فيلم طباخ الرئيس يكشف سلبيات المصريين بين الماضى والحاضر
** فيلم طباخ الريس - بين الماضى والحاضر **
- كنت بتفرج من شويه على فيلم طباخ الريس
الفيلم كوميدى وخفيف لكنه فعلا كان بيناقش قضيه مهمه جدا
وهى تسليط الضوء على المحيطين بالرئيس اللى بيغرقوه
اللى بيوصلوله كلام خاطىء وبيخبوا عنه الحقايق
- لكن فى وسط الفيلم كان فى لقطه تانيه هى اللى توقفت عندها
لانها مثلت النقطه اللى دايما بتكلم فيها
ان الامر لازم يكون بين الحكومه والشعب
ماينفعش واحد بس يشيل المهمه لوحده
- من كام يوم .. اتفتح حديث فى قعدة صحاب
اتفقنا على حاجات كتير
منها ان فعلااا حاليا فى ناس مطحونه والظروف جايه عليها وبتعانى من الاسعار والغلاء وكل شىء .. ولو انكرنا دا يبقى بجد بنطبل التطبيل اللى يغرق الريس !
لازم نعترف ان فى ناس تعبانه
- لكن فى نفس القعده اتفقنا ان فى ناس مغرقه نفسها بنفسها
وهى نوعية الناس اللى ربنا ماشي معاها بمبدأ البرد على اد الغطا
ربنا كارمك و بيعطيك اللى يعيشك كويس
لكن ...
يبقى مش قادر يصرف على عيل .. ويروح يجيب التانى والتالت ويقولك المصاريف والبلد مش مساعدانى !
يبقى بيصرف على الطفل بالعافيه ومرتبه متظبط على حياته ويقولك لا .. لازم ادخل ابنى مدرسه خاصه انا ابنى مايقعدش فى مدرسه حكومى وبعد كده يرجع يشتكى من ان مصاريف المدرسه بالالاف ومرتبه مش مغطى والبلد ظالماه والبلد بنت كلب !
دى ناس هى اللى بتغرق نفسها ..
سيادتك بتاخد مرتب معيشك كويس انت ومراتك ومعاك طفل
ماتروحش تجيب التانى والتالت وتصوت وتعيط
ماتروحش تتفشخر وتجيب موبايلات وتقول اصل البلد بنت الكلب ظالمانى !
- اللقطه اللى قصادكم من نفس الفيلم
وهى اللى فكرتنى بالموقف دا
لما المواطن محدود الدخل كان بيتفرج على التلفزيون
وكان مسئول الحكومه بيتكلم عن مساعدة محدودى الدخل
وخرج المواطن من القهوه يسب ويلعن ويقولك ولا بتساعدونا ولا حاجه
ووقتها سأله خالد ذكى اللى قايم بدور الريس انت عندك كام عيل؟
فقاله خمس عيال
قاله طب انت عاوز تتجوز وتخلف خمس عيال وتنبسط والحكومه هى اللى تربيلك عيالك.. لازم تتحمل المسئوليه !
- هى دى الفكره
هايطلع ناس من اللى مش فارق معاهم او مش فاهمين او عاوزين كل حاجه ببلاش يقولك انتوا عاوزين كمان تحرمونا من الخلفه ..
هاقولك دا مش قانون بلدك ولا فكرة بلدك
انت دايما بتقارن دايما بدول متقدمه زى اليابان والصين
فى البلاد دى بيحددوا عدد مواليد لكل اسره يستحقوا الدعم
ولو زاد العدد عن المحدد .. بتشيل انت كل حاجه
- عشان كده لازم نفرق بين اللى مظلوم فعلا من الاسعار والغلاء لانه فعلا مش قادر يعيش .. وبين اللى يقدر يعيش كويس بس مغرق نفسه بسبب الفشخره الكدابه او الجهل
E.E
Eslam Elbahrawy
