لهذه الاسباب رفضت النزول لتقديم تفويض اخر ضد الارهاب بعد حادث سيناء الارهابى
انا اسف .. انا متعود علي الهجوم
عندي وجهة نظر هاقولها .. والاجر علي الله
انا شايف اننا دخلنا مرحلة اننا نضحك الناس علينا
احمد موسي بيدعو الناس للنزول الجمعه الجايه ويطلبوا من الريس يعدم الاخوان ويفوضوه مره تانيه
يا نهار اسود .. دا قمة الهذيان
اولا خطر جدا حدوث تجمعات والبلد فيها ارهاب وممكن وسط اي مظاهره تترمي قنبله تموت الاف من الناس
ثانيا
انا اسف يعني .. هو مش فرح تفويضات
احنا فوضنا مره وكان التفويض صريح ضد الارهاب
مش كل ما تتفجر قنبله نطلب من الناس تعمل تفويض
خاصة انهم ماشافوش نتيجه للتفويض اللي قبله
ثالثا
انتوا بتقودونا الي جريمه هانعملها بايدينا وهانبقي زينا زي حكم مرسي
ازاي ننادي بعمل مليونيات لاجبار القضاء يحكم بالاعدام علي الاخوان
( دا كلام احمد موسي )
انت كده بتقول للكل انا بتدخل في القضاء.. ولو كان القاضي اصلا ناوي يعطي اعدام .. بعد مطالباتكم هايطلع الاخوان يقولوا ضغطوا علي القضاء عشان يطلع احكامه ضد الاخوان وانا طبعا معترض علي بطئ القضاء.. لكن لو تدخلنا يبقي ضيعنا حقنا بإيدينا
رابعا .. مظاهره تجبر القاضى على حكم .. زيها زى الاخوان لما حاصروا املحكمه الدستوريه !
سيادة الرئيس اللي هافضل معاه وواقف جنبه وجنب جيش بلدي .. انا عندي بس اعتراض بسيط .. حضرتك في الخطاب بتقول انتوا اللي اختارتوا تحاربوا الارهاب .. وبتقول قولولي عاوزني اعمل ايه
اولا سيدي الرئيس حضرتك مش محتاج تفكرنا ان محاربة الارهاب كانت اختيارنا واظن احنا متحملين المسئوليه وزياده ولكن برضو نفكر حضرتك اننا قولنا نواجه الارهاب عشان ثقتنا في تفويضنا ليك
ثانيا يا ريس
ماينفعش حضرتك تقولنا عاوزين ايه وانا اعمله
احنا جيبنا رئيس عشان هو اللي يفكر ويقرر ويمشي البلد
انما لو كنا محتاجين واحد نمشيه بكلامنا ..كنا جيبنا حمدين او سيبنا الدلدول مرسي .. يا ريس انت مش محتاج نقولك تعمل ايه .. مش محتاج تفويض تاني .. معتقدش ان رجل ققوات مسلحه ورجل مخابرات زي حضرتك مستنينا احنا نقوله يعمل ايه .. فلو سمحت اتصرف كرئيس و راع مسئول عن رعيته
اضرب بيد من حديد .. انت مش محتاج تفويض
رأينا هو انك تخلصنا من الارهاب .. انما الطريقه دى بتاعتك وبتاعت القوات المسلحه لان انتم المختصين .. واحنا مش هانطلب منك .. انما انت اطلب مننا وانت عارف اننا هاننفذ اى شىء مادام فى مصلحة البلد
ربنا يقويك ويحميك ويحمى ولادنا واخواتنا فى الجيش والشرطه
دول كلمتين والاجر علي الله
E.E
Eslam Elbahrawy
منشور by Eslam Elbahrawy.
