هؤلاء هم اصدقائى الذين خسرتهم بسبب السياسه من بعد احداث 25 يناير - تذكرتهم بعد مشاهدة مشاجرة يوسف الحسينى واحمد موسى
النهارده رجعت البيت وبدأت كالعاده افتح برامج التوك شو واتفرج على ابرز اللى اتعرض فيها
المهم شوفت الفيديو اللى يوسف الحسينى بيشتم احمد موسى فيه
وشوفت الفيديو اللى احمد موسى شتم يوسف الحسينى فيه
وبعدين روحت على قناة القاهره اليوم على اليوتيوب
شوفت حلقة عمرو اديب النهارده
وشوفت لما جمع يوسف الحسينى واحمد موسى فى مكالمه واحده عشان ينهى الخلاف
الخلاف كان سببه
احمد موسى بيحب مبارك
يوسف الحسينى بيكره مبارك
الاتنين شتموا بعض
ولكن عمرو اديب جمع الاتنين فى مكالمه وقالهم ان العدو الواحد اللى هو الاخوان فرحان بشتيمتكم لبعض .. ومش فارق معاه مين بيحب مبارك او مين بيكرهه .. ومش فارق معاه الا ان البلد تقع وفرحان باللى حاصل
وما كان من الاتنين الاعلاميين الا انهم تعهدوا على الهواء
ان كل واحد يحتفظ برأيه لنفسه ويقول اللى هو عاوزه فى برنامجه
لكن دون تجريح او شتيمه فى طرف اخر
وبصراحه كان موقف محترم بغض النظر عن رأيى فى الاتنين الاعلاميين من عدمه
لكن .. بعد ما خلصت المكالمه بينهم
بدأت افكر فى نفسى .. وافتكرت حاجات كتير
وحبيت حتى افضفض بيها معاكم لانى حسيت ان المكالمه دى والخناقه دى .. اتكررت حتى فى حياتنا احنا
جايز تكون اسرار فى حياتى الشخصيه الواحد بيحكيها لاول مره باعتبار انى مش بحب اتكلم عن حياتى الخاصه على الفيس بوك
لكن .. بعد 25 يناير كنت من اللى كارهين ليها اوى
كرهتها لانها دمرت البلد ولانها دمرت اكل عيشى
انا اصحابى والشله بتاعتى كبيره .. قد تكون من 10 ل 12 صديق
بعد 25 يناير كنا تقريبا 99% مننا مش حابين 25 يناير
وكان فى البعض شايف انها ثوره وان فى ناس ماتت والحكومه قتلتها والكلام دا
وفضلنا نساير بعض ومش عاوزين نخسر عشرة عمر مدتها اكتر من 10 سنين
بعد كده لما بدأت الحقايق تتضح واحده واحده بدأت الناس تؤمن اكتر بسبب اللى شافته ان يناير كانت نكسه على البلد .. بعد كل الخساير البشريه والماديه والسياسيه اللى حلت على مصر
وبقى الاختلاف بيننا كأصدقاء فى شله واحده
ان يناير اه مؤامره بس فى اللى كارهها بالكامل
وفى اللى شايف انها رغم انها مؤامره الا ان عصر مبارك فيه فساد وبطاله وناس بتعانى فكان لازم يتشال ويمشى !
وبرضو فضلنا نساير بعض لان ماينفعش تخسر صاحبك اللى فى مثابة اخوك
وصلنا لانتخابات الرئاسه بين شفيق ومرسى
وطبعا كان كل جهدى انى افضل اكلم اصحابى واقولهم ان مرسى ماينفعش لانه جاى من جماعه طول عمرها ارهابيه
لكن قابلتنى مشكله .. وهى ان مش كل الناس عندها نفس المقدار من المعلومات
فكان ليا اصدقاء كارهين ل 25 يناير
لكن مايعرفوش الاخوان .. مايعرفوش حقيقتهم..ماحدش فيهم اشترى كتاب عشان يعرف تاريخ الجماعه الارهابى .. وبناء عليه وبحكم اقارب ليهم او بحكم عملهم او اى مؤثر اخر .. قدروا يقنعوهم يختاروا مرسى من مدخل انه جاى يطبق الدين
ولان اصحابى ماشاء الله عليهم عندهم جزء التدين والاحترام كبير اوى
فكان المدخل دا مؤثر عليهم بشكل اقنعهم لاختيار مرسى
وكانت اول ضربه قسمت الشله نصين
لما اجتمعنا قبل انتخابات الرئاسه بين مرسى وشفيق بأيام
وكنا فى كافيه انا واصحابى
وصديق ليا هايختار مرسى .. وانا بقنعه بشفيق
فبقوله الاخوان ارهابيين .. قالى وانا اعرف انهم بيعملوا خير
فبقوله بس انت ماتعرفش تاريخهم دا كلهم كلاب
قالى كلاب؟؟ انا اعرف ناس معارفى وقرايبى من الاخوان ومش كلاب
ومن هنا قامت خناقه وقلبنا طرابيزه على بعض
وقاطعنا بعض مده .. مع العلم ان صاحبى دا وبدون ذكر اسماء
من اقرب الناس ليا وحتى صورى وبوستات الفيس بوك معظمها معاه !
