اخر تطاولات اسلام بحيرى على الدين الاسلامى : واحد بيقول للرسول ياعم !
لما اتكلمت عن اسلام بحيرى من كام يوم
بعض الاصدقاء وصفونى بأنى داعشى و ادعم الارهاب
وبحارب المفكرين المتنورين اللى عاوزين ينضفوا عقولنا !
رغم انى دايما بكرر انى مش ضد تصحيح اى خطأ
ولكنى ضد دس السم فى العسل
ضد هدم دين كامل تحت مسمى عدم تقديس اشخاص
امبارح بقلب فى التلفزيون وكان اسلام بحيرى شغال
وفى وسط الحلقه .. كان بيحكى موقف من ايام الصحابه ولقيت الباشا بيقول بالنص :
كان فى اربع رجال متضايقين من زوجاتهم .. فالرسول معدى فبيقولوله ياعم دول مغلبينا وطلباتهم كتير
( يا عـــــــــــــــــــــــــــــــــــــم )
الرسول صلى الله عله وسلم .. اللى اتعلمنا الاحترام من احترام اسمه .. واللى بنصلى عليه كلما ذكرنا اسمه الكريم .. واحد بيحكى قصه بيقولك قالوله يا عم !!
بالمناسبه .. شاهدت قدر ما شاهدت من حلقات اسلام بحيرى.. وماعتقدش ان فى مره واحده جاب سيرة الرسول صلى الله عليه وسلم .. ولقيته بيصلى عليه !!!!
هنا دا اللى بتكلم فيه
اصدقائى اللى عارضونى من يومين وقالولى انت بتقدس الناس بتوع زمان ومش عاوز حد يغلطهم .. لا يا شباب .. الحاجه الوحيده النقيه من اى نقد او تحريف هى كتاب الله القراّن الكريم .. واى شىء يقبل الشرح والنقد .. ولكن بأصول وعلم ودرايه مش مجرد هجوم لهدم دين كامل !
عارفين انا خايف من ايه
انتوا بتشوفوا الافلام الاجنبى صح
ناس كتير منكم بيلاحظوا انهم بيتهكموا على المسيح
وبيطلعوا عليه نكت .. وبعدين بدأ تجسيد المسيح فى افلامهم ... وتلاقيه مطلعينه فى فيلم كوميدى وعمالين يشتموه .. ويتريأوا عليه .. ويهينوه بأقذر الالفاظ !
هى فى الغرب بدأت كده .. واحده واحده لحد ما وصلوهم انهم يشتموا الدين بتاعهم
انا خايف ان الامر عندنا يوصل كده
الاول يقولك دا واحد متعلم عاوز يثقفنا وبيهاجم الناس اللى بيقول اننا بنقدسها
وفجأه يبدأ يقولك الرسول ( ياعم )
وفجأه تلاقينا دخلنا فى قصة اهانة الدين والله ( استغفر الله ) صراحة وعلنيا
هو دا الاسلام الامريكانى اللى عاوزنا نوصله
تختلفوا معايا او تتفقوا .. انا بكره اسلوب دس السم فى العسل
انت عمال تجيبلى برامج توك شو بتجيب حلقات تحول جنسى .. وهبه قطب بتشرح كيفية ممارسة الجنس .. وتجيبلى حلقات عن الشذوذ .. وحلقات عن الالحاد . وشيوخ بيروحوا ايران ويأذنوا الاذان الشيعى.. وواحد زى اسلام بحيرى درس برا ولم يدرس علوم او اصول الدين والفقه وجاى يقولك هانهدم كل اللى اتبنى دا ونبنيه احنا .. ويقولك ان اصلا مفيش حاجه اسمها علوم فقه ولا اصول حديث وكل دى خرافات !!!!!
انا مش ارهابى ومش داعشي
انا مش بقدس الاشخاص
لكن انا اقدر قيمة العلماء وان اخطأوا ..؟؟ فلا مانع من تبيان الخطأ ولكن فى حدود الادب والعقل والمنطق ..
من سبقونا لا نقدسهم لانهم اّلهه
انما نحترمهم و نجلهم لانهم عاصروا اياما كنا نتمنى ولو نعيش فيها دقيقه
وهم من نقلوا الينا العلوم والتاريخ وصحيح الدين
وان كانت هناك حوادث مذكوره فى كتبهم .. فقد تكون مغلوطه..لا مانع فى تقبل الفكره فهم بشر .. وقد تكون كمعظم الحوادث كانت حوادث تخص الزمان والمكان التى وقعت فيه فقط ولا يجوز تطبيقها فى كل العصور !
لكن اننا نيجى نقول نهدم الكل .. وانهم ناس ارهابيين
ولما اجى انا اقولك انا خايف الامر يتطور لهدم الدين تقولى انت ارهابى grin رمز تعبيري
ياعم لو هاتمسك بدينى ولو عندى نظره بعيده مخليانى شايف ان دا سم فى عسل والغرض منه ايذاء الاسلام ... يبقى اتشرف انى اكون ارهابى فى نظرك !
E.E
Eslam Elbahrway
منشور by Eslam Elbahrawy.
