بالصور - اضحك مع شيوخ بير السلم - احد شيوخ قناة الرحمه يعطى الدرس الدينى فى حمام السباحه !
** تعليم الدين بالطرق المباحه - بلبط فى حمام السباحه *
- قناة من القنوات اللى متشاله من كل ريسيفرات البيت من زمان مش مؤخرا .. الرحمه والناس وشلة القنوات اللى اتفتحت علينا ببلاعه من اصحاب الدقون الطويله اللى منهم سباك ومنهم نقاش وطالع يقول قال الله وقال الرسول وكان ابرز امثلتهم طبعا عبد الله بدر !
- بعمل تحديث للقنوات وظهرت قصادى القناه
لقيت الشيخ الله يعمر بيته
لامم الاطفال فى حمام السباحه .. وملبسهم المايوه
وقاعد هو وسط حمام السباحه بالكرسي والجلباب الابيض
طبعا ماينفعش هو يلبس مايوه حتى لا يفتن الناساء !!
وعمال بقى يدى دروس للاطفال
- المشكله انهم فاكرين انهم كده بيبتكروا
لكن دا ابتكار متخلف
الدين له احترامه
و دروس الوعظ والدين حتى لو للاطفال لازم يكونوا بيحترموها
لكن فى الحلقه
سيدنا الشيخ عمال يحكى ويقول ويعيد
والاطفال عمال تبلبط وصوت ضحكهم وهزارهم مغطى على صوت سيدنا الشيخ
- من اين لكم كل هذه الاختراعات والبدع ؟
انت لو عاوز تذكر اّيه قراّنيه تعلمها للاطفال؟
ازاى هاتعلمها لطفل وهو بيبلبط فى وسط الميه ؟
ومش مركز معاك؟
ومش مهتم بكلامك؟
انت كده ضربت بكلام ربنا عرض الحائط
لان ربنا قال فى كتابه العزيز
سورة الأعراف ( وَإِذَا قُرِئَ الْقُرْآنُ فَاسْتَمِعُواْ لَهُ وَأَنصِتُواْ لَعَلَّكُمْ تُرْحَمُونَ )
يبقى ازاى يا شيخنا بقى نعلم الدين فى حمام السباحه ؟
- انا بقترح على المسئولين فى قناة الرحمه بقى
ان الحلقه الجايه الشيخ يعملها فى الملاهى
والاطفال تركب الشلال وهو يركب الكوندوووور
ونختم اخر حلقات الشهر اننا نعملها فى سينما جنينه مول
والشيخ يبقى لابس النضاره الثرى دى
انه الاسلام الحديث يا ساده !
E.E
Eslam Elbahrawy