بعد فتره بدأت العلاقه ترجع واتصالحنا ولكن كل واحد جواه حاجه مش قادر ينساها
وانا باصص لصاحب عمرى بس شايل منه لانه انتخب واحد ارهابى
وهو باصصلى على انى قليت ادبى وانى انتخبت واحد شارك فى قتل الناس !
وفضل التعامل من برا ومن الظاهر كويس لكن من الباطن النفوس مش كويسه
لحد ما ظهر اللى ظهر من حكم الاخوان
ولقيت صاحبى دا .. ولانى زى ما بقولكم انا اصحابى محترمين
فكان عنده الشجاعه انه يجى ويكلمنى ويقولى ان اختياره كان غلط
بس ماحدش كان عارف التاريخ الاسود دا وكله كان شايف الاخوان اللى كانوا ظاهرين ايام مبارك اللى بيوزعوا زيت وسكر وبيعملوا مستوصف طبى ببلاش وكانوا ظاهرين بمظهر الملايكه !
وهنا بدأت احس ان انا اصحابى بيرجعولى.. وان مفيش جوايا حاجه من ناحيتهم
ولا هما جواهم حاجه من ناحيتى
وصلنا بعد كده لفتره 30 يونيو
اصدقاء مقربين جدا جدا
نزلنا كلنا.. وبكرر كلنـــــــــــــــــــــــــــــــــــا نزلنا الميدان يوم 30 يونيو ويوم 3 يوليو .. وكنا بنطالب برحيل الخاين محمد مرسى
ولكن بعد فض اعتصام رابعه .. وكالعاده بكرر الجمله تانى
ان مش كلنا نملك نفس المعلومات ونفس العقل والتفكير
فى ناس اتأثرت بقصة ان الجيش قتل الناس .. وانضحك عليهم بالكلام دا
وبدأ الصف بيننا كأصدقاء ينشق مره اخرى
هاقولهالكم صريحه .. كرهنا بعض..
انا كرهتهم .. جايز اللى بيقرا الكلام حاليا يستغرب
بس انا كرهتهم لانى كنت كاره للاخوان
وهما ماكانوش اخوان .. لكن شغل قناة الجزيره أثر عليهم فخلاهم تعاطفوا
وانا فى نظرى المتعاطف .. يبقى اخوان .. وانا بكره اى حد له علاقه بالاخوان
عارفين النتيجه كانت ايه؟؟؟
النتيجة كانت خناقه اول مره وشتيمه وسب ولعن
وبعد اتفاق اننا مانتكلمش فى السياسه عشان مانخسرش بعض
عملنا خناقه تانيه وكانت اكبر من الاولى
وكانت النتيجه النهائيه
انى قاطعت ناس من اصحابى لمدة 6 شهور
عملتلهم بلوك من الفيس بوك ( ومازال معمولهم بلوك )
وقاطعتهم .. مفيش خروج ولا تليفونات ولا كلام ولا مقابلات
لكن بعد فتره .. فكرت ؟؟
ايه اللى ولاد الكلب دول عملوه فينا
يعنى عشرة سنين يجى فجأه الاخوان يخلونى اشوف صاحبى فأدخل شارع تانى عشان ماكلموش؟؟؟؟
فكرت .. واخدت قرار انى اكلم اصحابى تانى
لانى متأكد انهم مش اخوان .. بس فرق العقليات والتفكير بيختلف
وهما نجح تأثير قنوات زى الجزيره عليهم .. بس مانجحش معايا
فمحبيتش اعاقبهم على حاجه وقع فيها ناس كتير
لكن ابقى كداب لو قلت ان الشرخ دا اتصلح
فيهم ناس قدرتنى زى ما قدرتهم ومابقيناش نتكلم فى السياسه
وفيهم ناس سافروا برا يشتغلوا فى بلاد برا و عز عليا اوى انى اعرف انهم متجمعين فى كافيه الليلة الى هايسافروا فيها عشان يسلموا على بعض وانا ماروحتش لانى شايل منهم بسبب انهم ماقدرونيش زى ما قدرتهم
النهارده بعد ما نزلت صور لينا فى الكافيه واحنا بنحتفل ببراءة مبارك
روحنا قابلنا باقى الشله عشان نلعب بلاى ستيشن والمهم خلصنا وقولنا نقعد فى كافيه تانى نسهر سوا
اتفتح الحوار تانى عن الحكم .. رغم اننا متفقين مفيش كلام سياسه
بس غصب عننا موضوع فارض نفسه
بدأت انا اشتم فى يناير واللى عملوها واللى ماتوا فيها
وقاعد وسطنا شاب صغير 22 سنه متحمس وجايز خبراته فى الحياه مش كبيره
صور الناس اللى بتعيط مأثره عليه وبدأ يتكلم ويقولى ازاى دا فى ناس ماتت شباب منهم واحد صاحبى مات فى الاحداث دى وماكانش بلطجى !!
