هذه هى سلبيات التنظيم فى زيارة ميسي لمصر حتى نتجنبها فى المرات القادمه

عاوزين نتكلم عن سلبيات زيارة ميسي ؟؟

هانتكلم بصراحه .. وبرضو نتكلم بالراحه

==============

كل حاجه خلقها ربنا لها جانب ايجابى وجانب سلبى

مفيش حاجه بتتعمل كامله لان الكمال لله

لكن الصح اننا نشوف اخطاءنا فين عشان نعالجها المره الجايه

========

هانحاول نسرد بعض الاخطاء اللى وقعنا فيها فى زيارة ميسي

بعضها اخطاء سوء تنظيم وبعضها اخطاء بسبب جهلنا بمراسم الاحتفالات الكبيره للاسف !

============

1- مقدم الحفل ... الاعلامى سيف زاهر

مش صح ابدا نمشى بمبدأ مادام الفرح بتاعنا يبقى انا اللى اغنى فيه

مش لازم ان اون تى فى لها حق الحصريات .. مذيعها هو اللى يقدم الحفل

معروف جداا ان سيف زاهر ماعندوش حسن اختيار الكلمات

اللى متابع رياضه ومتابع برامجه من ايام قناة الحياه حتى

هايعرف انه بيتكلم غلط .. مخارج الفاظ غلط .. حتى لغويا بيقول حاجات غلط

و اظن لاحظتم دا امبارح

طبعا هو كشخص .. محترم جدا وخلوق لكن المهنيه شىء اخر

وتقديم الحفلات والاحتفاليات له ناسه

اتمنى تدارك دا مستقبلا

===========

2- الفريق اللى كان بيغنى فى الحفل امبارح ...

ايه فايدة انى اجيب فريق مش معروف ؟

وايه فايدة انه غنى اغانى مش مصريه فى حفل معمول عشان انجاز مصرى؟

انت عندك من التاريخ الحديث اللى يقدر يشرفك

لو هاتخيل نفسى منظم الحفل

هاروح اجيب مقدم حفل بيتكلم لغات كويس

و اجيب عمرو دياب ومحمد منير

الاول معروف فى العالم كله والتانى حفلاته فى المانيا بيحضرها جمهور اكتر من جمهور الفنانين الالمان نفسهم

ويقف مقدم الحفل يقدم الثنائى

يقول ان دا عمرو دياب المطرب اللى لسه داخل موسوعة جينيس للارقام القياسيه بأنه الاكثر حصولا على الجوائز .. ويقول ان دا محمد منير العالمى اللى بيغنى فى كل بلاد العالم واغانيه مسموعه ..

وكل مطرب منهم يؤدى اغنيه لوحده

ويختموا الحفل بأغنية دويتو زى اغنية القاهره

بكده اكون جيبت ناس على قدر الحدث

ووصلت لميسي ولكل العالم اننا برضو فى الفن عندنا ناس عالميين

==============

3- الهرج والمرج والعاده المصريه

الحفل دا حضره مسئولين و وزراء ورجال اعمال وصحفيين

مافهمتش ابدا ازاى خرج خبر بيقول ان ميسي رجع الفندق و هدد بعدم حضور الحفل لما وجد ان ممر الفندق مليان ناس وشبه السوق

لكن لما بدأ الحفل فهمت .. وشوفت الساده المسئولين كلهم سابوا الكراسي

وطلعوا الموبايلات وكل واحد بيصور وكأنه بيحضر طهور ابن خالته

كان منظر مقزز فعلا

لدرجة ان من كواليس الحفل .. ميسي ماراحش الطرابيزه بتاعته وقعد

الا لما اجبروا كل الحضور على الجلوس فى اماكنهم !

