بالصور - الرد على محمد ناصر دجال قناة الشرق بعد نشره لشائعة الغرف السياحيه لاسرائيليين فى مصر - ونكشف من هو ابو بكر خلاف الذي ساعد فى نشر تلك الشائعه
ناويين تركزوا وتبقوا اعلام بديل ... ولا نستسلم ونسيبها ليهم ؟؟
قرار السيسي بتخفيض سعر الفنادق للاسرائليين
خيانه .. المصريين يدفعوا دم قلبهم والاسرائيلي ياخد الغرفه ببلاش
لااااااااااااااااا
=================
مج القهوه فى ايدي ... وقطتى نايمه جنبي
وفجأه .. اتنفضت من مكانى ... والقطع راحت مساندانى معنويا ومنفوضه معايا
اللى بيحصل دا بجد ؟ معقول يا ناس !
لالا... اجيب الحلقه تانى من اليوتيوب عشان اتأكد من ودانى
محمد ناصر جايب الخبير فى اللغه العبريه والشئون الاسرائيليه ابو بكر خلاف ..
على قناة مقملين الشهيره بمكملين
وعاملين فقره .. ابو بكر خلاف يترجم فيها الصحف العبريه اللى بتتكلم عن مصر
لان انتوا عارفين بقى السيسي حليف اسرائيل وبيقولهم صديقي العزيز بيريز وكده !
المهم يا مؤمن ... قعد يترجم ويقرا اخبار
و وقف عند خبر فى احد الصحف العبريه
الخبر بيقول ان الاسرائيليين بيتجهوا للسياحه فى مصر لان مصر بتوفرلهم الخمس ليالى فى الفندق ب 100 دولار
وهنا يتحسر ابو بكر خلاف ويمصمص شفايفه ويقوله شايف الحال وصل بينا لإيه
بقينا نديهم الخمس ليالى ب 100 دولار يا استاذ محمد .. شايف !
طبعا السيسي قرر كده عشان يرضي الاسرائيليين لانه موجود فى السلطه بدعم منهم !
=================
انتهى الجزء دا ...
خلينا نحلله ونقول لابو بكر خلاف امك فى العشه ولا طارت
وبعدين نقولكم مين هوا ابو بكر خلاف
بخصوص ان الخمس ايام ب 100 دولار
الخاين اللى ترجم الخبر ..
ماقالش ان الخبر بيقول ان السائحين بيتوجهوا لمصر لانها مقصد سياحى رخيص مقارنة بباقى الدول .. و دا من زماااان اوى معروف...السياح الروس والاوكرانيين من ايام ما كنا شغالين فى السياحه كانوا يقولولنا بنيجي لان بلدكم ارخص واحسن بكتير من دول تانيه
اما بخصوص الخمس ايام ب 100 دولار
يا حمار .. او يا خاين .. او يا جاهل
الاسبوع اللى فات كنا عاملين تعاقد مع فندق ...
خمس ايام Full Board شامله السفر رايح جاى ب 2500 جنيه
احسب بقى .. 100 دولار بكام .. 1800 جنيه تقريبا صح !؟
طيب .. انا كمصري دفعت 2500 جنيه ...
شيل منهم مصاريف مواصلاتى رايح جاى .. الباص اللى الشركه هاتحاسب عليه
تقريبا بتدفع 450 جنيه .. وهاقولك ليه
ادخل الموقع الرسمي اعرف اسعار شركة السوبر چيت او شركة جو باص
الشركات اللى بتوصلك لشرم والغردقه
هتلاقى ان الباص من القاهره لشرم الشيخ ب 190 جنيه
انا كفرد من طنطا .. هسافر من طنطا للقاهره وهاخد مواصلات داخليه فى القاهره لحد ما اوصل لمكان الاتوبيس .... يعنى هاصرف 60 او 70 جنيه مواصلات كمان
يعنى الذهاب وقف عليا ب متوسط 250 جنيه
والعوده وقفت عليا بمتوسط 250 جنيه ...
اطرح 500 جنيه من 2500؟ يتبقي 2000 جنيه
يعنى تقريبا نفس سعر الغرفه فى خمس ليالى زى ما اتكلمت عنها الصحيفه الاسرائيليه !!
ولا اااايه ؟؟
===================
لا لسه..تعالى بقى شوف مين الراجل اللى بيترجم الصحف العبريه فى قنوات الاخوان ..ابو بكر خلاف
1- اخوانى هارب من مصر و هو قائد الكتائب الالكترونيه لجماعة الاخوان على الانترنت
2- المحرك الاول للشائعات الالكترونيه ضد مصر خاصة التى تخص الجيش المصرى نظرا لدرايته باللغه العبريه وسهولة فبركته للاخبار العبريه
3- خريج قسم عبرى بكلية الآداب جامعة عين شمس
4- عمل فور تخرجه فى المعهد الأكاديمى الإسرائيلى بالقاهرة حتى تم طرده من المعهد بسبب واقعة نصب
5- المسئول الاعلامى لشبكة رصد الاخوانيه
6- قام بإرسال عدد من الصحفيين الإلكترونيين إلى تركيا لتدريبهم لإحداث فوضى فى البلاد تحت مسمى الثورة الخضراء
7- كانت شركة «أوتو» للتدريب الإعلامى والتي تمولها الدوحة وهى تابعة لجماعة الإخوان، هي الضلع المهم في تمويل أبو بكر خلاف وكياناته الغير شرعية، حيث اتخذ القيادي الإخواني للشركة مقرين له الأول فى ميدان المساحة والثانى فى ١٠ شارع حسين وصفى بالدقى ويديرها الإخوانى «حاتم أوس الأنصارى»
8- اللافت أن تلك الشركة كانت تمول بعض الكيانات الإعلامية التابعة للإخوان في الداخل ومنها موقع «مصر العربية» الذي اعتبر منذ انشائه أحد الأذرع الإعلامية للجماعة الإرهابية، ولها حساب فى بنك قطر الوطنى رقم ٧٧-٢٠٣١٤٨٠٩٧٤٥
9- لتغطية جرائمه .. ولادارة اللجان الالكترونيه
انشأ نقابه اسمها نقابة الاعلام الالكترونى..يدير من خلالها كتائب الاخوان الالكترونيه ويتم تمويلها من قطر .. وهى التى تقوم على تحضير الاخبار والصور لقناة مكملين وشبكة رصد ومواقع الاخوان زى موقع مصر العربيه
10- اما بخصوص اسرائيل اللى طالع يتحسر ان احنا بنديها الغرف السياحيه ب 100 دولار بس. .. فهو متهم بالتطبيع مع اسرائيل ..اتجه أبو بكر خلاف لعمل دراسات عن الأدب الإسرائيلى، واختار بحثًا عن البعد الاجتماعى فى رواية الأديبة الإسرائيلية، سارة إنجل، وطلب من السفارة الاسرائيلية السفر إلى اسرائيل، لمعايشة أدب الكاتبة الروائية وبالفعل وصلت إليه دعوة للسفر إلى إسرائيل –من جامعة تل أبيب– وكان يستعد للسفر قبل القبض عليه فى 2015 ..
====================
مش بقولكم .. انا قاعدلكم
E.E
Eslam Elbahrawy
