عم حسونه وعمرو اديب و درس فى الوطنيه وحب مصر - الفقر ليس عذرا للخيانه

عم حسونه وعمرو اديب و درس فى الوطنيه وحب مصر - الفقر ليس عذرا للخيانه

بوست لازم تقروه .. وبوست لازم هاتشوفوه 

اول مره اطلب منكم طلب زى دا .. بس يستحق انى اطلبه 

من يومين كتبت ان مصر دى ماتقدرش تشوفها من جانب واحد .. وتحدثت عن انك بتشوف الشاب اللى بيشرب مخدرات وتحس ان البلد ضايعه وفى نفس الوقت بتشوف الراجل المسن العجوز نازل فى عز البرد بيصلى الفجر فتحس ان البلد فيها بركه 

كمان دايما بتكلم عن عمرو اديب 

اعارضه واهاجمه فى مواقفه اللى بتكون ملتويه احيانا

لكن دايما بشكره على التبرعات اللى بيعملها لصالح البلد 

اللى فى الصوره دا الحج حسونه .. راجل 52 سنه

الراجل دا بيثبت الكلام اللى قولته من يومين 

وبيثبت ان الخير فى الكبار مش فى الشباب

الكبار اللى قالوا عليهم نزلوا انتخبوا وجابوا الثوره ورا

بس واضح ان هما اللى بيشدوا البلد لقدام 

الراجل دا كــــان وركزوا فى كلمة كااان 

كان سواق نقل عام وطلع على المعاش بسبب حالته الصحيه

بعد ما اتخصم منه الحوافز والكلام دا اصبح معاشه 750 جنيه

بيدفع منهم 250 جنيه ايجار وعنده عيلين صغيرين 

يعنى تقريبا ال 500 جنيه الباقيين مايكفوش البامبرز بتاع العيال

الراجل دا كان فى المطريه .. يوم 25 يناير لما كان الاخوان ومعاهم الخونه مدعى الثوريه بيولعوا فى اتوبيس نقل عام 

الراجل دا كان جوا الاتوبيس وهو بيولع .. والراجل دا بفكركم تانى مش سواق الاتوبيس .. لكنه كان راكب فيه .. كل الناس نزلت جريت حتى سواق الاتوبيس .. لكن الراجل دا رفض .. اتشد وانضرب واتولع فى الاتوبيس وهو فيه وبرضو مارضيش يسيب الاتوبيس 

اللى كانوا واقفين تحت جنب الاتوبيس شباب اعمارهم فى العشرينات .. اللى بيكسر الاتوبيس واللى بيولع فيه واللى واقف بيصور فى موبايله

انما الراجل اللى انقذ الاتوبيس .. واللى قعد جواه وهو بيولع رغم ان الدخان ممكن يموته لانه مريض فى صدره .. الراجل عنده 52 ورفض انه يسيب الاتوبيس وينزل 

عم حسونه لما سألوه انت عملت كده ليه رغم انك مش سواق الاتوبيس .. وحتى لو كنت السواق كنت ممكن تعمل زى السواق ما عمل وتجرى .. ومش هايكون عليك اى مساءله قانونيه 

الراجل قال : انا كنت بشتغل على اتوبيس زى دا .. عارف يعنى ايه اتوبيس تمنه كبير يتدمر قصادى وانا عارف انه من فلوسنا .. وكمان قال .. الاتوبيس دا بيشتغل عليه افراد لو حسبناهم يطلعوا 5 ولو كل واحد فيهم عنده اسره من اربع افراد يعنى الاتوبيس دا بيصرف على 20 فرد .. ازاى اشوف 20 فرد هايتقطع عيشهم واسكت 

عم حسونه محدش عرف عنه حاجه 

كله ركز على سواق التاكسى اللى التاكسى بتاعه اتحرق ورئيس الوزراء قابله .. لكن ولا حس ولا خبر عن الراجل البطل دا 

امبارح عمرو اديب كان الاعلامى الوحيد اللى شوفته اتكلم عن الراجل دا .. وفجأه بدأت التبرعات تنزل على الراجل دا .. لدرجة انه ماكانش سامع ارقام التبرعات كويس من كتر الذهول اللى هوا فيه 

النهارده برنامج القاهره اليوم استضاف عم حسونه

الراجل بدأ يتكلم عن مرتبه .. وعيشته .. وشوفنا بيته الاوضه وصاله

واتكلمت اخته الكبيره اللى قالت انها بتساعد اخوها لما بيقعد من غير شغل عشان يأكل عياله .. واتكلم عم حسونه وقال انه كان بيوصل بيه الحال انه بيبيع العيش الناشف عشان يوفر تمن الاكل لاولاده !!!!!!!!!!!

