لماذا تصر برامج التوك شو فى مصر على حرق دم المصريين - برنامج شريف منير وإبنته و الطفل المليونير
فعلا .... انا كشاب ... انبهرت
والحماس زاد فى قلبي وقررت اشتغل بجد بقى بعد الحلقه دى
لا حول ولا قوة الا بالله !
==============
ندخل فى الموضوع على طول
برنامج انا وبنتى
اللى بيقدمه شريف منير وبنته
هاخرج ثانيه عن الموضوع .. ضحكت لما شوفت البرنامج
الناس حاربت ما اسموه بتوريث مبارك
وال 100 مليون كلهم اصلا شغال بالتوريث مع عيالهم فى مجال شغلهم :D
المهم مش موضوعنا
موضوعنا هو موضوع الحلقه
جايبين نماذج عامله مشاريع عشان تشجع الشباب على الشغل
وعشان يقولوا للشباب بطل دلع بقى
النموذج .. كان الطفل صاحب ال 15 عام اللى قصادكم فى الصوره
تم تقديم الطفل المصرى الجميل دا انه صاحب 3 شركات
ايوه يمتلك 3 شركات وهو فى سن ال 15
بدأ الشاب .. مش هاقول الطفل بقى .. بدأ يتكلم عن تجربته
فالكل لاحظ ان الولد كلامه مخارجه صعبه
بينطق العربي غلط
فإبتسم شريف منير وقاله انت امريكانى ؟ او مش مصرى اوى يعنى
قاله لا انا مصرى .. بس انا العربي عندى ضعيف شويه لانى خريج مدارس امريكانى .. وفى المدارس دى مش بندرس حاجات بالعربي !!
المهم كمل الشاب صاحب ال 3 شركات الحديث عن تجربته
** اول شركه عملها .. قال انه نزل وجمع ارقام تليفونات الصنايعيه وبقى اللى يحتاج نقاش او سباك يكلمه كوسيط وهو يجيبه وياخد نسبه .. جميل طبعا
** تانى مشروع .. قالك انا وصاحبى فكرنا نقلل جشع التجار
بصينا لقينا ان الشيكولاتات المستورده بتيجي بتمن رخيص والتجار فى الهايبرات بيبيعوها بفلوس كتير ودا مش حلو .. فبدأنا انا وصاحبى بالدولار نستورد المأكولات المستورده زى الشيكولاتات ونحط هامش ربح قليل !
** المشروع التالت .. قاله انا لاحظت ان اكسسوارات الايفون غاليه اوى
حضرتك لو جيت تجيب جراب موبايل ايفون يبقى جاى من برا ب 10 دولار
ويتباع فى مصر ب 20 دولار
انا قررت استورد من برا .. والقطعه اللى بعشره دولار بحط مكسب دولار او اتنين بس !
===================
لحد هنا انتهت الجلطه بالنسبالى
حضرتك بتوجه كلامك لشباب مطحون مش لاقي الجنيه
وجايبله واحد عامل شركه بيستورد شيكولاته مستورده وجرابات ايفون
** اولا .. لما تجيب حد يكلم الغلابه .. لازم تجيب حد زيهم..نموذج لشاب غلبان وعمل فكره وربنا فتح عليه .. انما تجيب واحد خريج مدرسه امريكانى والعربي بتاعه مكسر واكيد لما يبقي 15 سنه .. يبقي بابا وماما هما اللى بيدوله الدولارات اللى بيتاجر بيها فى الشيكولاته المستورده ... دا يبقي صعب شويه
** ثانيا ... شيكولاته ايه وجرابات ايفون ايه
انت بتكلم الشباب المطحون فى سويسرا؟
ياعم الحج الناس عامله نواح فى الاسواق على سعر كيلو بطاطس
وانت طالع تكلمنا عن جرابات ايفون بعشرين دولار ؟
** ثالثا بقى و دا الاهم
كان نفسي تجيبولنا تجربة شاب جاب فلوسه بعد تعب
مش جاب الدولارات من اهله
طبعا هو حر وطبعا هو اكيد برضو نموذج للطبقه بتاعته
بس انت لما تعمل حلقه تقولى دا نموذج ليك
والاقى الكلام بالمنظر دا؟
حضرتك يا استاذ شريف منير انت وبنتك
شكلكم ماتعرفوش حاجه
استورد ايه بالدولار؟
الشباب فى البلد دى بينام على باب البنك بالايام عشان يتوافق له على قرض ب خمسسسسسسس الاف جنيه ..... وبنسبة 99% بيترفض الطلب
==========
لما تحب تتكلم عن الشباب المطحون او الغلابه
وحياة والدك هات حد منهم يتكلم عنهم
E.E
Eslam Elbahrawy
