تعددت الفتن والهدف واحد
بين تزايد ظهور الشيعه والملحدين فى الاعلام المصرى
مخطط تدمير المجتمع المصرى
إستوقفنى شىء وحبيت افكر فيه بصوت عالى معاكم
هو ليه فى ناس كتير مش عاوزة تصدق ان فى حرب علينا بصفه عامة وعلى الاسلام بصفة خاصة
انا ربطت شوية امور ببعضها وكالعادة قد اكون مصيب وقد اكون مخطىء ولكن .......؟
فى فترة حكم الاخوان شوفت تناقضين اغرب من بعض
الاول ان الاخوان سعوا للتقرب من ايران وادخال الشيعة لمصر
والثانى الحادث الشهير اللى الاخوان قتلوا فيه الشيعة فى مصر بحجة غيرة الاخوان على الدين الاسلامى
( وطبعا مع خلافى الكامل مع الشيعة وانى الحمد لله من اهل السنه والجماعه )
وايمانى الكامل ان الاسلام هو الاتباع الكامل للعقيدة وكتاب الله وسنة رسوله
الكريم دون التخلى عن اى جزء منها او الاختلاف فيه ولكن انا بتكلم عن فتنة تقودك لاستباحة الدم والقتل وتحويل البلد لغابة
** وهنا فكرت ان هل دا فى صالح الاسلام انك تقتل الغير ولا دا تشويه علنى للاسلام دا بالاضافه الى انك دخلت لوعى المجتمع ان مصر فيها شيعه وحصل قتل بين سنه وشيعه وبالتالى بتحولنا بالتدريج لمسلسل العراق خاصة اننا فى مصر عمرنا ما عرفنا سنه وشيعه دى
_______________
وبعدين سيبت الموقفين دول وروحت لحاجة تانية خالص وهى ريهام سعيد وحلقات
الملحدين اللى بتقدمها وخاصة حلقة الدكتورة المسماه بالدكتورة نهى
واستوقفتنى شوية حاجات :
1- هل ممكن الشخصية دى تكون مأجورة عشان تشوه فقط الاسلام كجزء من الحرب على الاسلام؟
هاتقولى يعنى ايه مأجورة
هاقولك
اللى اتفرج على حلقة الست دى هيلاقيها كانت بتقول بالنص كده
انا مؤمنة بالله ووجوده ولكن الدين الاسلامى والمسيحى واليهودى واى دين تانى ما هى الا اديان بشرية انا بنتقى منها الخير واؤمن بيه
صح مش هى قالت كده؟
ولكن لاحظتم كلكم انها كانت بتقول.. انا مؤمنة مسلـــــــــــلمة؟؟
طب ليه؟ وازاى؟
حضرتك بتقولى انا مش مؤمنة بكل الاديان لانها من صنع البشر.. انما كل الاديان عندى مناهج فيها حاجات حلوة انا باخد من كل دين الحاجة الحلوة اللى فيه
طيب ليه ما قولتيش انا مؤمنة يهودية؟
او انا مؤمنه مسيحيه؟
او انا مؤمنه بوذيه؟
ليه قوووولتى انا مؤمنة مسلمة؟
ازاى مش معترفه بكل الاديان
لكن وقت ما جيتى تتكلمى عن الالحاد قولتى انا مسلمة؟
علامة استفهام مش كده
2- تانى حاجة استغربتلها تسليط الضوء من الاعلام على الظاهرة دى عشان يقنعك انها موجودة وبكثرة فى مجتمعنا ودا لو ربطته بأول كلامى هتلقيه نفس الاسلوب فى تسليط الضوء على الشيعة فى الاعلام فى فترة حكم الاخوان وبالتالى اقنعوك ان فى خطر شيعى واحتلال شيعى وعملوا فتنه بيننا
مع عدم انكار وجود خطر شيعى انا متأكد منه ولكن ما يتم فى الاعلام لا يساعد فى التقليل من الخطر وانما يزيده فتزيد معه الفتن والدم
3- دى اهم نقطة
واحدة عارفه انها فى بلد حاليا فيه سلفيين واخوان وانصار بيت مقدس وشافت اخوان بيقتلوا الشيعة
الشيعة اللى مسلمين بس مختلفين فى العقيدة اتقتلووووا
والاخوان قتلوا المسيحيين
فما بالك لو انتى ملحدة؟؟ اكيد لازم تخافى اذا كان قتلوا المسلمين المخالفين فى العقيدة مش هايقتلوا ملحدة ؟
ف ازاى واحدة زى دى تطلع تقول اسمها وتلبس برقع خفيف يبين شكلها وتكون مش خايفه تتقتل ....................؟
** اجابة اخر سؤال عندى مالهاش الا احتمال واحد
انها كانت متطمنة لان اللى بيقتل هو نفسه اللى بعتها تشوه الاسلام
عاوزين شرح اكتر؟
انا اقصد ان الاخوان او المتطرفين اللى بيتصرف عليهم من برا وبيتاجروا بالدين عملوا
فتنه بحوار الشيعه وهما هما نفس اللى بيتمولوا من برا وهدفهم هدم الاسلام.. هما اللى بعتوا اللى اسمها نهى دى وكبروها على الفيس بوك وعملولها حس
لذلك هى كانت متطمنة انها مش هاتتقتل ... لان الناس المتطرفة اللى بتقتل ؟؟ هما نفسهم الناس اللى طمنوها واعطوها الامان عشان تشوه الاسلام
لان الناس اللى بتقتل الشيعة والمسيحيين مش بيقتلوهم عشان الاسلام .. دول بيقتلوهم عشان يشوهوا الاسلام وبالتالى تشويه الاسلام يبقى من جبهتين
واحدة دموية بالقتل
والتانية بالالحاد ونشره
وفى الحالتين الممول واحد ....؟
فكروا فيها
** اه اخيرا بقى
عاوزين دليل على كل ما سبق
افتحوا لقاءها مع ريهام سعيد تانى
هتلاقوا ملحدة مش مؤمنة بسيدنا محمد ولا بالقراّن ولا بالاديان السماوية ومع ذلك
عاوزة تروح لمحمد مرسى السجن تقوله انت مظلوم وبتوجه رساله للاخوان بتقولهم صعبانين عليا
والنبى مش مفهوووومه .....؟
** كالعادة وجهة نظر شخصية تحتمل الصواب والخطأ ولكن يكفى شرف المحاولة فى تشغيل حتت اللحمة المسماه بالعقل **
E.E
Eslam Elbahrawy