وعشان تعرفوا ان الرجوله والبطوله والوطنيه لا تقدر بمال ولا بسعر

ربنا كافىء الراجل دا .. من حيث لا يعلم ولا يحتسب 

ناس من مصر اتبرعت .. دخل متصل كويتى رفض يقول اسمه قال انه هايتبرع بمبلغ مادى بالاضافه الى مرتب شهرى قدره 2000 جنيه مدى الحياه للحج حسونه .. ودخل مواطن سعودى تكفل بالحج والعمره لكل عائلته وزوجته .. 

عم حسونه بيتكلم بكل تلقائيه وبيقول لرانيا بدوى .. احنا والله مش وحشين .. انا لما كنت ابقى جعان كنت اروح اكل عند ناس مسيحيين وكانوا يقولولى انت بتقرف مننا؟ اقولهم لا .. احنا واحد ومصريين وكنت بقعد وباكل

وبعد الكلمتين دول اللى ربنا حطهم على لسان الحج حسونه بدون ترتيب .. يدخل هانى عزيز ( المسيحى ) ويقول انه هايعمل مرتب شهرى للحج حسونه ( المسلم ) قدره 2000 جنيه شهريا مدى الحيــــــــــــــــــــــاه !

اخت عم حسونه اللى تقريبا تخطت الستين .. قبل ما حد يتبرعلها او يديلها فلوس .. بتتكلم على التليفون بتلقائيه ... بتدعى لمصر وللبلد وبتقول انها واحده ست بس لو كانت مكان اخوها كانت عملت اللى عمله .. وعشان كده برضو ربنا مابينساش عباده .. و زى ما كانت بتساعد اخوها فى زنقته .. كان اخوها سبب السعد عليها انها يجيلها تبرعات وتعمل حج وعمره 

عم حسونه اثبت كتير 

عم حسونه اثبت ان الخير فى الكبار 

وان الشر الحاضر والجاى فى الشباب .. الشباب اللى كسر الاتوبيس وكان بيولع فيه والراجل جواه .. الشباب الى وقف يصور بالموبايل ومافكرش يطلب المطافى حتى .. واللى كان بيطفى الاتوبيس راجل عنده 52 سنه !

اخر نقطه تخص عم حسونه

عاوز اقولكم .. واقول لنفسى لانى واحد منكم وواحد من اللى رددوا الجمله دى : ان بسبب الفقر والحاجه فى ناس بتقبل تاخد فلوس وتعمل اعمال تخريبيه و دول لازم نشوفهم عشان مايبقوش مضطرين يقبلوا !

من هنا ورايح وبعد ما شوفنا الراجل اللى باع العيش الناشف عشان يأكل عياله .. اللى هاشوفه بيتحجج بأن اهل المنطقه الفلانيه قبلوا فلوس من اخوان او غيرهم عشان يعملوا ارهاب وبلطجه تحت دعوى انهم غلابه وفقراء .. اقسم بالله مش هارحمه ومش هارحم نفسى لو انا قلت كده .. الفقر عمره ما يخلى الانسان يبقى خاين ..

الراجل دا لو هانتكلم على الفقر .. كان اولى انه يقول وانا مالى ما يتحرق ويجرى زى اللى جريوا .. او بمعنى تاااااانى بقى .. كان استغل ظروف المطريه وراح قبض 200 ولا 300 جنيه عشان يخرب ولا يكسر ويقولك اهى لقمة عيش وانا عاطل وعيالى جعانه !

