بعد القبض على سائق مقطوره يده مبتوره - فعلا كانت لازم تكون ثوره على مبارك !!
بصراحه فعلا فعلا فعلا كان لازم ثوره
لما واحد دراعه مبتور يسوق تريله ( مقطوره ) يبقى دى مشكلة رئيس
لما واحد يسوق ودراعه مقطوع وبدون رخصه يبقى دى مشكله حكومه
ايوه صح
كان لازم الثوره تقوم على الرئيس والحكومه والشرطة والجيش !
اصل هما اللى جابوا المقطوره لواحد ايده مقطوعه وقالوله سوقها واعمل حادثه وموت واقتل الابرياء وبعد ما تعمل الحادثه ماتقلقش هايطلع بتوع حموم الانسان يقولك اصل الطرق هى اللى وحشه والحكومه برضو مقصره !!
وياريت محدش يقولى اصل الحكومه مش وفرتله شغل فعمل كده
ايا كان .. دا مش مبرر للغلط
انا بشوف حد دراعه مبتور بيشتغل بياع فى مخبز
اللى بيغير الانابيب فى منطقتى دراعه مبتور
فى ناس من ذوى الاحتياجات الخاصه بيطلعلها رخصة قيادة بس للملاكى
انما مقطوره ويسوقها واحد بالشكل دا ؟
لما يدهس اتوبيس ويموت الناس مش هانقول غير ان الطرق وحشه وبس
انما محدش هايتكلم عن اهمالنا واستهتارنا كشعب
هافضل اكررها واعيدها لحد ما اموت
الثوره كانت لازم تبقى ثورة عقول
ثورة ضمير
ثوره ضد شعب يعشق الفوضى
ثوره ضد شعب دايما فاتح الدرج للرشاوى
ثوره ضد شعب بالنسباله السير عكس الاتجاه حرية وديمقراطيه
ثوره لشعب بيكسل يمشى 5 متر ويحط الزباله فى صندوق وبيرميها فى الشارع
ثوره ضد شعب بقي بيقول ازبل الالفاظ والبنات والستات واقفه
الثوره كانت لازم تعملوها على نفسكم
قبل ما تعملوها على الكراسى
E.E
Eslam Elbahrawy
منشور by Eslam Elbahrawy.
