بالفيديو والصور - شهامة المصريين تتجسد فى طفل صغير بجوار عربة فول فى برنامج ورطه انسانيه
لمشاهدة الحلقه كامله من البرنامج على اليوتيوب اضغط الرابط التالى
الحلقه الاولى من برنامج ورطه انسانيه قناة DMC
===========
الصدمه تانى ... و فى مصر تانى !
قولتلك اسمك ايه؟ .. اسمى .. مابتهونش الا على الغلبان !
========
** من يومين كتبت عن برنامج الصدمه
وكنت متضايق من رد فعل المصريين اللى وقفوا يتفرجوا على بنت بتهين حماتها
واكدت ومازلت عند رأيى ان المصريين راح منهم حاجات كتير اوى فى السنين القليله اللى فاتت
** لكن برضو .. عاوز اقول ان الفرق بيني لما بنتقد وبين اى حد كاره للبلد دى
انى لما بشوف سلبيه بسلط الضوء عليها بشكل ايجابى عشان تتصلح
ولما بشوف الايجابيات برضو لازم اتكلم عشان ماينفعش يكون اللون يكون اسود طول الوقت
لكن اللى بيكره البلد دى .. السلبيات بيضخمها ويسلط الضوء بشكل خبيث
والايجابيات بيرميها ورا ضهره وبيعمل نفسه مش شايف
========
برنامج على قناة DMC اسمه ورطه انسانيه
فى حلقه من حلقاته بيعملوا عربية فول
بتدخل ست كبيره والناس بتاكل وتقوله هات ساندوتش بس مش معايا فلوس
بصراحه ناس كتير سيدات ورجاله من كل الاعمار تفاعلت
بس بطل الحلقه كان الطفل الجميل دا
اللى من ملابسه باين انه صنايعي يعنى بيشتغل فى ورشه او حاجه زى كده
الولد شاف الست وهو واقف ياكل ...
راح مطلع من جيبه فلوس وقاله هاتلها الساندوتش
وتمر دقايق ...
الولد واقف بياكل على العربيه بس شكله بيفكر او سرحان
وفجأه يطلع فلوس من جيبه ويقوله هات ساندوتش كمان
ويطلع الولد يجرى ويعدى الشارع والعربيات
عشان يلحق الست .. عشان يديها الساندوتش التانى
زى ما يكون حس ان ساندوتش واحد مش هايشبعها 
:)
:)
=========
بلدى حلوه والله
جايز فى ناس وسخوها اوى السنين اللى فاتت
بس فى حقايق لا يمكن تغيب عننا
المناطق الشعبيه حتى وان فقدت بريق الشهامه شويه الا انها مازالت المصدر للجدعنه .. الصنايعي ابن البلد اوقات بيكون ارجل من مليون دكتور ولا مهندس ولا ضابط .. مش دايما بلطجى وقليل الادب ومدمن زى ما السبكى ومحمد رمضان اظهروه فى افلامهم
والاهم من كده
والله العظيم مش بتهون الا على الغلبان
طفل زى دا ممكن يوميته تكون 10 جنيه
وجايب بنصها ساندوتشات لحد ما يعرفوش
انا يوميا بشوف ناس من اللى بيقولوا على نفسهم صفوة المجتمع
او اللى بيقولوا عليهم مرتاحين ماديا
والله العظيم بشوفهم بيمرمطوا العامل ويطلع يشترى ويجيب
ولو اتبقى جنيه او اتنين جنيه فكه .. بيقولوله هاتهم !!
الحنيه مش بتتشرى
والحنيه مش بمقدار الفلوس اللى معاك
الرحمه مسئول عنها ربنا فى القلوب
زى ما نشرت سلبيه بغرض اننا نفوق ونصحى
برضو بنشر الايجابيات عشان البلد مش كلها اسود !!
E.E
Eslam Elbahrawy
