تمرد كما رأيتها منذ البدايه - وكانت الكلمات غير مباشره حرصا على الوضع العام - هذا هو رأيى فى تمرد وقادتها
احيانا الواحد بيكتب حاجات مش مفهومه
او بيكتب المعلومه ناقصه
وانتوا بتزعلوا وبتقولوا مش فاهمين وبطل غموض
وبيكون الرد دايما .. الصبر لان كل حاجه فى وقتها
اللى شاف حلقة احمد موسى اول امبارح مع هشام سرور
عرف ان حسن شاهين عضو تمرد هو اللى كان بيجرى جنب فتاة العبايه ام كباسين اياها ..
لما بدأت تمرد الواحد كان بيتكلم على استحياء
شويه نجيبلكم صور محمود بدر متصور جنب برواز لاحد المراجع الشيعيه
وشويه اقول ان بلاش نمشى بمبدأ عدو عدوى يبقى صديقى
والناس ماكانتش فاهمه واللى كان بيفهم كان بيتهمنى انى ضد تمرد وانى بحب الاخوان او انى ضد الجيش !!
** بداية احساسى بشىء غلط ناحية تمرد .. كانت اغنية تمرد الرسميه
وهى الاغنيه اللى قدمها عمرو قطامش .. طبعا قطامش اللى كسب برنامج عرب جوت تالنت لانه كان بيقدم اشعار لصالح نكسة 25 يناير
ومش بس كده .. دا ماكانش السبب الوحيد
السبب التانى .. ان الاغنيه كان فيها كوبليه بيقول
وقالك ازاى تثوروا عليا .. لذلك هانعمله حفلة تمرد
ونعزمله فيها ( ام خالد سعيد ) .. ونعزمله فيها وطننا المشرد
لما شوفت اسم ام خالد سعيد .. عرفت القصه ماشيه ازاى
ولكن وقتها الكلام ماكانش ينفع لان الشعب كان طالع ورا تمرد ضد الاخوان
وكلنا كنا على قلب رجل واحد.. الجيش المصرى
وكلنا كان هدفنا واحد .. عزل الجاسوس ودفن الجماعه للابد
** حتى من اسبوعين لما كتبت وقولتلكم
ان محمود بدر وحسن شاهين بالتحديد قصتهم بالنسبالى بتشبه قصه كده صغيره ..
وقولتلكم .. ان فى شارع الناس اللى فيه طيبين
لكن اول الشارع من ناحية الشمال فيه بلطجى
واول الشارع من الناحيه اليمين فى تاجر مخدرات
وسكان الشارع الطيبين محطوطين فى النص بين الاتنين
ف بييجى كبير الشارع وبيستخدم ذكاءه
بيروح لتاجر المخدرات بيقول اقتل البلطجى وتبقى انت كبير الشارع
وبيروح للبلطجى ويقوله اقتل تاجر المخدرات وتبقى انت كبير الشارع
وبعد ما واحد فيهم يموت والتانى يتسجن . الشارع بينضف والناس تعيش فى امان
وقتها محدش فهم المثل دا ..
اتمنى تكونوا فهمتوه .. احيانا بتضطر تستخدم عدوك كأداه عشان تقضى بيها على عدو اخر وفى النهايه فى داهيه الاتنين
او بمعنى اصح
بتضرب الظالمين بالظالمين
شخصيا دى وجهة نظرى
ولسه الايام الجايه هانشوف كتير
E.E
Eslam Elbahrawy
منشور by Eslam Elbahrawy.
