هام جدا - ميشيل فاليز ترد على دعوة عمرو اديب المستمره لبيع الاراضى المصريه للاجانب - وكلمة السر هاتسا مانانا
رساله الى عمرو اديب
كيف ضاعت فلسطين من اهلها ؟ ...
وهل يجب علينا بيع اراضي الحدود للاجانب بناء على طلبك ؟
ميشيل فاليز ترد على عمرو اديب
Habla Texas - Hatsa Manana !!!
==============
من حوالى 3 ايام كنت قاعد بتابع برنامج كل يوم لعمرو اديب
كانت فترة الاخبار بتتعرض وبيعلق على الاخبار
كان من ضمنها خبر
اردوغان يمنح الجنسيه التركيه مقابل مليون دولار
والحديث هنا عن دفع فلوس مقابل الجنسيه
لم يتحدث احد عن شراء اراضي !
======
انهى عمرو اديب قراءة الخبر ثم دخل فى الحديث عن مصر
انه متعجب لماذا دائما المصريين يقفون فى وجه المستثمرين
ولماذا نمنع تمليك الاراضي المصريه للاجانب
خاصة الاراضي الصحراويه الموجوده فى حدود مصر !
واكمل عمرو اديب حديثه
انجلترا لو اشتريت فيها بيت .. بتاخد جنسيه
تركيا اهى بتبيع الجنسيه
اشمعنى مصر دايما عمالين تتكلموا وتقولوا مؤامره
واصل ممكن اجنبى يشترى ارض على الحدود عندنا
وبعد كده يبيعها لاسرائيليين
ونتفاجىء ان ارضنا اتباعت لليهود
ويكمل اديب كلامه :
خلاص يعنى الصحرا بتاعتكم دى العين عليها
الاسرائيلي هايسيب انجلترا وتركيا وهايموت ويعمل مؤامره ويشترى ارضنا
انا مش فاهم المصريين متمسكين بالتراب ليه
دا تراب ... وممكن يجيب فلوس
الى هنا انتهى تعليق عمرو اديب
ولم تكن تلك المره الاولى التى يتحدث فيها بحرقه فى هذا الموضوع
على مدار عقد كامل رأيت عمرو اديب يكرر الحديث فى موضوعين دائما
بيع القطاع العام .. وبيع الاراضي الصحراويه للاجانب !!!
===============
خلص البرنامج وبعدين فى السهره كنت بقلب فى القنوات
ووقفت عند قناة HBO
ولقيتها بتعرض برنامج اسمه Habla Texas
البرنامج بيتكلم عن المذيعين اللاتينيين اللى اشتغلوا فى امريكا واغرب مواقف حصلتلهم
كانت وقتها بتتكلم ميشيل فاليز ( صاحبة الصوره فى البوست )
مذيعه لاتينيه بتشتغل فى نشرات الاخبار فى تكساس
وبتقول ان مره كانت بتقدم نشرات الاخبار فى القناه عادى
وبعدين وهى بتختم وبتقولهم تصبحوا على خير
قالتلهم بالاسبانيه Hatsa Manana
يعنى تفضلوا بخير لحد بكره ... حتى الغد
وبتقول انها فوجئت بعاصفه من الهجوم من الامريكان فى ولاية تكساس
واحد بعتلها قالها انا امريكي ولغتى هى الانجليزيه واتوقع ان اسمع نشرة الاخبار بلغة بلدى
واخر قال لها امريكا ليست مستعمره اسبانيه .. تحدثى بالانجليزيه فى قنواتنا
وتقول المذيعه انا امريكيه من الجيل الرابع
يعنى اهلها كانوا غير امريكيين وتزوجوا فى امريكا
وهى الجيل الرابع اللى بيحمل جنسيه امريكيه خالصه
يعنى زى حد من السودان يجي مصر ويتجوز ويخلف
واحفاده يتجوزوا مصريين ويخلفوا وبكده الاحفاد يكونوا مصريين خالصين
ومع ذلك تقول المذيعه لم يشفع لى ذلك وعاملونى كأننى غريبه لمجرد كلمتين باللغه الاسبانيه وخافوا على لغتهم وبلدهم !
=====================
امريكا يا استاذ عمرو
امريكا ولاد اول امبارح زعلانين عشان لغتهم وتراثهم وارضهم
لمجرد مذيعه قالت كلمتين بلغه مختلفه فى نشرة الطقــــــــــس
ومش عاوزنا احنا نتمسك [اراضينا ونخاف من المؤامره
ثم سؤال
حضرتك عارف فلسطين راحت ازاى من اهلها؟
ايوه القصه المعروفه هى الاحتلال والاعتداءات وكل دا
لكن فى بادىء الامر كان بيدخل اليهود يشتروا بيوت الفلسطينيين
بيت جنب بيت .. شارع جنب شارع
لحد ما قدروا يشتروا بيوت كتير وفجأه فوجىء الجميع انهم موجودين جوا فلسطين بأملاكهم !!
دا موثق وموجود فعلا وكانت دى بداية تمهيد لاحتلال الصهاينه لفلسطين !
============
لو هنوافق نبيع اراضي الحدود للاجانب
ماكناش عزلنا مرسى بسبب انه كان هايعطى سينا لحماس !!
E.E
Eslam Elbahrawy