المتطرف المسيء للاسلام - والمتطرف المسيء للمسيحيه - بين يديكم الان مصدر تفجيرات كنيستى طنطا والاسكندريه
المتطرف المسيء للاسلام - والمتطرف المسيء للمسيحيه
بين يديكم الان .. مصدر تفجيرات كنيستى طنطا والاسكندريه
========
اتكلمنا وبنتكلم وهانتكلم
كان انتحارى ولا كانت قنبله ؟
يحيا الهلال مع الصليب
الاسلام برىء من الارهاب
الحل هو تغيير الخطاب الديني
لالا .. الحل هو القبض على كل المتطرفين
لالالالا .. الحل هو هدم الازهر باللى فيه
لا برضو .. يبقى الحل نراجع المناهج و المذاهب
واتكلمنا واتكلمنا واتكلمنا ... ولسه بنتكلم
============
التاريخ : 27 مارس 2017
المكان : قناة LTC
البرنامج : بنحبك يا مصر
المذيع : حاتم نعمان
الضيوف : مدعى الالوهيه .. خبير امنى .. شيخ مش حافظ القراّن !
============
كلمتكم عن الحلقه دى من حوالى اسبوعين
و ازاى اننا لما نيجب واحد ملحد نعمل معاه مناظره
لازم نجيب شيخ صح يناظره ..
مش نجيب شيخ لما الولد يسأله عن اّيه .. مايعرفش يكملها
وبكده يبان ان الولد انتصر .. دا اولا
اما ثانيا ..
فاكرين لما قولتلكم انا شوفت فى الحلقه دى اللى بينبىء بالدم
وانى بتمنى ان دا مايحصلش ...
========
بصوا لصورة البوست
سيبك من الولد اللى فى الصوره اللى هو كان موضوع الحلقه وهو اللى بيقول على نفسه المهدى المنتظر
عاوزكم تبصوا على اسم المتصل
المتصل دا هو اللى جاب اسباب تفجيرات الكنائس والكره والاحتقان بين المسلمين والمسيحيين فى مصر رغم ان الحلقه والمكالمه قبل الحادث بتاع الكنائس بحوالى شهر .. وهاوفر عليك واقولك يحيا الهلال مع الصليب وكل حاجه .. لكن فى متطرفين فى كل مكان وكل طائفه لاننا بشر مش كلنا هايكون صالح .. دا حتى زى ما فى اخوان ضد الانقلاب .. شوفنا جماعات اسمها مسيحيين ضد الانقلاب
===========
المتصل .. الحج سامى اللى من البحيره
اعطى للحكومه وللرئيس المرض ومكانه .. اللى لازم يعالجوه
المتصل قال :
الولد دا بهدلنا وبهدل الاسلام
دا عمال يطلع شوية مع سعيد حساسين وشويه مع وائل الابراشي ومضحك الناس علينا
لدرجة خلت زكريا بطرس فى قناته عمال يضحك علينا ليل ونهار !!!
===========
طبعا سيبتوا البوست كله واكيد الكل بيقول مين زكريا بطرس؟
شوفوا . جوا نسيج مجتمعنا فى ناس مولعه الدنيا نار
مسلمين ومسيحيين .. من الجانبين
اللى فيكم يعرف برنامج البالتوك paltalk
كان يعرف ان من سنين السنين فى حرب دائره على جروبات البرنامج دا
او هى بتسمى غرف ..
فكنت تلاقى غرفة الحوار الاسلامى وغرفة الحوار المسيحي
وغرفة الحوار الاسلامى المسيحي وهكذا
غرف حوار كتيير اغلبها كان لمناقشة الاديان والمناظرات
لكن ...
فى وسط دا كله كنت تلاقى
غرفه للمسيحيين .. فيها زكريا بطرس وهو قمص فى الكنيسه
شغله الشاغل يشتم المسلمين ويقطع فيهم ويشكك فى دينهم
والناحيه التانيه غرفه للمسلمين .. فيها ناس شغلها الشاغل
اثبات ان المسيحيين كفره وان دينهم غلط وانهم اهل النار
وظلت تلك الحوارات حبيسة موقع البالتوك وغرف المحادثه لسنوات لا يعرفها الا من يهتم بالموضوع
لكن فجأه اتنقل الحوار للعالم المفتوح
بقى فى اكتر من 800 قناه على النايل سات .. وفى الفيسبوك وتويتر
فبقينا نشوف برهامى بيكفر اللى يقول للمسيحي كل سنه وانت طيب
وبقينا نشوف زكريا بطرس على قناة الفادى بيغلط فى المسلمين
والتقطيع شغال من الناحيتين ...
====================
هو دا اللى محتاج تغيير يا ريس
هو دا اللى محتاج علاج يا ريس
راجع القنوات والبرامج والتوجهات
راجع وراقب ما يحدث فى الانترنت و الغرف المغلقه فيه
ما يحدث من تفجيرات وارهاب وقتل للمسلمين والمسيحيين على السواء
والله والله لم يكن يوما سببه فتوى او ازهر
انما سببه نار موقده منذ سنوات على الانترنت ومواقع الشات الصوتى
نار اشعلها مسلمين ومسيحيين
ارجعوا لاحداث ماسبيرو
الفيديوهات اتمسحت من الانترنت ؟؟ انا عندى الارشيف كامل اكتر من 300 فيديو
شوفوا يومها مين المسيحي اللى كان بيهدى الامور
ومين المسيحي اللى نزل قالك يجب ان نشعلها
وشوفوا يومها مين المسلم اللى نزل يهدى الامور ويقول الدم المصرى كله حرام
ومين المسلم اللى ولعها وقالك كفره وما حدث لهم يستحقوه !!
===========
انا عارف انى بالبوست دا جايز بفتح على نفسي باب جهنم
هتلاقى المسلم اللى بيشتمنى وبيقولى انت مغلط المسلم اللى بيقول على المسيحي كافر
وهتلاقى المسيحي اللى بيشتمنى ويقولى انت مش عاوزنا نرد على اللى بنسمعه
ومخلينا كمان جزء من المشكله ؟!!
انا اتعودت اواجه
واللى مصر بتعيشه حاليا سببه ثقافة دفن الرؤوس فى الرمال لاعوام واعوام
انا اللى بيني وبين ربنا هو وحده اللى يعلمه
وفى الدين بالذات .. مش بنتظر تقييم من حد
انا المناظر اللى شوفتها فى المستشفي يوم التفجيرات
قطع اللحم والوجوه اللى رايح منها اجزاء وريحة شعر الراس المحترق
يخلينى اقول واتكلم وماحطش قصادى الا ربنا وبس
============
عشان نواجه المشكله
لازم نواجهها مسلم ومسيحي مع بعض
المسلم يقول للى بيكفر المسيحي .. فى ربنا هو الوحيد اللى يحاسب البشر
والمسيحي يقول للمسيحي اللى بيحرض على الفتنه .. كفاكم عبثا بدماءنا
والا والله لن ينصلح الحال
ولا بتجديد خطاب ديني .. ولا بمراجعة مناهج ومذاهب
لان المشكله مش جوا مبنى الازهر
المشكله هنا .. على الانترنت .. على الفضائيات..على النايل سات .. على الصفحات
اللهم قد بلغت
اللهم فاشهد
اللهم انى قد قلت ما قلت فقط ابتغاء لمرضاة الله
E.E
Eslam Elbahrawy
