تعرف على السبب وراء استضافة عمرو اديب واسامه كمال لاهالى الارهابيين - و سر عدم تمكن عمرو اديب من الخروج من الغرفه اثناء اجراءه للحوار
استعننا على الشقي بالله
ملاحظتين من وجهة نظرى الشخصيه المتواضعه بخصوص لقاءات اهالى الارهابيين بالامس
==
انا شوفت اللقاءين بتوع اهالى الارهابيين بالامس
سواء مع عمرو اديب .. او مع اسامه كمال
========
وجب انى أنوه لتانى مره ان وجهة نظرى تحتمل الصواب والخطأ
وانها مختلفه عن 99% من اراء الاصدقاء فى هذا الموضوع
========
الملاحظه الاولى
لماذا عمرو اديب واسامه كمال بالذات ؟؟؟؟؟
فى ظل الوقت اللى فيه قانون طوارىء
وظل إحكام الدوله لأى شىء خارج عن الحدود بعد حادث الكنيستين
زى ما شوفنا مع عدد جريدة البوابة نيوز اللى اتصادر
هل من الممكن يضحى اتنين من ابرز الاعلاميين فى مصر بأسهمهم عند الناس مقابل اجراء لقاء مع اهالى الارهابيين من تلقاء نفسهم ؟
توقعى الشخصي والله اعلم
1- قد يكون ترتيب تلك اللقاءات تم بالتنسيق مع اجهزة الدوله
للاستفاده من الاّتى :
أ- اولا انك تبين لكل ارهابى ان بعد ما يموت ويضحي بنفسه فى سبيل الضلال .. اسرته وعائلته وبناته هايشتردوا و هايعيشوا حياه تعيسه وهايكونوا عايشين اغراب وسط المجتمع بسبب اللى عمله ...
ب- الرد على اللى بيقولوا ان الدوله بتعذب الناس وبتعذب اهالى الارهابيين
بدليل ان كان اهم سؤال سأله اسامه كمال بالامس لزوجة الارهابى
هل حد لمسك ؟؟؟
قالتله بالعكس حتى عشان انا منقبه .. ماخلوش راجل يقعد جنبي
بكده انت جيبت الكلام من الناس نفسها قصاد الكل عشان تقفل الباب قصاد مواقع وصفحات الاخوان اللى بتقول عكس كده
ج- كل مره .. تحصل عمليه .. يتم بعدها الاعلان عن مرتكبى الحادث
ويتم استغلال ضعاف النفوس وكذلك المغيبين و كذلك البسطاء فى المناطق الشعبيه والقرى ويتم اقناعهم ان دى مجرد اسماء وضعتها الحكومه عشان تدارى خيبتها
لا .. المره دى بقى انا جايبلكم اسرة الارهابى
جايبلكم اخو الارهابي عشان يأكد ان اخوه هو اللى نفذ العمليه
عشان مايبقاش فى مجال للتشكيك من الاخوان
لان دا كان حصل .. بعد تفجير كنيسة طنطا بدقايق ..
الكومنتات على صفحة طنطا على الفيس كانوا بيتهكموا ويقولك السيسي دلوقتى هايقولك اسم رباعى لأى حد وخلاص زى ما عملوا فى البطرسيه !
بكده لما تجيب اهل الارهابى .. هاتثبت انه هو المنفذ فعلا
لان انت لو اختلقت اسم.. مش معقول هاتختلق اسره وعائله كمان
وبالمناسبه الاثبات مش ليا...دا للمغيبين ومن يتم استغلال بساطتهم
د- النقطه الاخيره
انا فكرت بالشكل دا
فى مصر كلها مين الاعلاميين اللى الطريق رايح لهم
خلينا نتفق ان احمد موسي بسبب بعض حلقاته وكلامه بيسبب خنقه لمحبى السيسي نفسه قبل معارضيه
وخلينا نتفق اننا من زمان بنطلق على اسامه كمال اخر الاعلاميين المحترمين
وخلينا نتفق ان اسهم عمرو اديب عاليه جدا جدا جدا فى الشارع المصرى بعد تكرار مكالمات السيسي معاه سواء فى اوربت او فى اون تى فى .. وكمان بعد اطمئنان الريس على صحته ...
