حقنة وريد
حقنة وريد شكلت قصة واقعية عايشتها بكل ما فيها
احيانا تضعنا الحياة فى مواقف نرى من خلالها واقع مرير
او قد تكون صدفة خير من الف ميعاد
ان نرى الواقع حتى نرصد سلبياته ونحاول تغييرها
** سلام عليكم
** علكيم السلام
** لو سمحت بنسأل على دكتور هنا فى حالة خطرة؟
** بص يا كابتن روح هناك واسأل على دكتور فلان دا دكتور
المنطقة
سلام عليكم حضرتك الدكتور فلان
اه انا
طيب حضرتك عندنا حالة خطيرة والمريض وقع على دماغه وفاقد للوعى
ماشى انا جاى معاكم انا دكتور باطنة
باطنة ازاى حضرتك عاوزين حد مخ واعصاب؟
لا انا باطنة وانا دكتور البلد بس ان شاء الله هانشوف فى ايه
كشف الدكتور على الحالة
**لالا بسيطة دا مجرد ضغط عالى
هاتوا الحقن دى وتتاخد فى الوريد
**طيب يا دكتور ثوانى عشان تديها انت للمريض لان حقن الوريد مش سهله
**لا انا مابعرفش ادى حقن وريد !!!!!!!!!
شوفوا حد فى الصيدليه
طلعنا اخدنا توك توك يلف بينا نص ساعة
وكل دا والحالة فاقدة الوعى ومحتاجين ننقذها
لقينا 3 صيدليات
الصيدلية الاولى
لا والله انا مابعرفش ادى حقن وريد
بس اطلع على السكة فى صيدليه شوف فيها
خدنا التوك توك
الصيدلية التانية
لا والله انا بعرف ادى حقن وريد بس بخاف
فبلاش معلش
خدنا التوك توك عيادة زى مستوصف كده
دخلنا لقينا ست كبيرة لابسة جلابية سودة
وجنبها بنت تعمل 16 سنة
سألنا عن حد يدى الحقنة
الست قالتلنا البنت اهى بتدى حقن
طيب يا بنتى تعالى معانا
تقوم الست مصوته فى وشنا وتقولك مش بطلعها مع شباب
يا حاجة الله يهديكى دا منظر ناس جاية تغتصب واحدة؟
لا برضو روحوا هاتوا العيان وتعالوا
يا ستى المريض فاقد الوعى؟
لا برضو مش هاتطلع
وبعد اكتر من ساعة ونص اخدنا التوك توك ورجعنا بكل يأس
والاخر جت واحدة عندها ( هوووواية انها تدى حقن )
وخلصت الموضوع واديتها الحقنة
بعد كده تطلع على المستشفى الجامعى الحكومى
وانت مجبر تروح المستشفى الجامعى مش مستشفى خاص
لان المستشفى اجلامعى الوحيييييد اللى عنده جهاز اشعة رسم المخ والاشاعات المقطعية
تعمل اشاعة على المخ وهناك فى اتنين دكاتره شباب
كل واحد فيهم بيبص للاشاعة
واحد بيقول اه فيها شرخ
والتانى بيقول لا الدماغ سليمة
ومن باب الاحتياط بيقررورا يحجزوا الحالة
وبما ان مفيش سراير فاضية فى العناية المركزة بتاعت المخ
بيفضوا سرير فى العناية المركزة بتاعت القلب
ويبقى مريض المخ نايم فى عناية القلب
واحيانا دكتور العناية بتاع المخ بيقولك الاشاعة مافيهاش حاجة عشان مش عاوز يزود الحالات اللى عنده فبيوزعك اصلا
وبالمناسبة
والدى لما كان عنده جلطة والدكاترة بتوع المستشفى دى
برضو شافوا الاشاعة..واحد قال فيها حاجة والتانى قال
مافيهاش دا مجرد ضغط عالى
خلانا بكلامه نروح ويفضل والدى قاعد 3 ايام فى البيت بياخد
علاج ضغط على انه ضغط عالى ..واتضح ان بقاله 3 ايام
الجلطة شغاله فى دماغه
المهم ان الحمد لله بعد دا كله عدت على خير
بس جايز انا مش بروح مستشفيات مجانى او حكومى كتير
بس شوفت منظر امبارح واستغربت وصعقت منه
تقريبا فى ناس بقالها سنين بتتعالج فى المكان دا
ففوجئت ان الممر اللى بين كل دور وانت طالع السلم
فى ناس فارشه ملايات عالارض ونايمه بتتعالج عادى
وجايبين بطاطين وحلل اكل
وبيدقوا مسمار فى السلم ويربطوه بحبل
ويوصلوا الحبل دا لباب الاسانسير ( العطلان طبعا )
وبكده يكونوا عملوا حبل غسيل بينشروا عليه هدومهم
انا لخصت كل اللى حصل امبارح
كل حاجة شوفتها بعينى
وان كنت استحرمت اصور الناس دى والله
بس ما بين منطقة مافيهاش دكاترة
وبين صعوبة انك تلحق مريض ممكن يموت لان حتى الطريق
بتاع المنطقة صعب بيمشى فيه توك توك بس ماينفعش يمشى
فيه عربيات
وبين مستشفى جامعى بيشغل دكاترة شباب يجربوا فى العيان
وبين ناس نايمة عالارض فى الشتا وبتتعالج وعايشين الحياة عادى
وبين احساسى ان الرئيس الجاى همه كبير اوى
اقسم بالله العظيم انا فى عز المعمعة والقلق على المريض اللى
يخصنا
سرحت وقلت يا نهار اسود
الله يكون فى عونك ياللى جاى
سيسى ولا غيره دا هايشيل سواد اعظم
انا اّمنت فعلا ان الحل مش هايكون فى مصانع جديدة ولا مدن ولا استثمار
ولا الكلام دا خالص
الحل لازم لازم لازم تطوير العشوائيات
توصيل المرافق للمناطق البعيدة دى
تنضيف المستشفيات الحكومى
والله العظيم الناس اللى نايمة عالارض دى
هيا اللى نزلت فى 30 يونيو وهى اللى بتنجح اى نظام
وهى اللى للاسف لو وجدت واحد ارهابى داخل يقولهم تعالوا اعالجكم ولا ادفعلكم تمن اشاعة؟؟ للاسف بينتخبوه
انا اسف مرة تانية على الاطالة
واسف لو كنت مش بروح مستشفيات حكومى كتير
جايز حد يكتبلى كومنت يقولى دا بنشوفه كتير
بس احنا داخلين على مرحلة محتاجين نرصد سلبيات
عشان نعمل ملف يكون متقدم قصاد الريس الجاى
دا موقف حصل بالصدفة
ويمكن اجمل ما فيه وفى اليوم كله
ان الحمد لله ربنا رجعلنا المريض بتاعنا بالسلامة
ودى اجمل حاجة فى الموضوع
