا الحلقه وانهى الحلقه
طبعا مش محتاج اتكلم عن حبى لجيش مصر ورئيسها
لكن الفاجعه بالنسبالى ان انت عملت حلقه سخنه تجيب اعلانات وقولنا ماشى
لكن تسكت على واحد بيتطاول على الدين وعلى الله
ولما تيجى سيرة البرلمان والرئيس تطرده ؟
دى كانت احدى سقطات سعيد حساسين الكثيررررررره
- انا اسف للاطاله .. لكن حبيت احذر الناس و احذره نفسي معاهم
اننا لازم نتوخى الحذر
ونبحث ونفتش وراء ما نقرأه ونشاهده ولا نأخذ اى معلومه وانها مسلم بها
E.E
Eslam Elbahrawy
