بعد تفجيرات محطات المترو الاخيره فى روسيا - الفرق بين بوتين الروسي وبوتين المصرى
بوتين الروسي و بوتين المصري !
=====
معلش لو اوقات بدقق في حاجات قد تبدو بالنسبالكم تافهه
لكن انا بشوفها مهمه اوي
النهارده كنت بتابع التفجيرات اللي حصلت في روسيا
وتوقفت عند شئ لفت نظري
في مصر
لو سمعنا صوت فرقعه .. بسرعه الفيس وتويتر بيتقلب
واللي يقول قنبله واللي يقول تفجير كنيسه واللي يقول عمل ارهابي
ونعمل شير .. ونعمل بوستات .. ونطالب الحكومه بسرعة الكشف عن الحادث
ولو اتأخر الامر ساعتين نقول شوف الاهمال والضعف .. مفيش معلومات
والاخر
يتضح ان صوت الانفجار كان بسبب ان طياره كسرت حاجز الصوت
بينما في روسيا النهارده
تخيل معايا
ان في تفجيرين في محطتين مترو
و ضحايا و قتلي و مصابين
وباين انه استهداف وارهاب
و بعد 3 ساعات من الحادث
يطلع رئيس الجمهوريه بنفسه .. الحج بوتين ويقول
ننتظر التحقيقات ولا نعلم اذا كان التفجير عمل ارهابي او لا
يالهوووي لو دا عندنا في مصر
وطلع السيسي ولا وزير الداخليه وقالك مانعرفش عمل ارهابي او لا
وهاننتظر التحقيقات
يقولك شوف الدوله الرخوه
رئيس جمهوريه وعنده مخابرات وشايف انفجار وضحايا وطالع يقولك اصل انا معرفش .. وكنا شوفنا تريأه وسخريه زي الفل
=====
المقصود
ان دي ثقافه اسمها امن قومي
ثقافه اسمها كل واحد يشتغل في تخصصه ومفيش مجال لمواقع التواصل انها تكون مصدر تحقيقات
ثقافه اسمها ان ليس كل ما يعرف يقال
ثقافه بتقول ان بدل ما اتسرع واقولك معلومه غلط .. ماتضغطش عليا وانا اخد وقتي في البحث ولما اوصل للمعلومه الصح هاتكلم !
ياريتنا نبقي كده
E.E
ESLAM ELBAHRAWY
