غريبه - علاقة فيلم ظاظا لهانى رمزى بقضية هدير الشهيره
صدق اللى قال ان التكرار يفيد الشطار
ظاظا رئيس الجمهوريه و ... هدير !!؟
========
فيلم ظاظا بتاع هانى رمزى
انا شوفت الفيلم دا كتير جداااا
هو من انتاج سنة 2006
من الافلام اللى بتعجبنى شخصيا
له طابع سياسي عن المواطن اللى بيحلم يبقى رئيس جمهوريه
عاوز يساعد الغلابه وعاوز يخلص مصر من المعونه والتبعيه لدول الخارج
عاوز يمتلك سلاح نووى مصرى و فعلا الفيلم فيه بلاك كوميدي حلوه
============
لكن
احيانا فى حاجات بتستوقفك حتى لو بعد عرض الفيلم ب 11 سنه
وبعد انت ما شوفته خمسين مره
اول امبارح كان الفيلم بيتعرض فى التلفزيون
فى نص الفيلم لما كان هانى رمزى بيرشح نفسه للرئاسه
وكان بيوجه كلمه للناس عشان تنتخبه
قالهم انا عاوز اخلصكم من الفقر والتعب والجوع
وعاوز اخلى المواطن له كرامه
وقال ......:
العيل الصغير اللى اد كده .. فوق دماغى
ابن حلال .. ابن حرام .. ابن كلب .. فوق دماغى
=======
وقفت كده بعد ما سمعت الجمله دى
الله ..؟
يعنى ايه ..؟ مش فاهم ؟
وايه لازمة الجمله دى فى السيناريو والحوار ؟
ان مرشح رئيس جمهوريه بينادى بالاستقلال والحريه و العداله و تظبيط الشعب ويقول ان اصغر عيل فى الشعب فوق دماغى سواء كان ابن حلال او ابن حرام ؟
==========
معرفش ليه وقت ما سمعت الجمله دى
جه فى بالى قضايا الزنا اللى عايشينها فى المجتمع
واشهرهم مؤخرا القصه الشهيره للست هدير
واللى ماكانش حد بيدافع عنها الا ناس اصحاب توجهات مشبوهه
واللى بيحاول البعض تقنينها وتحليلها تحت مسمى اما الحريه
او مسمى الظروف الصعبه اللى دفعت الراجل والست لارتكاب جرائم زى دى !
========
الفيلم دا تأليف طارق عبد الجليل
واخراج على عبد الخالق
والله اعلم ايه السبب فى جمله زى دى فى الفيلم
استوقفتنى جدا وكأنها عملت معايا ربط بين الفيلم والحاله اللى كانت بتسود الافلام فى مصر من 2005 لحد 2011 سواء افلام بتتكلم عن مرشحين رئاسه او بتتكلم عن العشوائيات بشكل سىء منتشر فيها الزنا والبلطحه او المسلسلات والافلام فى نفس الفتره اللى بتتكلم عن الضابط المرتشي وامين الشرطه الحرامى و الدوله اللى بيحكمها تجار السلاح والمخدرات ومفيش حاجه اسمها دوله او مؤسسات !!!
E.E
Eslam Elbahrawy