وتطور الحوار ان الصوت اصبح عالى وكنا هانمسك فى بعض
لحد ما واحد فينا صرخ وقال كفايه ووقفوا الكلام !!!!!!!!!!!!!!!
** بعد الدوامه دى كلها
بصيت لنفسى ..وانا قايم بستأذن وسايبهم وماشى
ايه اللى بيحصل دا؟؟ ايه اللى احنا عايشين فيه دا؟
بنقطع فى بعض وبناكل فى بعض وبنكره بعض ؟
عشان مين طيب ..
احنا مفكرين ان احنا كل واحد فينا بيعمل كده عشان هو بيحب مصر اكتر من التانى
بس الحقيقه المره
ان انا بدافع عن مبارك اللى مضى !
وهو بيدافع عن يناير اللى مضت !!
ومصر .. اللى مفكرين اننا بنحبها مش مستفيده حاجه من الماضى دا
وبتقـــــــــــــــــع بينا واحنا بنوقعها !
دا اللى افتكرته لما شوفت مشهد يوسف الحسينى واحمد موسى
بيقطعوا فى بعض ويشتموا بعض
بس لما جالهم جرس انذار ان الاخوان فرحانين فيهم وشمتانين
طلعوا وقفلوا الموضوع
** جايز تقولولى ايه التفاهه دى .. او ايه علاقتنا بالكلام الكتير الممل دا
وناس هاتستغل البوست يقولك الحق دا بيدافع عن المتعاطفين مع الاخوان !
وواحد تانى يقولك الحق دا طلع فلول بلاستيك ومش بيحب مبارك
بس كالعاده والله ما بتفرق
انا بس افتكرت ان ليا اصحاب مقاطعهم
وليا اصحاب برا البلد مقاطعهم
حتى وان كنت شايفهم غلط وهما شايفنى غلط
بس احيانا العشره بتفرق معاك
انا مش بقول للى بيحب مبارك بطل تحبه لان انا مش هابطل احبه
ومش بقول بطل تكتب انك بتحب مبارك لانى مش هابطل اكتب
بس بتمنى الكل يعمل زى ما بعمل
انا على بروفايلى بكتب كل حاجه
بس مستحيل اروح لبروفايل واحد شاتم مبارك وادخل انا اشتمه
كبيرى ممكن الغى صداقه او اعمل بلوك لكن هو حر يقول اللى يقوله
انما انا حتى كان نفسى الناس تتعامل معايا كده
انا على مدار 48 ساعه فاتوا اقسم بالله ابويا وامى اتوصفوا بكل ما تتخيلوه من شتايم سواء فى الكومنتات او الرسايل لانى باركت لمبارك
اينعم بتشتم من تانى يوم بعد 25 يناير
بس المره دى الموجه كانت كبيره .. انا لو صورت كمية الرسايل اللى اهلى بيتشتموا فيها اقسم بالله ما هاتكفى بوستات لاسبوع جاى بس مقدرش لان فيها الفاظ تخجلنى انا كشاب
انا كتبت البوست الطويل العريض دا
اللى ممكن حتى ناس كتير منكم ماتكملوش للاخر
بس عشان اقولكم .. ريحوا دماغكم من الشتيمه فى الاخر
حافظ على رأيك ومبدأك ولو عاوز تقاوم الاخر قاومه بالحجه والمنطق والمناقشه
انما كفايه سب دين وكفايه شتيمه بالام والاب وبهدله
لا مبارك هايرجع .. ولا يناير هاشوفها انا ثوره ولا هو هايشوفها نكسه
ومصر اللى بتقع ودمنا اللى بيسيل
خلى رأيك على صفحتك الشخصيه وبس
ماتروحش تشتم حد كتب على صفحته حاجه
لان ولا شتيمته هاتخليك تغير رأيك ولا شتيمتك هاتخليه يغير رأيه
** طبعا كلامى عن المناقشه والحجه دا فى المختلف بالرأى باحترام
اما اى مساند للارهاب ومحلل للدم المصرى سواء شعب او جيش او شرطه
لا حوار ولا نقاش مع حد بيكرهنى وبيكره بلدى
وحبيت اوضح النقطه دى عشان مهمه جدا
انا اسف للاطاله
والله العظيم ما اعرف انا كتبت البوست ليه
بس الموقف فى التلفزيون خلانى افتكرت اصحابى اللى مقاطعهم
وخلانى افتكرت اصحابى اللى بقعد معاهم كل يوم وشايل منهم
وحبيت ان لو فى ناس اصدقاء زينا هايبتدوا يدخلوا الدوامه دى
حبيت احذرهم واقولهم حافظوا على بعض وعلى الاقل
خلوا كلام السياسه على النت ولما تقعدوا مع بعض اقفلوا النت والموبايل واللاب توب وامنعوا كلام السياسه واتكلموا والعبوا وغنوا وافرحوا عشان ماتخسروش بعض
#مبارك_برىء
#السيسي_رئيسى
#تحيا_مصر
#والله_بحب_اصحابى
E.E
Eslam Elbahrawy
منشور by Eslam Elbahrawy.
