رساله الى عمرو اديب بعد هجومه الاخير على الرئيس مبارك - وكيف حال عمر بن الخطاب بعد وفاته ؟
رساله لعمرو اديب
الحفله اللى اتعملت امبارح تحت إسم ( مبارك ) مهروشه اوى ومالهاش لازمه
بس انا بشكرك على اللى عملته امبارح .. عارف ليه؟
لانك طمنتنى ان الحكم ان شاء الله هايكون براءه
عشان كده بتحاولوا كلكم تأثروا على الرأى العام والتأثير على القضاه عشان الحكم يجى على مزاجكم
انا متفائل خير وعاوز اقولك حاجه بسيطه اوى
مبارك براءته ظهرت جوا المصريين وجوا قلوبهم
الحكم هايفرق انه يخلى سجله نضيف قانونيا
ولكن عندنا احنا .. الحكم صدر من زمان
فمحاولة تلبيس الطاقيه لمبارك بقى اسلوب فاشل
المفروض انك اعلامى ذكى .. ازاى تكون بالسذاجه دى
عاوز تستخدم اسلوب تم استخدامه فى 25 يناير 2011 ووقع بلد وخلى الناس كرهت اى حد شارك فيه .. ومفكر انه هاينجح تانى؟؟
احترموا عقولنا
غريبه ان ست تولد فى الشارع فى 2014 ؟ فتقول يخرب بيت مبارك !
رغم انك كان الاولى تبحث ورا الفيديو وتعرف الست دى مين ؟
والفيديو اتصور ازاى ؟ ومين الزوج اللى هايشوف مراته مرميه بتولد ويتحكم فى اعصابه ويصورها بالموبايل ؟ وكنت بحثت فى كلامنا اللى بنقوله وشوفت وزارة الصحة مين متواطىء فيها من التنظيم الارهابى وبحثت عن الحوادث المتتاليه فى المستشفيات لتشويه الدوله زى حوادث العثور على ثعابين فى غرف العمليات وصور لمرضى مرميين على باب مستشفيات وجثث على باب التأمين الصحى ؟
كأعلامى شاطر كنت بحثت ولو بحثت .. صدقنى وانا جايبهالك من الكنترول .. هاتعرف ان كل دا مدبر مسبقاً
يا اخى زمان كان بيقول ان لو دابه تعثرت فى العراق بيسأل عنها سيدنا عمر بن الخطاب .. ولكن ماسمعناش ان بعد موت عمر .. لما كانت دابه بتتعثر .. كانوا حد بيشيل سيدنا عمر الذنب !
انتوا هاتفضلوا لحد امتى تشيلوا مبارك الشيله؟
مبارك جه بعده 3 رؤساء منهم واحد جاسوس .. مرسى وعدلى منصور والسيسي
ليه لما شوفت الست بتولد فى الشارع قلت الله يخرب بيتك يا مبارك .. وليه ماقولتش الله يخرب بيتك يا مرسى ياللى فى عهدك نقابات الاطباء والصيادله استولى عليها الاخوان !!!!
عارف انا وصلت لايه ؟؟ انى هامووووت واعرف مبارك حارقكم اوى كده ليه
واحد فى اواخر ايامه ومسجون ومع ذلك ؟؟ مش ساكتين
مر عليكم 3 رؤساء بعده
وحصل نكسه وبعدها ثوره
وفى ارهاب
وفى قناة سويس جديده
وكل دا سايبينه .. وبتبص لمبارك و شغال على نغمة ال 30 سنه
رغم انك يا اخى سبحان الله دايما تطلع تقول يا جماعه نترك الخلافات ونبص للمستقبل .. مش مهم مين ظهرله تسجيلات ولا مين خطط للحرق لان النظر للخلف هايجيبنا ورا وخلونا نتوحد ونبص للمستقبل .. مش دا كلامك؟؟؟
امال اشمعنى عند مبارك .. ومحلك سر واثبت مكانك و عد للوراء وللماضى !
قلت مليون مره ... مش هانطبل ولا لاعلامى ولا سياسى
انا بحترم فيك دماغك كإعلامى .. لكن مش معناه انى اشوف الباطل واسكت
E.E
Eslam Elbahrawy
منشور by Eslam Elbahrawy.
