رساله من شاب مصرى الى كل شاب يمحو مستقبله بسبب الاخوان المسلمين - لسه الوقت بدرى - تقدر تحط ايدك فى ايدى
البوست دا مش معمول للشتيمه فى الاخوان
البوست دا مش معمول للهجوم
البوست دا رساله صادقه لكل شاب هايشوفه
اللى قصادكم فى الصوره دا ولد من اللى اتقبض عليهم وهو بيحضر لرمى عبوات ناسفه قصاد قسم شرطه
بيبكى .. وبيقول انا ضيعت نفسى ومستقبلى ومستقبل اهلى عشان ناس ضحكوا عليا قاعدين فى التكييف واحنا بننام على البلاط
انا رسالتى لكل شاب من سن 16 سنه فما فوق
بص لنفسك .. راجع نفسك
لسه الاوان مافاتش .. والله لسه تقدر ترجع انسان محترم بيحب بلده تانى
فكر فى نفسك .. شوف مين اللى بيضيع؟ انت واللى زيك وبس
ولا ابن المرشد ولا ابن مرسى بيتأذوا انما انت بتتأذى
اقسم بالله بكتب كلامى وانا شايف كل واحد فيكم
وعارف ان فيكم شباب قلبه نضيف وكويس وبشوية كلام انضحك عليه
انا بكتب الكلام وانا باصص لاخويا اللى فى سنك
الشاب اللى فى تانيه او تالته ثانوى ولسه قدامه حياه يعيشها ويفرح بيها ويسافر ويحلم ويدرس ويرتبط ويعمل كل حاجه حلوه
ليه تضيع كل دا؟ ليه تنام فى سجن وانت لسه بتبتدى حياتك؟
ليه تخلى مكانك جوا سجن .. وانت اصلا مكانك الطبيعى فى بيتك وسط اهلك
عشان مين تفجر وتقتل؟ عشان قضيه؟ القضيه اصحابها باعوها لانها اصلا مش قضيه
عشان فلوس؟ ملايين الدنيا هاتعملك ايه لو اتسجنت؟
ملايين الدنيا هاتعملك ايه لما تتحبس واختك البنت حالها يقف ومايرضاش حد يتجوزها لان اخوها مسجون و رد سجون؟
ملايين الدنيا هاتعملك ايه لما ابوك يوطى على رجل وكيل نيابه يبوسها عشان يفرج عنك؟
ملايين الدنيا هاتعملك ايه لو اتقبض عليك وجالك خبر وفاة امك من حسرتها عليك وانت جوا السجن؟
صدقنى .. انا مش خسران حاجه وانت مش فى صفى
بس انا بعترف انى هاكسب لو انت بقيت فى صفى
وانت مش معايا ؟ انا قادر امشى بلدى
بس وانت معايا .. هاقدر امشيها اسرع
انا محتاجك .. محتاج عافيتك وشبابك وحماسك واندفاعك
محتاج الهتاف اللى بتهتفه بدل ما تشتمنى بيه
ننزل انا وانت نهتف.. مش نهتف لرئيس او لحكومه معينه
انما نهتف لبلد لو وقعت هتاخدنى وتاخدك ونندفن تحتها
فكروا
فكروا فى اهاليكم واخواتكم
فكروا فى مستقبلكم واللى بتحبوهم
فكروا لو القضيه قضية دين ومبدأ؟
عمرك شوفت واحد صاحب مبدأ وقضيه يأجر حد تانى يدافعله عن المبدأ دا؟
صاحب القضيه بيدافع عنها بنفسه
ابن محمد مرسى بيجاهد على تويتر
وانت فى الشارع بتجرى وبيتقبض عليك وبتخسر كل حياتك
شيروا البوست
وكلموا الشباب الصغير
لسه عندنا امل نلحق كتير منهم
مش هاكلمك كأنك متهم لان كلنا بنغلط وانا غلطت قبلك وكلنا بشر
بس فكر .. والله طالب منك بس تفكر
سيبك منى ومن السيسي ومن مرسى
فكر بعقلك .. فكر فى كل اللى حاصل
E.E
Eslam Elbahrawy
منشور by Eslam Elbahrawy.