ولا اااايه

** بخصوص عمرو اديب 

كلكم شوفتوا هجومى على عمرو اديب مرات كتير

وبرضو شوفتوا اكتر من مره شكرى له فى تبرعات بناء القرى وحملات البطاطين والملايين اللى بتتجمع فى ليلة القدر لصالح الفقراء 

انا لسه منتقد عمرو اديب من 24 ساعه وقت ما اتكلم عن شيماء الصباغ وقال الداخليه قتلتها .. وهاجمته قبلها كتير فى حاجات كتير

تتفق معاه .. تختلف معاه .. تحس انه بيسخن .. تحس انه بيكره البلد .. تحس انه مأجور .. تحس انه طابور عاشر حتى .. ايا كان اللى بتحسه .. لكن ماتقدرش تنكر انه مذيع يستطيع توجيه الرأى العام ناحية قضايا معينه .. ومذيع بيقدم حاجات فيها خير وكويسه 

انا مبدأى دايما معاكم ان مفيش حاجه بالجمله 

وقت الغلط هاننتقد ووقت الصح هانقول صح 

الراجل دا لو ماكانش عمرو اديب اتكلم عنه .. كان زمانه صفر عالشمال.. ولا محافظ كرمه ولا حد اتبرعله 

وكفايه اوى ان الناس الفقيره دى لما بقت تسمع ان فى تبرع بعمره او فلوس كانت الست بتزغرد وتقول تحيا مصر وتسلم الايادى

انت من خلال دقايق فى برنامج تلفزيونى سلطت الضوء على حاجه.. خلت ناس غرقانه فى الفقر يزيد عندها حس الوطنيه وتقول تحيا مصر من قلبها وحست ان البلد اخيرا بتديهم حاجه 

** نيجى بقى لمكالمه القدير محمد صبحى 

انا بس عجبنى الراجل عم حسونه لما سألوه نفسك فى ايه

قالهم نفسى اكلم محمد صبحى ‏‎smile‎‏ رمز تعبيري

خلى بالكم .. الاجابه دى تعبير عن ثقافة جيل الراجل دا

الراجل دا جيله اتربى على كلام واحد زى محمد صبحى 

واحد بيتكلم عن قيم واخلاق .. عشان كده ماطلبش يشوف صافيناز ولا يعمل مكالمه مع السبكى !

كل اناء ينضح بما فيه

ولو كان كلام محمد صبحى اثر فى الراجل ابن البلد وخلاه يتصرف كده .. فتوقعوا ان كلام السبكى وافلامه هاتطلع واحد لما يوصل لسن خمسين سنه ..هايولع ويقتل لان دا اللى شافه فى جيله

محمد صبحى قال .. انا بشكر عم حسونه المصرى اللى بجد.. لان المصريى مش خاين .. واللى بيكسر ويحرق هو الخاين

اللى بيكسر ويحرق هو الخاين 

اللى بيكسر ويحرق مش مصرى .. المصرى اللى بجد هو اللى رمى نفسه فى النار يدافع عن اتوبيس حكومه هو طالع منها معاش وماكانش يعرف انه هايتصور او هاياخد فلوس 

صدقت يا فنان .. المصرى مابيخربش 

** اخيرا فرق معايا حاجه مهمه اوى خلت عندى امل فى بكره .. ان محمد صبحى والمحامى سمير صبرى .. الاتنين اتبرعوا بحاجه حلوه اوى..بس مش فلوس .. اتبرعوا بتكاليف تعليم بنات عم حسونه من اول الحضانه لحد ما يخلصوا جامعه..هو دا اللى انا بدور عليه..التعليم .. التعليم هو اللى هايخلينا متقدمين مش الفلوس 

** عم حسونه لما سألته رانيا بدوى تقول ايه للسيسي

قالها .. اقوله ربنا يقويك علينا !

كلمه بمليون معنى مستحيل تسمعها من سياسى كبير او ناشط وثورجى.. كلمه طلعت من راجل مابيعرفش يكتب اسمه بس فاهم صح .. وعارف اننا شعب فرعون مش من السهل حد يحكمه 

** انا عاوز اشكر كل حد قرأ البوست لاخره

وكل حد هايعمل شير .. مش عشان خاطر عمرو اديب .. ولا عشان خاطر السيسي .. ولا عشان خاطر اسلام .. عشان خاطر كل واحد فيكم عنده ابن شاب .. عنده صديق شاب على بروفايله .. لما يقرا الكلام دا يحس على دمه ويشوف العواجيز اللى قالوا انهم غرقوا البلد بيعملوا ايه .. ويحاول ياخد قدوه منه بدل ما بينزل يكسر ويحرق ويخرب

اخير هاختم بالكلمه اللى قالتها الست الغلبانه اخت عم حسونه

تحيا مصر .. وعمار يا مصر 

E.E

Eslam Elbahrawy

‎‎منشور‎ by Eslam Elbahrawy.‎