==============

4- عمرو اديب .. الاعلامى الاكثر مهنيه في مصر ( رغم الاختلاف معاه )

الا انه برضو كان مهنيا على المستوى المحلى فقط

واثبت ان اعلامنا محتاج سنين ضوئيه عشان يواكب الاعلام برا

اى شخصيه كبيره رياضيه او سياسيه او فنيه او اجتماعيه

لما بيتعمل معاها لقاء .. بيطلبوا الاسئله قبلها بكام يوم

وفريق النجم دا بيراجعها ويختار الاسئله المسموح بيها

عمرو اديب كان دا اتفاقه مع ميسي

لكن محدش بعتلهم الاسئله قبلها .. والاسئله بعتوها امبارح بس

ومع ذلك ميسي اختر 6 اسئله .. هايقف يجاوب ويمشي

لكن عمرو اديب حب يحط التاتش المصرى وحب يسأل ميسي اسئله من برا المنهج يعنى .. وكواليس اللقاء بتقول انه كان هايكون سؤال سياسي !!

وكاد يتسبب فى انسحاب ميسي اصلا من الحوار

الله يخليكم اتعلموا معنى كلمة مهنيه

خلونا ارقى من كده

الناس دى النفس محسوب عليها والكلمه بفلوس

مش زى عندنا هاتستضيف مدير الوحده المحليه وتسهره معاك لحد 3 الفجر والمتصلين يشتموه وهو يسب فى اللى جابوهم !!!

=============

5- تسويق السوشيال ميديا

صورة ميسي تساوى فلوس كتير

كان لازم يتم عمل فريق متخصص فى التسويق على السوشيال ميديا

فيس بوك .. تويتر .. انستجرام

نتفق مع ميسي فى العقد اننا لينا حق التصوير مثلا 50 صوره

ونبتدى بقى نعمل مسابقات

ان اكتر واحد هاينشر صور ميسي على حساباته له جوايز

نعمل هاشتاج عالمى نسميه صور ميسي فى مصر وكل المصريين يدخلوه

نعمل صفحه خاصه لزيارة ميسي لمصر يتم تدشينها قبلها بأيام

وننشر الصور عليها لوجو او هاشتاج بيروج للسياحه فى مصر

نعمل مسابقات لافضل تصميم فوتوشوب للصور اللى تضم ميسي مع الاثار المصريه

نعمل هاشتاج باللغه الاسبانيه واللغه الارجنتينيه ونجيب ناس تاخد فلوس عشان تنشر الصور بتاعت الزياره على الهاشتاج دا !

كان لازم نتحرك اكتر ونستغل اكتر

كان لازم نفهم ونستوعب دور السوشيال ميديا

============

6- الدعوات الرسميه

الاجهزه المتخصصه فى وزارة الخارجيه

كان لازم توجه دعوات لكل قنوات وصحف العالم المهمه من قبلها بأيام

وماكانش ينفع نعتمد فقط ان ميسي مهم .. فالناس دى هاتيجي غصب عنها

مفيش الكلام دا

قناة يورو سبورت العالميه نشرت تقرير امبارح بتقول ان اهم سلبيات الحفل هو عدم دعوة الصحفيين وختمت المقال بجملة : ظهر المصريين وكأنهم يخاطبون انفسهم بدون الاعلام العالمى !

===========

7- الشفافيه

كان من اغبى الاشياء اللى حصلت وبتحصل دايما

هى عدم وجود الشفافيه..الامر اللى فتح باب الشائعات

وبالتالى قدر المستفيدين من استغلال الشائعات واقناع الغلابه بيها

وتم قلب الحدث عليك بعد ما كان المفروض يكون ليك

كان لازم عمل مؤتمر صحفى قبل الزياره بإسبوع مثلا

تقول والله التكلفه هاتكون كام مليون

وان الشركات الراعيه هى اللى دفعت وان مصر مادفعتش حاجه

وان مصر هاتغرم بس التأمين والحراسات والكلام دا !

لكنك فتحت الباب للناس اياها ..اللى يقول الحفل ب 100 مليون

واللى يقول الحفل ب 200 مليون