و دا خلانى اعتقد ان الناس دى مش طالعه اعتباطا
والا .. كان فى اعلاميين تانيين عارفين انهم نكسجيه كان ممكن يعملوا نفس الخطوه
يوسف الحسيني مثلا .. القرموطى مثلا .. محمد الغيطي مثلا ..
والله اعلم برضو
=====================
الملحوظه التانيه ...
فى لقاء زوجة الارهابى مع اسامه كمال
الردود بتاعتها متحفظه كويس اوى
واحده جايه تقول معرفش
واحده معاشره جوزها وماتعرفش غاب لمدة 8 شهور راح فين
واحده بتقولك انا بقول للى فجر الله يسامحك لان ربنا بيغفر كل شىء
واحده اسامه كمال بيقولها تحليل الDNA اثبت ان دا جوزك
تقوله انا مش هاصدق الا لما يتصل بيا !! لو اتصل يبقى عايش ولو ماتصلش يبقي مش هوا !!!!!!!!!!!
الناس دى متحفظه كويس اوى
وبيبقوا عارفين لو جوزك اتقبض عليه هاتقولي ايه
ولو هرب هاتقولى ايه
ولو فجر نفسه هاتقولى ايه
دا اسلوب حياه ومنهج
=======
اما اخيرا
ومعلش والله العظيم عارف انى بحط نفسى الايام دى كتير فى مواقف تجيبلى الكلام
لكن مابعرفش اقول غير اللى مقتنع بيه
لكن .. بلاش نساوى كل العائلات ببعضها
فى عائلات زى الست زوجة الارهابى .. بيبقوا عارفين ان اللى معاهم ارهابى ومش بيبلغوا
لكن برضو فى عائلات مابتعرفش حاجه عن ولادها
فى عائلات بتشوف ابنها رايح الدرس .. وهو نازى يشرب مخدرات
فى عائلات بتشوف ابنها نازل الجامعه .. وهو رايح مع الالتراس
فى عائلات بتشوف ابنها رايح من الشغل وجاى من الشغل
وهو اصلا بيقعد يجتمع مع ناس مش كويسين
اللى اقصده
خلونا دايما نفرق
يعنى لو اسره فيها 8 اخوات
والشيطان اتمكن منه ..
هل بالضروره الباقى كده؟ كفايه اصلا الفضيحه والعار اللى هايلاحقهم بسببه
انا اتكلمت بشكل عقلانى بدون انفعال
ومقدر نرفزة ناس كتير بسبب ظهور اهالى الارهابيين فى التلفزيون
لكن التعامل مع الملفات دى لازم يختلف عشان احنا شعب ضااايع فكريا
ولو ماخليناش الكلام يظهر فى البرامج والاعلام
هايروح بتوع الشيطان الرجيم الارهابيين يوسوسوا للبسطاء فى ودانهم
ويروجوا بينهم الاشاعات
=====================
إلحاقاً بالبوست السابق
مش انا اللى بفتح الباب !!
=========
لو تابعتم كويس اللقاء بتاع عمرو اديب امبارح مع اخو الارهابى
لما الراجل قعد يعيط .. وراح ناحية الباب
وعمرو اديب جه يطلعه ..فضل يشد الباب مش راضي يفتح
الراجل بيقوله طلعنى
رد عمرو اديب بالنص :
طب اقعد بس لحد ما يفتحوا
مش انا اللى بفتح الباب !!!!
=========
دا يؤكد ان التصوير ماكانش فى استديوهات
وقد يكون التصوير تم فى مكان أمنى
و دا قد يوثق وجهة النظر ان التصوير تم بموافقه امنيه
والملحوظه التانيه
بعد ما اعدت رؤية اللقاءين سواء عمرو اديب او اسامه كمال
تقريبا ديكورات المكان والالوان فى المكانين تقريبا تقريبا واحد
ما يدل برضو ان اللقاءين حصلوا فى مكان واحد !
لان دى مش استديوهات عمرو اديب او اسامه كمال
وفى نفس الوقت دى مستحيل تكون بيوت عائلات الارهابيين
اللى كلهم عايشين فى قرى فى اقاصي الصعيد !
والله اعلم برضو :)
E.E
Eslam Elbahrawy
