حقيقة العالم - مدونة إسلام البحراوى: ذكريات النكسه السوده

ذكريات النكسه السوده

لجان شعبيه وسهر فى عز البرد

التاريخ : 28 يانير 2011

الزمان : الساعه 6 ونص مساءً

الحوار :

1- انا .. يا نهار اسود يا بابا شوفت عمر عفيفى ابن الجزمه؟

2- بابا .. ماله دا كمان وهو مين؟

3- انا .. يا بابا دا واحد هربان فى امريكا بيحط للناس خطط عشان يقتلوا الشرطه ازاى

4- بابا .. لا حول ولا قوة الا بالله

5- جوز خالتى : يابنى ما جايز بيتكلم صح ما احنا تعبنا برضو

6- انا : صح ايه يا عمو .. بقولك بيحط خطط لقتل ناس مصريين زيى وزيك

7- أمى : امى ماتكلمتش.. امى كانت بتعيط عشان البلد وبس !

وكأن قلبها كان حاسس ان اللى جاى خراب

8- خالتى : سيبوهم بقى ينزلوا جايز يغيروا البلد ( ابتسامة أمل )

9- بابا : اخر جمله .. مازال الكل يتذكرها .. حتى اللحظة

ابويا بص لخالتى وقالها بالنص :

والله العظيم هاتشوفوا ايام سوده.. انتوا مش عارفين اللى جاى ايه

والله العظيم بكره نتجمع وتكونوا بتندموا وافكركم باليوم دا

افتكرو اليوم دا يا عيال .. وافتكروه انتوا كمان ( الكلام موجه لخالتى وجوزها )

** بعدها بساعه وهما نازلين من عندنا... رجعولنا تانى جرى ..

القسم بتاع طنطا كان الناس اقتحموه والغاز كان مالى الدنيا وماعرفوش يروحوا ورجعوا تانى .. ودى كانت اول خطوات الندم

** حوار عمرنا ما بننساه فى بيتنا

دايما ابويا رغم مرضه اللى ممكن ينسيه تفاصيل كتير

الا انه مستحيل ينسى اليوم دا

وكأنه كان شايف وعارف

وفعلا.. شوفنا الايام السوده

** اسود يوم فى تاريخنا كشباب

لما نسمع ان فى ناس جايه بسلاح من محافظات جنبنا تسرقنا وتدخل البيوت على الحريم .. وتنزل فى البرد تقف وانت ماسك سكينه ولا شومه وانت مالكش فى الخناق وعارف انك لو ماسك سكينه ممكن تضيع فى لحظة لان اللى جاى يضربك معاه سلاح بطلقه واحده هايقتلك

** اصعب لحظتين مروا عليا

الاولى لما نزلنا لجنه شعبيه اول يوم خالص

وبعد خمس دقايق

كان اللى داخل علينا توك توك فيه 5 انفار كلهم معاهم سلاح ابيض واتنين معاهم مسدسات.. واللى حمانا ضابط شرطة كان ساكن فى العمارة اللى قصادنا وكان واقف معانا

ضرب عليهم طلقتين ووقفهم ودى كانت اول مرة اشوف ناس بتنضرب لحد الموت !

اللحظة التانيه لما كنا قاعدين تالت او رابع يوم وكنا بعد الفجر.

قاعدين بنعمل شاى على الخشب اللى مولعينه

وجالنا تليفون من واحده اخت واحد من اللى قاعدين معانا وهى ساكنه جنب سجن طنطا العمومى..وقالتله الحق دول فتحوا سجن طنطا !!

وهنا خلاص اتأكدنا اننا هانضيع

لان مفيش شرطة ودوريات الجيش قليله وسجن طنطا العمومى دا فيه كل القاتلين والمغتصبين الخطرين جدا

وبعد ما عيشنا ساعه من الرعب

اتضح ان السجن ماتفتحش لكن كان فى عربيات بتضرب بالاّلى على السجن لكن قوات السجن اتصدت لهم

** بجد ..

العيل اللى عنده 15 ولا 16سنه دلوقتى

يعنى وقت النكسه من 4 سنين كان عنده 12 سنه

يعنى كان طفل .. ودلوقتى بيتكلم عن الحريه والزفت